Yeˬhawˇbaˬ hawˇ˗eu Yeˬsuˇ neh mˇ nehˬ laꞈ˗euˬ jeˬ˗ahˇ guiˬ lahˬ huiˬ

Cawˬ tiˬ gʼaˬ nawˬ˗ahˇ zawˇ˗ehˇ muiˬ˗eu laꞈ sawˬ tiˬ hmˬ biꞈ laꞈ ngeh, nawˬ˗ahˇ aˬ joˆ˗ehˇ gʼeh laˇ nya? Nawˇ laˬ kʼaˬ cehˇ dui dui˗awˇ, aˬ yawꞈ˗ahˇ guiˬ lahˬ huiˬ˗eu yaw duˬ baw meh. Yeˬhawˇbaˬ hawˇ˗eu Yeˬsuˇ aˬ dui˗ahˇ laꞈ sawˬ kʼaˇ muiˬ˗eu hmˬ biꞈ nehˬ laꞈ˗euˬ meh. Teu naˇ ka kʼoꞈ˗eu jeˬ pyeuꞈ meh. Aˬ dui teu˗euˬ gʼaˇ duˬ guiˬ lahˬ huiˬ˗eu lehˇ aˬ joˆ˗ehˇ mˇ doˆ laꞈ nya˗eu nga?

1. Miˬyehˇ hawˇ˗eu Yeˬsuˇ neh aˬ dui˗euˬ gʼaˇ duˬ mˇ nehˬ laꞈ˗euˬ jeˬ˗ahˇ, guiˬ lahˬ aˬ joˆ˗ehˇ huiˬ nya˗eu nga?

‘Zaˬmaˇ˗ahˇ kʼaˇ jah˗eu tsawˇ haˬ mˬ maˬ maˬ byaˆ zaˇ ziˇ dehꞈ˗eu jeˬ za˗eu meh’ lehˇ Jaˇliꞈ laꞈ kʼoeˇ saˇ jaˇ dzaˬ taˬ˗euˬ meh. (Yoˇhaˬ 3:16) Aˬ dui jah˗eu lehˇ aˬ joˆ˗ehˇ mˇ doˆ laꞈ nya˗eu nga? Aˬ dui jah˗eu jeˬ aˬ dui neh tseˇ˗euˬ jeˬ hawˇ˗eu mˇ˗eu shaˇ˗eu jeˬ˗ahˇ neh ya bi mawˇ laˇ˗eu meh. (Yaˬkoˆ 2:17) Aˬ dui ngehˬ˗eu jeˬ hawˇ˗eu mˇ˗eu jeˬ neh jah˗eu lehˇ mˇ doˆ laꞈ ngeh tiˬ jawˇ, Yeˬhawˇbaˬ hawˇ˗eu Yeˬsuˇ nehˬ˗ehˇ gʼoeˇ dzehˬ laˇ˗eu meh.—Yoˇhaˬ 14:21-ahˇ gui.

2. Yeˬhawˇbaˬ hawˇ˗eu Yeˬsuˇ neh mˇ nehˬ laꞈ˗euˬ jeˬ˗ahˇ guiˬ lahˬ huiˬ lehˇ aˇ yeˇ huiˬ˗eu aˬ geu ngeh yamˬ˗ahˇ mˇ mawˇ nya˗eu nga?

