Wema ci Woŋwlɛ Ðaɖa Filipitɔwo

1 Pɔlu koɖo Timɔte ciwo yí nyi edɔwaviwo nɔ Kristo Yesu yí ŋwlɛkɔ wema cɛ ɖaɖa amɛkɔkɔɛ ciwo pleŋ yí nyi Kristo Yesu tɔ le Filipi sɔ kpe nɔ hamɛmɛshinshinwo koɖo wowo kpedonutɔwo:

2 Mìwo Da Mawu koɖo Axwetɔ Yesu Kristo le wa xomɛvu gangan nɔ mí yí agbena fafa mí.

3 Ŋdonɔ akpe nɔ anyi Mawu gashiagamɛ nɔ ŋɖo ŋwi mí kpɔ. 4 Ŋfannɔ kwi do ta nɔ mí pleŋ hweɖekpokpuinu. Ŋwɛni ahan koɖo jijɔ, 5 ɖo míwɛ yí eŋɛnywi lɔ yikɔ ŋkɔ so gbecigbe mísi keke vaje egbɛ. 6 Ŋkando ji mɔ mɛ ci yí tɔ edɔ nywi lɔ wawa le mí mɛ awɛ yi vɔvɔnu keke aje Kristo Yesu ŋkeke lɔ ji. 7 Esɔgbe mɔ nabui ahan do mí pleŋ nu, ɖo míwo nu le eji mɛ nɔŋ yí Mawu wa xomɛvu gangan nɔ nyɛ koɖo míwo. Míkpedo ŋnu hwenu ŋle gakpa mɛ koɖo hwenu ŋhwlɛn ta nɔ eŋɛnywi lɔ yí zan ese keŋ axɔ acɛ yí adrɛ.

8 Ðo Mawu nya mɔ míwo kpɔkpɔ drodroɔŋ veviɖe yí ŋlɔn mí shigbe Kristo Yesu nɛ. 9 Eyi enu ci ŋkpɔtɔ donɔ gbe ɖaɖa yí biɔnɔ yí nyi mɔ, lɔnlɔn míwotɔ le kpɔtɔ agangankɔ doji yí míawa ɖaŋ ajeshi edro Mawu tɔ nywiɖe yí agbemɔŋje mɛ keŋkeŋ; 10 nɔ míatɛnŋ ajeshi enu ciwo yí le veviɖe sɔwu keŋ nɔ afɛn ɖekɛ ŋgbele mí nu o yí mídado fɔbli mɛbuwo keke je Kristo ŋkeke lɔ ji o. 11 Ŋgbedonɔ gbe ɖaɖa hɛnnɛ nɔ míaɖu ele nɔ edɔ nywi ciwo* pleŋ yí Yesu Kristo wakɔ to mì ji keŋ nɔ amɛwo akpɔ lé Mawu gangan do yí akanfui.

12 Nɔviwo, ŋji mɔ míanya mɔ anyi nɔnɔmɛ lɔ vana yí eŋɛnywi lɔ yikɔ ŋkɔ doji ŋtɔkpu, 13 ɖo sɔja ciwo yí cɔnɔ Rɔma fyɔ xwe koɖo mɛshiamɛ nya mɔ Kristo ŋci yí ŋle gakpa mɛ do. 14 Anyi gakpamɛnɔnɔ na yí nɔvi sugbɔtɔ ciwo yí wakɔ dɔ nɔ Axwetɔ vaɖo kankandoji, wogbe dɔn doji yí nukɔ Mawu nyɔ lɔ koɖo jitri.

15 Le nyɔnɔnwi mɛɔ, mɛɖewo sɔ ŋbia koɖo ehwlɛnwawa ɖekɔ kunu so Kristo nu, vɔ edro nywi yí mɛbuwo sɔ wɛkɔ. 16 Lɔnlɔn yí dɔ mɛ cɛwo xokɔ nuxu so Kristo nu, ɖo wonya mɔ wosɔŋ nɔ mahwlɛn ta nɔ eŋɛnywi lɔ. 17 Vɔ mɛɖetɔ lɔwoɔ, evu yí wojikɔ adɔ ɖɛ taɖo yí wɛkɔ, denyi susu nywi yí dɔ wowɛkɔ o, wojikɔ mɔ yewoado vevisese nɔŋ doji le gakpa mɛ. 18 Nyi yí to so mɛɔ? Ena yí amɛwo sekɔ enyɔ ci yí kuso Kristo nu yí ejɔkɔ ji nɔŋ, nɔ egbenyi susu nywi alo susu dɔndɔn yí wosɔ drɛkɔ can. Eyi taɖo nakpɔtɔ akpɔnɔ jijɔ, 19 ɖo ŋnya mɔ ecɛ awɛ yí woahwlɛnŋ gan to míwo kwifanwo koɖo alɔdu ci yí so Yesu Kristo gbɔngbɔn lɔ gbɔ ji. 20 Ecɛ sɔgbe koɖo enu ci ŋle te kpɔ veviɖe yí kpɔkɔ emɔ nɔ, eyi nyi mɔ ŋdaɖu ŋkpɛn le ŋɖekpokpui mɛ o, vɔ navoŋ yí axonɔ nuxu keŋ nɔ woatɛnŋ akanfu Kristo to anyi lankpu ji shigbe lé ele do tɛgbɛɛ sa nɛ, nɔ ŋle agbe alo ŋku can.

21 Ðo nɔ ŋle agbeɔ, Kristo ŋle agbe nɔ yí nɔ ŋkuɔ, nyɔna le mɛ nɔŋ. 22 Nɔ ŋkpɔtɔ le agbe le gbaza cɛ mɛɔ, nasun ji awa edɔ sugbɔ nɔ Kristo; gan ŋdejikɔ anu ci nasɔ nɔ mɛɖe o. 23 Ŋdenya ci nasɔ le amɛve lɔwo mɛ o, ɖo ŋjijiɛ mɔ woatashiŋ keŋ nɔ manɔ koɖo Kristo yí le nyɔnɔnwi mɛɔ, eyi nyɔ wu. 24 Vɔ ele veviɖe nɔŋ sɔwu mɔ makpɔtɔ anɔ gbaza mɛ do míwo ŋci. 25 Ci ŋkando ecɛ jiɔ, ŋnya mɔ nakpɔtɔ ani koɖo mí pleŋ nɔ míakpɔtɔ ayikɔ ŋkɔ doji yí eji agbejɔ mí le xɔse mɛ 26 keŋ nɔ míwo jijɔ asugbɔ doji le Kristo Yesu mɛ do enyɛ ŋci hwenu nagbevanɔ koɖo mí ke.

27 Mívlɛ awanɔ nu* asɔnɔ koɖo eŋɛnywi Kristo tɔ lɔ keŋ nɔ ŋva mí gbɔ alo ŋdeva can ɔ, mase mɔ míle te gogwiɖe le gbɔngbɔn kuɖeka mɛ yí sɔ egbe ɖo ju* yí wawa dɔ alɔlealɔmɛ keŋ akando eŋɛnywi lɔ ji. 28 Mídelɔn yí míwo ketɔnɔwo do vɔnvɔn nɔ mí le ŋɖekɛ mɛ o yí ecɛ nyi kpeɖoji mɔ woagu wo swi yí ahwlɛn míwo gan; Mawu gbɔ yí ecɛ so. 29 Ðo emɔ hun nɔ mí yí míaxɔ Kristo ji se yí agbekpe fun do ta ni. 30 Ahwa ci ŋwakɔ yí míkpɔ yí gbese yɛ mɔ ŋkpɔtɔ wɛkɔɔ, eyi lɔ ke míwo can míwakɔ.