Wema Amɛvetɔ ci Woŋwlɛ Ðaɖa Korɛntitɔwo
3 Mìagbetrɔ atɔ mìwoɖekiwo kanfukanfu kea? Alo shigbe lé mɛɖewo wɛni nɛ ɖe, aʒan mɔ mìaŋwlɛ wema ciwo mɛ mìakanfu mìwoɖekiwo le ɖaɖa mí abi axɔ wo le mí gbɔa? 2 Míwoŋtɔwo yí nyi mìwo wema ci woŋwlɛ do mìwo jiwo mɛ yí amɛwo pleŋ jeshi yí hlinni. 3 Ðo mídasɛ mɔ yewonyi Kristo wema ci mìwo ciwo yí nyi Mawu dɔwatɔwo ŋwlɛ, denyi enuŋwlɛci yí wosɔ ŋwli o, vɔ Mawu agbuagbu lɔ gbɔngbɔn yí wosɔ ŋwli, denyi ekpe kpakpɛwo ji woŋwli do o, vɔ agbetɔwo jiwo mɛ yí woŋwli do.
4 Mìkando enyɔ cɛ ji le Mawu mɛ toto Kristo ji. 5 Denyi mìwoŋtɔwo yí kpɔ mɔ mìsun do yí awa dɔ ɖe o, vɔ Mawu yí kpɔ mɔ mìsun do yí awa edɔ ɖekpokpui. 6 Eyɛ yí kpɔ mɔ mìasun ji yí anyi edɔwaviwo nɔ enublabla yoyu lɔ, denyi nɔ ese ci woŋwlɛ ɖɛ o, vɔ nɔ gbɔngbɔn lɔ yɔ; ɖo ese ci woŋwlɛ ɖɛ donɔ hwɛ amɛ mɔ woaku, vɔ gbɔngbɔn lɔ nanɔ agbe amɛ.
7 Gbesɔ kpe niɔ, ese ci woŋwlɛ do ekpewo ji yí ehɛnnɔ eku vɛ va koɖo kanfukanfu keke Izraɛliviwo datɛnŋ akpɔ ŋmɛ nɔ Moizi o, ɖo yi ŋmɛ dada zo, vɔ woavaɖe klɛnklɛn ŋtɔ́ swi. 8 Ci enyi ahan ɖe, gbɔngbɔn lɔ dava koɖo kanfukanfu ci yí gangan wu cɛ ba? 9 Nɔ ese ci yí donɔ hwɛ amɛ ɖo kanfukanfuɔ, enu ci yí na wowanɔ enujɔjɔɛ kanfukanfu yɛawugan haan! 10 Le nyɔnɔnwi mɛɔ, wodegbekanfu enu ci wokanfu vayi sa o, ɖo nubu li yí ɖo kanfukanfu wui. 11 Nɔ kanfukanfu le enu ci woɖe swi nu ɖe, enu ci yí cuin kanfukanfu yɛdagangan sɔwu ba?
12 Ci emɔkpɔkpɔ cɛ le mì shiɔ, mìvoŋ yí xonɔ nuxu. 13 Eyi mìwo dewanɔ ŋci han Moizi wa ci esɔ enu cɔnnɔ ŋmɛ keŋ nɔ Izraɛliviwo ŋgbekpɔ vɔvɔnu nɔ enu ci woaɖe swi o. 14 Vɔ wowo susu gbe mɔ yedale nu o. Keke vaɖo egbɛɔ, avɔn lɔ kpɔtɔ le ŋmɛ nɔ wo nɔ wole enublabla xoxwi lɔ hlɛnkɔ, ɖo Kristo ɖekɛ ji woatɛnŋ ato yí aɖi swi. 15 Le nyɔnɔnwi mɛ, keke vaɖo egbɛ nɔ wohlɛnkɔ enu ciwo yí Moizi ŋwlɛɔ, avɔn cɔnnɔ wowo jiwo ji. 16 Vɔ nɔ mɛɖe trɔ yiɖeki ɖaɖa Yehowa* gbɔɔ, avɔn lɔ klonɔ swi. 17 Gbɔngbɔn yí Yehowa* nyi yí fini Yehowa* gbɔngbɔn leɔ, vovo nɔnɔ hunnɔ. 18 Mìwo ciwo pleŋ yí ɖe avɔn so ŋmɛ le shigbe kpɔnkpɔnlin ciwo yí danasɛ kanfukanfu Yehowa* tɔ nɛ; wotrɔ mì yí mìle shigbe Mawu nɛ yí adadasɛ kanfukanfu Mawu tɔ shigbe lé Yehowa* ci yí nyi gbɔngbɔn* jijiɛ do pɛɛ nɛ.