Yeˬhawˇbaˬ nehˬ˗ehˇ gʼoeˇ dzehˬ leˇ ni leh jeh daˆ leꞈ

Heu gaˇ dzaw keuˆ laꞈ ngeh nawˇ Yeˬhawˇbaˬ nehˬ˗ehˇ taꞈ leˇ˗awˇ gʼawˬ mya jeˬ gʼawˬ mya kawˆ ya siˬ nya˗euˬ meh. Nawˬ neh ya siˬ˗euˬ jeˬ baˬ da neh nawˇ Miˬyehˇ˗ahˇ gaˬ dui dui laˇ miˇ, aˬ yawꞈ˗ahˇ a nehˬ˗awˇ iˇ cuꞈ shawˇ˗euˬ kʼawꞈ pyeuꞈ nya meh. Nawˇ Miˬyehˇ˗ahˇ a nehˬ˗awˇ iˇ cuꞈ maˬ shawˇ˗euˬ siˬ naˇ jiˇ, gʼawˬ myahˇ maˬ gʼeh˗ehˇ teu loꞈ˗ehˇ jahˇ˗eu lehˇ noeˬ tsehˆ taˬ˗euˬ paˬ. Nawˇ iˇ cuꞈ shawˇ dzeuˇ ngaˬ lehˇ˗aˬ Miˬyehˇ nehˬ˗ehˇ gʼoeˇ dzehˬ leˇ ni leh jeh˗eu maˬ paˇ loˬ meh lehˇ ehˇ mawꞈ˗eu maˬ ngeuˇ˗a. Nawˇ Yeˬhawˇbaˬ nehˬ˗ehˇ gʼoeˇ dzehˬ leˇ ni mˬ maˬ maˬ byaˆ zaˇ ziˇ ya leh jeh daˆ leꞈ meh. Aˬ joˆ˗ehˇ ya leh jeh˗eu nga?

1. Yeˬhawˇbaˬ nehˬ˗ehˇ gʼoeˇ dzehˬ leˇ ni aˬ jeˬ miˇ neh ya leh jeh daˆ leꞈ˗eu nga?

Aˬ dui Yeˬhawˇbaˬ nehˬ˗ehˇ gʼoeˇ dzehˬ leˇ ni ya leh jeh˗eu meh. Aˬ jeˬ miˇ neh nga? Teu naˇ Miˬyehˇ nehˬ˗ehˇ gaˇ mahˇ kaˬ˗iˇ ni yawˬ paw yawˬ maˬ ya pyawˇ˗iˇ˗eu gʼaˇ duˬ meh. (Heˬbyehˇ 2:1) Yeˬhawˇbaˬ˗euˬ gaˇ˗ahˇ saˇ jaˇ ziꞈ˗eu laꞈ kʼoeˇ mˇ daˆ leꞈ nya ni aˬ jeˬ ya jahˇ˗eu nga? Aˬ dui tsaꞈ gaˬ˗eu gaˇ˗ahˇ ya leh jeh˗awˇ, Miˬyehˇ˗euˬ gaˇ˗ahˇ aˬ jeˬ jeˇ paˇ mˇ nya nga siˬ lehˇ ya haw˗eu meh. (Piˇliˇpiˆ 3:16-ahˇ gui.) Yeˬhawˇbaˬ˗euˬ gaˇ mˇ˗eu heu naˇ dehꞈ ziˇ laꞈ kʼoeˇ kʼaˇ muiˬ˗eu jeˬ pyeuꞈ meh.—Ja ceuˬ 84:10.

