Wema ci Woŋwlɛ aɖa Rɔmatɔwo
10 Nɔviwo, enu ci ŋjikɔ so ji mɛ koɖo kuku ci ŋɖekɔ nɔ Mawu do nu nɔ wo yí nyi mɔ, woakpɔ hwlɛngan. 2 Ðo natɛnŋ aɖe kunu so wo nu mɔ ezo le wo mɛ nɔ Mawu sɛnsɛn, vɔ wodeɖo enumɛmɔŋje adodwitɔ lɔ o. 3 Ci wodejeshi enu ci yí le jɔjɔɛɖe le ŋmɛ nɔ Mawu ɔ, wowakɔ do wowoŋtɔwo sewo ji. Ecɛ dɔ yí wogbe mɔ yewodawa do Mawu sewo ji keŋ awa enujɔjɔɛ o. 4 Ðo Kristo yí nyi vɔvɔnu nɔ Ese lɔ. Ecɛyɛɔ, woakpɔ mɛɖekpokpui ci yí ɖo xɔse do amɛjɔjɔɛ ji.
5 Ðo hwenu Moizi ŋwlɛkɔ nu so enujɔjɔɛ ci Ese lɔ mɔ wo le wa nuɔ, énu mɔ: “Enu cɛwo ci mɛɖe awakɔɔ, wowo yí adɔ yí anɔ agbe.” 6 Vɔ enujɔjɔɛwawa ci yí tonɔ so xɔse mɛ nu mɔ: “Ŋgbebiɔbiɔ se le ao ji mɛ mɔ, ‘Mi yí ayi jeŋkwi mɛɔ?’ yi gɔnmɛ yí nyi mɔ, áyi kplɔ Kristo gbɛ, 7 alo ‘Mi yí ayi edumaɖosɛnxu mɛɔ?’ yi gɔnmɛ yí nyi mɔ, ákplɔ Kristo hɛn gbɛ so amɛkukuwo mɛ.” 8 Vɔ lé enuŋwlɛŋwlɛ lɔ nuɔ? Énu mɔ, “Enyɔ lɔ le axa nɔ eo, éle nu mɛ nɔ eo yí le ao ji mɛ”; eyi nyi xɔse “nyɔ” ci mìdrakɔ. 9 Ðo nɔ èsɔ enu drakɔ enyɔ lɔ le jugbaja mɔ Yesu yí nyi Axwetɔ yí gbekando ji le ao ji mɛ mɔ Mawu fuin so amɛkukuwo mɛɔ, àkpɔ hwlɛngan. 10 Ðo eji yí wosɔ xɔnɔ se keŋ awa enujɔjɔɛ, vɔ enu yí wosɔ nuini le jugbaja keŋ akpɔ hwlɛngan.
11 Enuŋwlɛŋwlɛ lɔ nu mɔ: “Mɛɖekpokpui ci yí axɔɛ ji se daɖu ŋkpɛn o.” 12 Vovototo dele gblamɛ nɔ Ʒuifu koɖo Grɛkitɔ o. Axwetɔ kuɖeka yí wo pleŋ ɖo yí ewanɔ xomɛvu nɔ mɛ ciwo pleŋ yí yɔɛni. 13 Ðo “mɛɖekpokpui ci yí ayɔ Yehowa* ŋkɔɔ, woahwlin gan.” 14 Vɔ lé woawɛ ayɔ yi ŋkɔ nɔ wodexɔɛ ji seɔ? Lé woawɛ axɔɛ ji se nɔ wodese nyɔ ɖe so nuɔ? Eyi lé woawɛ ase enyɔ so nu nɔ mɛɖe dedrakɔ nyɔ lɔɔ? 15 Vɔ lé woawɛ adra enyɔ lɔ nɔ wodedɔ wo ɖaɖaɔ? Shigbe lé woŋwli ɖɛ nɛɔ, “Mɛ ciwo yí drakɔ eŋɛnywi ciwo yí kuso nunywiwo nu fɔwo nya kpɔkpɔ haan.”
16 Ele ahan gan, wo pleŋ deɖo to eŋɛnywi lɔ o. Ðo Ezai nu mɔ: “Yehowa,* mi yí xɔ enyɔ ci ese le mì gbɔ* ji seɔ?” 17 Eyi taɖo enyɔ ɖe woase gbɔxwe axɔɛ ji se, eyi wosenɔ nyɔ lɔ nɔ mɛɖe xokɔ nuxu so Kristo nu. 18 Vɔ ŋbiɔkɔ se mɔ: Wodese nyɔ lɔ yɔa? Wosi gbɔxwe. Le nyɔnɔnwi mɛɔ, Enuŋwlɛŋwlɛ lɔwo nu mɔ: “Wowo gbe ɖyi le nyigban lɔ pleŋ ji yí mɛ ciwo yí le keke vɔvɔnu nɔ nyigban lɔ can se wowo ŋɛdu.” 19 Ŋgbebiɔkɔ se mɔ: Anyi Izraɛli denya yɔa? Doŋkɔɔ, Moizi nu mɔ: “Nadɔ yí àhwanŋ jukɔn bu mɛ tɔwo, nato jukɔn ci yí denya ŋɖɛ ji yí ana yí nàdo dɔmɛzi sugbɔ.” 20 Vɔ Ezai gbe dɔn koŋ yí nu mɔ: “Mɛ ciwo yí dejiŋ kpɔɔ, wowo yí kpɔŋ; mɛ ciwo yí debiɔ tamɛ se nɔŋ ɔ, wowo yí vajeshiŋ ɖɛ.” 21 Gan, énu so Izraɛli nu mɔ: “Le ŋkeke lɔ pleŋ mɛɔ, ŋke anyi lɔ̀wo ɖɛ nɔ jukɔn ci yí nyi tonumasetɔ koɖo etotritɔ.”