Yeˬsuˇ shiˇ˗eu jeˬ hu ngeh miˇ aˬ yawꞈ˗euˬ zaˬ lahˇ deuˬ˗ahˇ aˬ yawꞈ neh lawˇ nehˬ˗euˬ jeˬ˗ahˇ guiˬ lahˬ aˬ joˆ˗ehˇ paˇ huiˬ nya nga siˬ lehˇ ehˇ nehˬ˗euˬ meh. Yeˬsuˇ aˬ yawꞈ˗euˬ zaˬ lahˇ deuˬ˗ahˇ aˇ yeˇ huiˬ˗eu aˇ yamˬ tiˬ yamˬ˗ahˇ tiˬ kawˆ loꞈ˗ehˇ uiˬ laˇ lehˇ ehˇ nehˬ˗euˬ meh. Aˇ yamˬ teu yamˬ˗ahˇ Yeˬsuˇ shiˇ˗euˬ gaˇ Noeˬ mawˇ˗eu mehˬ bawˬ lehˇ kuˇ˗awˇ, Jaˇliꞈ laꞈ kʼoeˇ “Sahˬ paˬ Yeˬsuˇ˗ahˇ noeˬ keuˆ˗eu Bawˬ˗iˬ” lehˇ kuˇ taˬ˗euˬ meh. (1 Gawˇliˬtu 11:20) Yeˬsuˇ aˬ yawꞈ neh dehꞈ ziˇ lawˇ nehˬ˗euˬ jeˬ˗ahˇ, gʼaˬ kʼehˇ deuˬ hawˇ˗eu Ka li zaˬ maˇ diˇ deuˬ yawˬ gʼaˬ na luꞈ˗ahˇ bi noeˬ mawˇ mawꞈ˗eu meh. Teu miˇ neh aˬ yawꞈ˗ahˇ aˬ joˆ˗ehˇ ya noeˬ mawˇ˗eu lehˇ mˇ mehˬ yaꞈ˗awˇ, “Ngaˬ˗ahˇ noeˬ keuˆ˗eu laꞈ kʼoeˇ heu loꞈ˗ehˇ mˇ˗awˬ” lehˇ ehˇ taˬ yaꞈ˗euˬ meh. (Luˇkaꞈ 22:19) Nawˇ noeˬ mawˇ˗eu mehˬ bawˬ˗ahˇ uiˬ laˇ naˇ, Yeˬhawˇbaˬ hawˇ˗eu Yeˬsuˇ˗euˬ huiˬ dui dui˗eu nui gaˬ˗ahˇ guiˬ lahˬ huiˬ˗eu lehˇ mˇ doˆ shaˇ doˆ laꞈ˗eu jeˬ pyeuꞈ meh.

Naꞈ suiˇ ni dzaw

3. Guiˬ lahˬ huiˬ˗eu lehˇ mˇ˗eu shaˇ˗eu jeˬ neh bi mawˇ

Nawˇ iˇ cuꞈ˗ahˇ ga nuiꞈ taˬ˗euˬ lehˇ ehˇ˗awˬ. Tiˬ gʼaˬ paˬ caw ba laˇ naˇ nawˬ˗ahˇ aˬ joˆ˗ehˇ gʼeh laˇ nya? Aˬ yawꞈ neh caw ba nehˬ laꞈ˗euˬ jeˬ˗ahˇ, jeˬ maˬ ngeuˇ˗eu loꞈ˗ehˇ ngehˇ byoˆ ma laˬ? Maˬ ngeuˇ naˇ aˬ yawꞈ˗ahˇ guiˬ lahˬ kʼoꞈ˗eu gʼaˇ duˬ kʼaˇ gʼeh nya gaˇ neh leh jeh ma loˇ?

Yeˬhawˇbaˬ aˬ dui˗ahˇ caw ba nehˬ laꞈ˗euˬ miˇ neh, aˬ dui mˬ maˬ maˬ byaˆ zaˇ ziˇ dehꞈ˗eu aˬ kawˬ˗aˬ za˗euˬ ma. 1 Yoˇhaˬ 4:8-10-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Yeˬsuˇ neh lawˇ nehˬ˗euˬ jeˬ aˬ jeˬ miˇ neh muiˬ dui dui˗eu laꞈ sawˬ pyeuꞈ˗eu nga?

• Nawˬ˗ahˇ Yeˬhawˇbaˬ hawˇ˗eu Yeˬsuˇ neh nawˬ˗euˬ gʼaˇ duˬ mˇ nehˬ laꞈ˗euˬ jeˬ˗ahˇ aˬ joˆ˗ehˇ noeˬ nya?

Yeˬhawˇbaˬ hawˇ˗eu Yeˬsuˇ neh aˬ dui˗euˬ gʼaˇ duˬ mˇ nehˬ laꞈ˗euˬ jeˬ˗ahˇ guiˬ lahˬ huiˬ˗eu lehˇ aˬ joˆ˗ehˇ mˇ doˆ laꞈ nya˗eu nga? 2 Gawˇliˬtu 5:15 hawˇ˗eu 1 Yoˇhaˬ 4:11; 5:3-ahˇ gui. Jaˇliꞈ tiˬ deuˆ˗ahˇ kʼaˇ gui gʼaˬ ngeh, naˇ haˬ˗eu jeˬ heu˗ahˇ tiˬ poˆ naˇ haˬ.