2. Aˬ jeˬ jeˇ paˇ ya mˇ daˆ leꞈ nga siˬ?

Heu kawˆ dzaw jiˇ naˇ Jaˇliꞈ dzaw˗eu aˇ saˬ saˬ˗eu kʼawꞈ, Ka li zaˬ˗euˬ dehꞈ ziˇ˗aˬ aˇ saˬ maˬ saˬ˗aˬ siˬ. Jaˇliꞈ aˬ dui˗ahˇ “yaw dehꞈ dehꞈ˗eu yaw shuiꞈ jeˬ˗ahˇ dm˗awˬ” lehˇ ehˇ˗eu meh. (Eˇpeˇsu 4:23, 24) Nawˇ yawˬ haˇ yawˬ ha Jaˇliꞈ pyehˆ tseˇ daˆ leꞈ˗awˇ aˬ myah luꞈ mehˬ bawˬ˗ahˇ iˇ˗eu leh jeh naˇ, Yeˬhawˇbaˬ hawˇ˗eu aˬ yawꞈ˗euˬ seuˆ dzeuꞈ aˇ gʼehˇ gʼawˬ mya jeˬ˗ahˇ siˬ nya dzehˬ laˇ˗eu meh. Yeˬhawˇbaˬ˗euˬ seuˆ dzeuꞈ aˇ gʼehˇ˗ahˇ kʼaˇ gʼeh nya gaˇ neh dzaw geuꞈ˗eu leh jeh˗awˇ, aˬ yawꞈ˗ahˇ laˬ kʼaˬ bi cehˇ˗eu gʼaˇ duˬ aˬ jeˬ jeˇ laˆ paˇ paˬ nga lehˇ haw˗awˇ laˆ paˇ daˆ leꞈ˗awˬ.

3. Huiˬ laˇ mahˇ laˇ ni Yeˬhawˇbaˬ aˬ joˆ˗ehˇ caw ba nehˬ˗eu nga?

‘Miˬyehˇ˗aˬ, naw maꞈ˗ahˇ bi byah laˇ tehꞈ˗a. Aˬ yawꞈ naw maꞈ˗ahˇ bi ziꞈ laˇ, bi kʼaˆ laˇ˗eu uˬ taꞈ, dawˬ pehˬ ziꞈ dah ni bi pyeuꞈ laˇ tehꞈ˗a’ lehˇ Jaˇliꞈ ehˇ˗eu meh. (1 Beˬtuˆluˆ 5:10) Aˬ dui yawˬ gʼaˬ na luꞈ lawˬ haw laˇ˗eu jeˬ˗ahˇ ya tahˬ puˬ kʼawꞈ, teu˗ahˇ gʼaˬ leˇ nya ni Yeˬhawˇbaˬ caw ba nehˬ laꞈ˗eu meh. (Ja ceuˬ 139:23, 24) Yeˬhawˇbaˬ aˬ dui˗ahˇ aˬ yawꞈ˗euˬ gaˇ˗ahˇ saˇ jaˇ ziꞈ˗eu laꞈ kʼoeˇ mˇ mawꞈ˗eu nui ma tehꞈ˗ehˇ maˬ ngeuˇ˗eu, mˇ nya˗eu gʼaˬ jiˇ biꞈ ma lehˇ saˇ jaˇ dzaˬ taˬ˗euˬ meh.—Piˇliˇpiˆ 2:13-ahˇ gui.

Naꞈ suiˇ ni dzaw

4. Kʼaˇ muiˬ˗eu cawˬ nehˬ˗ehˇ yawˬ jawˇ na luꞈ ngehˬ cawˬ

Guiˬ lahˬ shaˇ˗eu hawˇ˗eu Jaˇliꞈ gui˗eu heu naˇ, nawˬ˗ahˇ Yeˬhawˇbaˬ˗euˬ cawˬ pyeuꞈ laˇ nya ni caw ba nehˬ˗euˬ meh. Heu loꞈ˗ehˇ jahˇ daˆ leꞈ˗eu heu naˇ Yeˬhawˇbaˬ nehˬ˗ehˇ gʼoeˇ dzehˬ leˇ ni aˬ joˆ˗ehˇ caw ba nehˬ˗eu nga?

Ja ceuˬ 62:8-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Yeˬhawˇbaˬ nehˬ˗ehˇ gʼoeˇ dzehˬ leˇ ni guiˬ lahˬ aˬ joˆ˗ehˇ shaˇ paˬ˗ehˇ gʼeh˗eu nga?

Ja ceuˬ 119:97-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Yeˬhawˇbaˬ nehˬ˗ehˇ gʼoeˇ dzehˬ leˇ˗eu gʼaˇ duˬ, Jaˇliꞈ aˬ joˆ˗ehˇ gui paˬ˗ehˇ gʼeh˗eu nga?

