Aˬ dui mˬ maˬ maˬ byaˆ zaˇ ziˇ laˬ kʼaˬ cehˇ nya lehˇ ehˇ˗eu paˇ dmˬ zmˬ ngeh caw ba˗eu jeˬ

Nawˬ˗ahˇ Aˬ dui mˬ maˬ maˬ byaˆ zaˇ ziˇ laˬ kʼaˬ cehˇ nya lehˇ ehˇ˗eu paˇ dmˬ laꞈ kʼoeˇ˗euˬ biˬdiˬoˬ deuˬ hawˇ˗eu naˇ haˬ˗eu jeˬ˗ahˇ ya leˇ miˇ˗a loˇ? “Tiˬ gʼaˬ na ehˇ˗eu”, “Ngaˇ mˇ˗eu lehˇ noeˬ taˬ˗euˬ jeˬ”, “Haw lahˬ” lehˇ ehˇ˗eu gaˇ kawˆ uˬ dzah zaˬ heu deuˬ˗ahˇ nawˬ˗ahˇ aˬ joˆ˗ehˇ noeˬ nya? Nawˇ Jaˇliꞈ dzaw zaˬ˗ahˇ mehˬ ngeh, nawˬ˗ahˇ caw ba nehˬ˗eu yawˬ tsahˇ yawˬ˗ahˇ mawˇ maˬ laˬ?—Maꞈtehˬ 28:19, 20.

Gaˇ kawˆ hawˇ˗eu biˬdiˬoˬ deuˬ: Nawˇ paˇ dmˬ zmˬ naˇ, dzaw luꞈ˗eu gaˇ kawˆ nehˬ˗ehˇ taꞈ˗eu biˬdiˬoˬ hawˇ˗eu gaˇ kawˆ deuˬ˗ahˇ yaw awˬ˗ehˇ aˬ joˆ˗ehˇ pah nya˗eu nga? Naˬ gaˬ lawˬ muˇ neh zmˬ naˇ, laꞈ taˆ paw aˇ bymˇ 4 bymˇ lehˇ biˇ taˬ˗euˬ gaˇ ya mawˇ˗eu meh. Nawˇ gui mawꞈ˗eu bymˇ˗ahˇ toeˬ naˇ, teu laꞈ kʼoeˇ˗euˬ dzaw deuˆ deuˬ˗ahˇ mawˇ laˇ˗eu meh. Dzaw deuˆ deuˬ˗euˬ laꞈ oˆ oˆ saˬ˗ahˇ, teu bymˇ laꞈ kʼoeˇ˗euˬ gaˇ kawˆ hawˇ˗eu biˬdiˬoˬ deuˬ ahˇ˗eu meh. (Aˇ baˇ 1-ahˇ haw.)

“Yaˬ doˆ˗eu paˇ dmˬ”: Nawˬ˗euˬ dzaw zaˬ paˇ dmˬ zmˬ˗awˇ nawˇ naˬ gaˬ lawˬ muˇ neh zmˬ luꞈ naˇ, tiˬ poˆ na nawˇ paˇ dmˬ laꞈ kʼoeˇ loꞈ˗ehˇ haw˗eu heu naˇ gaˇ dahˇ tsoeˬ˗eu meh. Nawˇ naˬ gaˬ lawˬ muˇ zmˬ ngeh, paˇ dmˬ loꞈ˗ehˇ haw mawꞈ naˇ, aˇ maˇ paw laꞈ coeˇ˗ahˇ aˇ nuiˆ smˬ nuiˆ˗ahˇ toeˬ˗awˇ, “Yaˬ doˆ˗eu paˇ dmˬ” lehˇ doˆ laˇ gaˇ toeˬ. Heu loꞈ˗ehˇ toeˬ paˇ naˇ aˬ dui dzaw luꞈ˗eu gaˇ kawˆ˗ahˇ mawˇ dzehˬ laˇ˗eu meh. Aˬ yawꞈ yaw oeˇ loꞈ˗ehˇ paˇ haw kʼoꞈ mawꞈ naˇ, aˇ nuiˆ smˬ nuiˆ˗ahˇ paˇ toeˬ kʼoꞈ˗awˇ “Diˇjiˬtawꞈ paˇ dmˬ” lehˇ boꞈ taˬ gaˇ toeˬ.

“Ngaˇ dah laˇ miˬ˗aˇ laˬ?”: Oeˬ coeˇ oeˬ bawˬ heu hmˬ naˇ, Aˇ bymˇ 4 jiˇ leˇ dzaˬ˗ahˇ jaˆ˗awˇ, teu gaˇ aˇ muˇ laꞈ kʼoeˇ˗euˬ deuˬ nehˬ˗ehˇ tsaꞈ gaˬ˗iˇ mawꞈ˗eu deuˬ hawˇ˗eu iˇ cuꞈ shawˇ mawꞈ˗eu deuˬ aˬ jeˬ jeˇ ya jahˇ˗eu lehˇ ja sawˇ nehˬ taˬ˗euˬ meh. (Aˇ baˇ 2-ahˇ haw.)

Dzaw lahˬ: Heu tsahˇ naˇ aˇ yeˇ huiˬ˗eu gaˇ kawˆ deuˬ˗ahˇ dzawˇ lahˬ nehˬ taˬ˗euˬ meh. Naˬ gaˬ lawˬ muˇ neh zmˬ naˇ, dzaw lahˬ gui jiˇ ngeh dzaw luꞈ˗eu gaˇ kawˆ˗ahˇ gʼoꞈ kʼoꞈ˗iˇ nya˗eu gʼaˇ duˬ, laꞈ oˆ paw liˆ˗kuiꞈ jaˆ˗eu meh. (Aˇ baˇ 2-ahˇ haw.)