• Jaˇliꞈ aˇ deuˆ heu deuˆ˗ahˇ haw ngeh, aˬ dui guiˬ lahˬ huiˬ˗eu lehˇ aˬ joˆ˗ehˇ mˇ doˆ laꞈ nya˗eu nga?

4. Yeˬsuˇ˗ahˇ dzaw geuꞈ

Aˬ dui guiˬ lahˬ huiˬ˗eu lehˇ mˇ doˆ laꞈ nya˗eu dzaˇ˗iˬ tiˬ jeˬ naˇ, Yeˬsuˇ˗ahˇ dzaw geuꞈ˗eu heu meh. 1 Beˬtuˆluˆ 2:21-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Aˬ dui Yeˬsuˇ˗euˬ pehˬ zaˇ˗ahˇ aˬ joˆ˗ehˇ caw teh nya˗eu nga?

5. Yeˬsuˇ shiˇ˗euˬ gaˇ Noeˬ mawˇ˗eu mehˬ bawˬ˗ahˇ iˇ

Yeˬsuˇ shiˇ˗euˬ gaˇ noeˬ mawˇ˗eu ciꞈ hawˬ byawˇ jahˇ beh beh ngeh poˆ, aˬ jeˬ jeˇ jahˇ˗euˬ nga lehˇ haw˗eu gʼaˇ duˬ, Luˇkaꞈ 22:14, 19, 20-ahˇ gui. Kʼoeˇ naˇ, naˇ haˬ˗eu jeˬ heu˗ahˇ ja sawˇ.

• Sahˬ paˬ Yeˬsuˇ˗ahˇ noeˬ keuˆ˗eu ciꞈ hawˬ byawˇ˗ahˇ aˬ jeˬ jeˇ jahˇ˗euˬ nga?

• Kaˬ muˇ hawˇ˗eu aˬ gaꞈ dzaˇ uiˇ aˬ jeˬ˗ahˇ ehˇ mawꞈ˗eu nga?—Aˇ deuˆ 19 hawˇ˗eu 20˗ahˇ haw.

Yeˬsuˇ aˬ yawꞈ˗euˬ zaˬ lahˇ deuˬ˗ahˇ aˬ yawꞈ shiˇ˗euˬ aˇ nah kʼaˇ keuˆ laˇ ngeh, tiˬ kʼoꞈ tiˬ poˆ aˬ yawꞈ shiˇ˗euˬ gaˇ noeˬ mawˇ˗eu mehˬ bawˬ bi jahˇ mawꞈ˗eu meh. Teu miˇ neh Yeˬhawˇbaˬ˗euˬ Saˇ kiˇ deuˬ Yeˬsuˇ shiˇ˗euˬ gaˇ noeˬ mawˇ˗eu gʼaˇ duˬ, yawˬ kʼoꞈ na luꞈ tiˬ kawˆ loꞈ˗ehˇ uiˬ laˇ˗awˇ Yeˬsuˇ neh ehˇ taˬ yaꞈ˗euˬ loꞈ˗ehˇ jahˇ˗eu meh. Aˇ yeˇ huiˬ˗eu mehˬ bawˬ heu˗ahˇ siˬ nya˗eu gʼaˇ duˬ, biˬdiˬoˬ pah. Kʼoeˇ naˇ, naˇ haˬ˗eu jeˬ heu˗ahˇ ja sawˇ.

Biˬdiˬoˬ: Yeˬsuˇ shiˇ˗euˬ gaˇ noeˬ mawˇ˗eu (1:41)

• Noeˬ mawˇ˗eu mehˬ bawˬ˗ahˇ aˬ jeˬ jeˇ jahˇ˗eu nga?