Jaˇliꞈ pyehˆ tseˇ gaˇ neh gaˇ dahˇ tsoeˬ˗eu jeˬ gʼawˬ mya ni za nya˗eu gʼaˇ duˬ aˬ joˆ˗ehˇ ya jahˇ˗eu nga lehˇ biˬdiˬoˬ pah. Kʼoeˇ naˇ, naˇ haˬ˗eu jeˬ heu˗ahˇ ja sawˇ.

Biˬdiˬoˬ: Yawˬ haˇ yawˬ ha Jaˇliꞈ yaw muiˬ˗ehˇ pyehˆ tseˇ nya laˇ ni leh jeh (5:22)

• Nawˬ˗ahˇ biˬdiˬoˬ heu laꞈ kʼoeˇ ahˇ˗eu nui noeˬ nui duˇ aˬ geu hmˬ˗ahˇ mˇ caw mawꞈ nya?

• Nawˬ˗ahˇ aˬ jeˬ˗euˬ gaˇ kawˆ˗ahˇ pyehˆ tseˇ mawꞈ nya?

5. Miˬyehˇ˗euˬ gaˇ aˬ jeˬ jeˇ mˇ˗eu lehˇ noeˬ tsehˆ taˬ

Yeˬhawˇbaˬ˗euˬ gaˇ˗ahˇ aˬ jeˬ mˇ˗eu lehˇ noeˬ tsehˆ taˬ˗eu heu naˇ aˬ yawꞈ nehˬ˗ehˇ gʼoeˇ dzehˬ leˇ ni caw ba nehˬ laꞈ˗eu meh. Biˬdiˬoˬ pah gʼaˬ naˇ, naˇ haˬ˗eu jeˬ heu˗ahˇ ja sawˇ.

Biˬdiˬoˬ: Kʼaˇ muiˬ˗eu dehꞈ ziˇ (3:31)

• Biˬdiˬoˬ heu˗ahˇ haw ngeh, Miˬyehˇ˗euˬ gaˇ˗ahˇ aˬ jeˬ jeˇ mˇ˗eu lehˇ noeˬ tsehˆ taˬ˗eu heu naˇ, Kaˬmeˬlawˬ˗ahˇ aˬ joˆ˗ehˇ gaˇ dahˇ tsoeˬ˗eu nga?

Yawˬ gʼaˬ na luꞈ miˇ kʼahˬ yawˬ kʼahˬ yawˬ˗ahˇ pawˇ˗iˇ˗awˇ Miˬyehˇ˗euˬ gaˇ mˇ˗iˇ nya˗eu lehˇ nmˇ˗aˬ maˬ ngeuˇ˗a. Ehˇ kʼawꞈ aˬ dui yawˬ ha mˇ nya˗eu jeˬ jaˆ meh. Dawˬdaˬ 21:5-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Aˬ dui aˇ muˇ laꞈ kʼoeˇ aˬ jeˬ jeˇ mˇ˗eu lehˇ noeˬ tsehˆ taˬ nya˗eu nga?

• Aˬ dui tsaꞈ gaˬ˗eu gaˇ aˬ jeˬ jeˇ mˇ˗eu lehˇ noeˬ tsehˆ taˬ nya˗eu nga?

Jaˇliꞈ heu deuˆ nawˬ neh noeˬ tsehˆ taˬ˗euˬ jeˬ˗ahˇ mˇ byah nya ni aˬ joˆ˗ehˇ caw ba nehˬ˗eu nga?

Aˬ dui mˇ˗eu lehˇ noeˬ tsehˆ taˬ nya˗eu jeˬ

• Guiˬ lahˬ shaˇ˗eu paw bym laˇ byehˆ laˇ ni leh jeh˗eu

• Jaˇliꞈ tiˬ dmˬ dmˬ lah ni gui jiˇ˗eu

• Aˇ muˇ laꞈ kʼoeˇ˗euˬ yawˬ gʼaˬ na luꞈ˗ahˇ siˬ nya laˇ ni leh jeh˗eu

• Jaˇliꞈ dzaw zaˬ jawˇ laˇ ni leh jeh˗eu

• Tiˬ poˆ na huˬ mehˬ mehˬ˗eu gʼaˬ, maˬ ngeuˇ naˇ aˬ myah luꞈ huˬ mehˬ mehˬ˗eu gʼaˬ geuꞈ˗eu