Kaˬ muˇ hawˇ˗eu aˬ gaꞈ dzaˇ uiˇ heu naˇ, dawˬ tsuiꞈ tiˬ jeˬ na jaˆ˗eu meh. Kaˬ muˇ˗aˬ aˬ dui˗euˬ gʼaˇ duˬ Yeˬsuˇ neh lawˇ nehˬ˗euˬ byah kuꞈ˗eu gʼawˇ mahˇ˗ahˇ ehˇ mawꞈ˗awˇ, aˬ gaꞈ dzaˇ uiˇ naˇ, Yeˬsuˇ˗euˬ shiˬ˗ahˇ ehˇ mawꞈ˗eu meh

Kawˆ shawˆ

Yeˬsuˇ neh aˬ dui˗euˬ gʼaˇ duˬ mˇ nehˬ laꞈ˗euˬ jeˬ˗ahˇ aˬ dui guiˬ lahˬ huiˬ˗eu lehˇ bi mawˇ˗eu gʼaˇ duˬ, Yeˬsuˇ˗ahˇ jah˗eu lehˇ mˇ doˆ shaˇ doˆ laꞈ˗awˇ Yeˬsuˇ shiˇ˗euˬ gaˇ Noeˬ mawˇ˗eu mehˬ bawˬ˗ahˇ iˇ˗eu ma.

Ja sawˇ poˆ˗eu

• Yeˬsuˇ˗ahˇ jah˗eu lehˇ ehˇ˗eu heu naˇ, aˬ jeˬ˗ahˇ ehˇ mawꞈ˗eu nga?

• Yeˬhawˇbaˬ hawˇ˗eu Yeˬsuˇ neh nawˬ˗euˬ gʼaˇ duˬ mˇ nehˬ laꞈ˗euˬ jeˬ˗ahˇ guiˬ lahˬ huiˬ˗eu lehˇ bi siˬ˗eu gʼaˇ duˬ, nawˬ˗ahˇ aˬ jeˬ jahˇ mawꞈ nya?

• Yeˬsuˇ shiˇ˗euˬ gaˇ Noeˬ mawˇ˗eu mehˬ bawˬ˗ahˇ iˇ˗eu heu naˇ, aˬ jeˬ miˇ neh aˇ yeˇ huiˬ dui dui˗eu nga?

Haw lahˬ

Yeˬsuˇ neh shiˇ˗euˬ jeˬ aˬ dui˗ahˇ aˬ jeˬ jahˇ ni laˆ noeˬ nehˬ˗eu nga?

Aˬ yawꞈ yawˬ ha˗euˬ gʼawˇ mawˇ neh Yeˬhawˇbaˬ˗ahˇ ciˬ huiˬ ciˬ mahˇ (9:28)

Jah˗eu jeˬ heu naˇ aˬ jeˬ nga lehˇ haw˗awˇ, aˬ dui jah˗eu lehˇ aˬ joˆ˗ehˇ mˇ doˆ shaˇ doˆ laꞈ nya˗eu nga lehˇ jiˇ haw.

“Yeˬhawˇbaˬ˗euˬ saˇ jaˇ dawˬ˗ahˇ jah˗eu lehˇ mˇ doˆ shaˇ doˆ laꞈ” (Loꞈ˗eu nymˇgoˇ, 2016 Tseˇ siˬ ba la)

Yeˬsuˇ neh lawˇ nehˬ˗euˬ jeˬ˗ahˇ ya siˬ ngeh dehꞈ ziˇ aˬ joˆ˗ehˇ paˇ laˇ˗euˬ nga lehˇ haw˗eu gʼaˇ duˬ, “Ngaˬ˗euˬ dehꞈ ziˇ shawˇ jehˆ ni gʼeh laˇ˗awˇ aˇ poeˬ baw laˇ” lehˇ ehˇ˗eu gaˇ kawˆ˗ahˇ haw.

“Jaˇliꞈ tsawˇ haˬ˗euˬ dehꞈ ziˇ˗ahˇ laˆ paˇ” (Loꞈ˗eu nymˇgoˇ, 2011 Yehꞈ siˬ ba la 1)

Noeˬ mawˇ˗eu mehˬ bawˬ˗ahˇ aˬ gaꞈ dzaˇ uiˇ dawˇ˗awˇ kaˬ muˇ dzaˬ˗eu deuˬ, aˬ jeˬ miˇ neh yaw cuiˆ nga lehˇ haw.

“Yeˬhawˇbaˬ˗euˬ Saˇ kiˇ deuˬ jahˇ˗eu Yeˬsuˇ˗euˬ ciꞈ hawˬ byawˇ, zahˇ nui deuˬ jahˇ˗eu jeˬ nehˬ˗ehˇ aˬ jeˬ miˇ neh maˬ duˇ leˇ nga?” (Iˇteuꞈnehꞈ laꞈ kʼoeˇ˗euˬ gaˇ kawˆ)