• Zaˬ yo aˬ li pyeuꞈ naˇ, aˇ muˇ˗ahˇ caw ba˗eu gʼaˬ geuꞈ nya laˇ ni leh jeh˗eu

Kawˆ shawˆ

Yeˬhawˇbaˬ nehˬ˗ehˇ gʼoeˇ dzehˬ leˇ ni leh jeh˗awˇ, aˬ yawꞈ˗euˬ gaˇ laꞈ kʼoeˇ aˬ jeˬ jeˇ mˇ˗eu lehˇ noeˬ tsehˆ taˬ. Heu loꞈ˗ehˇ jahˇ naˇ nawˇ mˬ maˬ maˬ byaˆ zaˇ ziˇ laˬ kʼaˬ cehˇ nya meh.

Ja sawˇ poˆ˗eu

• Yeˬhawˇbaˬ nawˬ˗ahˇ aˬ yawꞈ˗euˬ gaˇ˗ahˇ saˇ jaˇ ziꞈ˗eu laꞈ kʼoeˇ mˇ nya ni caw ba nehˬ meh lehˇ aˬ jeˬ miˇ neh jah nya˗eu nga?

• Yeˬhawˇbaˬ nehˬ˗ehˇ gʼoeˇ dzehˬ leˇ ni aˬ jeˬ jeˇ ya jahˇ˗eu nga?

• Miˬyehˇ˗euˬ gaˇ aˬ jeˬ jeˇ mˇ˗eu lehˇ noeˬ tsehˆ taˬ˗eu heu naˇ, Miˬyehˇ nehˬ˗ehˇ gʼoeˇ dzehˬ leˇ ni aˬ joˆ˗ehˇ caw ba nehˬ˗eu nga?

Haw lahˬ

Yeˬhawˇbaˬ aˬ jeˬ˗ahˇ aˇ poeˬ taˬ baw dzehˬ nga, aˬ yawꞈ˗ahˇ jah˗eu lehˇ aˇ yeˇ huiˬ˗eu jeˬ tiˬ poˆ mˇ gaˇ laˬ, maˬ ngeuˇ naˇ yawˬ nah na luꞈ aˬ yawꞈ˗ahˇ saˇ jaˇ ziꞈ ziꞈ˗ehˇ dehꞈ gaˇ laˬ?

Aˬbyaˬhaˬ loꞈ˗ehˇ saˇ jaˇ ziꞈ (9:20)

Saˇ jaˇ ziꞈ˗eu Yeˬhawˇbaˬ˗euˬ gaˇ mˇ zaˬ deuˬ kʼawꞈ, laˬ kʼaˬ maˬ paˇ cehˇ ni pyeuꞈ˗iˇ nya˗eu meh. Laˬ kʼaˬ cehˇ kʼoꞈ laˇ ni aˬ joˆ˗ehˇ ya jahˇ nga lehˇ haw.

Jaˇliꞈ pyehˆ tseˇ˗awˇ shaˇ noeˬ shaˇ sawˇ˗eu baˬ da neh laˬ kʼaˬ cehˇ kʼoꞈ laˇ (5:25)

Miˬyehˇ˗euˬ gaˇ˗ahˇ aˬ jeˬ jeˇ mˇ˗eu lehˇ noeˬ tsehˆ taˬ˗awˇ teu˗ahˇ aˬ joˆ˗ehˇ mˇ byah nya˗eu nga lehˇ haw.

“Beh˗euˬ yaw sahˇ˗ahˇ ciˬ huiˬ ciˬ mahˇ˗eu gʼaˇ duˬ aˬ yawꞈ˗euˬ gaˇ mˇ˗eu lehˇ noeˬ tsehˆ taˬ” (Loꞈ˗eu nymˇgoˇ, 2004 Shiꞈ siˬ ba la 15)

Noeˬ dahˇ doe laˇ˗euˬ Ka li zaˬ pyeuꞈ˗eu aˬ jeˬ miˇ neh aˇ yeˇ huiˬ˗eu nga? Teu loꞈ˗ehˇ aˬ joˆ˗ehˇ jahˇ nya˗eu nga lehˇ haw.

“Noeˬ dahˇ doe laˇ ni leh jeh, ‘Yeˬhawˇbaˬ˗euˬ aˇ nah peh le shaw’” (Loꞈ˗eu nymˇgoˇ, 2009 Ngaˬ siˬ ba la 15)