Apotruwo Dɔwawawo

3 Ci gbedoɖa ga xoɔ, Piɛ koɖo Ʒan yi gbedoxɔ lɔ mɛ do fiɛfi gatɔ̀n mɛ han* nu. 2 Eyi wokɔ ŋsu ɖeka vayikɔ. Atakunɔ enyi so hwenu woji. Wokɔɛ va danɔ do gbedoxɔ lɔ gbo ci woyɔnɔ mɔ Agbo Nywi lɔ gbɔ gbeɖeka duu keŋ nɔ abiɔkɔ nu mɛ ciwo yí ɖoɖoɔ gbedoxɔ lɔ mɛ. 3 Ci ekpɔ Piɛ koɖo Ʒan yí wojikɔ aɖo gbedoxɔ lɔ mɛɔ, étɔ enu biɔbiɔ wo. 4 Vɔ Piɛ koɖo Ʒan kpɔɛ juun yí Piɛ nu ni mɔ: “Glo mì kpɔ.” 5 Eyi ŋsu lɔ tɔ wo gloglo kpɔ yí bukɔ mɔ yeakpɔ ŋɖe axɔ le wo gbɔ. 6 Vɔ Piɛ nu mɔ: “Gacuho koɖo shika dele ŋshi o; vɔ ŋci yí le ŋshiɔ, nasɔ na eo. Le Yesu Kristo Nazarɛtitɔ lɔ ŋkɔ mɛɔ, zɔn zɔnlin!” 7 Piɛ le ɖushi lɔ̀ yitɔ keŋ nɔ aso je te, eyi zeɖeka tɔntɔn ɔ, ŋsɛn ɖo yi fɔwo koɖo afɔcikɔɛwo mɛ ni. 8 Eyi eso je te hayaŋ yí tɔ zɔnlin zɔnzɔn yí ɖo gbedoxɔ lɔ mɛ koɖo wo yí zɔnkɔ zɔnlin yí teteɛ yí kanfukɔ Mawu. 9 Amɛwo pleŋ kpɔɛ yí ezɔnkɔ zɔnlin yí kanfukɔ Mawu. 10 Eyi wonya mɔ ŋsu cɛ yí nɔnɔ nyinɔnɔ do gbedoxɔ lɔ gbo ci woyɔnɔ mɔ Agbo Nywi lɔ gbɔ yí biɔnɔ nu. Ekpaca wo sugbɔ yí enu ci yí jɔ lɔ wu nu nɔ wo.

11 Ci ŋsu lɔ lé Piɛ koɖo Ʒan ɖɛ yí gbe mɔ yedate le wo nuɔ, amɛwo pleŋ lɔ ju va cɔn wo le texwe ci woyɔnɔ mɔ Salomɔ Kpatɛ mɛ. Ejiŋ nɔ wo sugbɔ. 12 Ci Piɛ kpɔ ŋcɛɔ, énu nɔ mɛ lɔwo mɔ: “Izraɛliviwo, nyi yí taɖo enu cɛ kpaca míɔ? Nyi yí taɖo míglogloɔ mì kpɔ shigbe mɔ mìwoŋtɔwo ŋsɛn alo ci mìsɛnsɛn Mawu le egbejinɔnɔ mɛ yí na taɖo ŋsu cɛ zɔnkɔ zɔnlin ɔ? 13 Abrahamu Mawu, Izaki Mawu koɖo Ʒakɔbu Mawu, mìwo tɔgbiwo Mawu kanfu yi dɔwavi Yesu ci mísɔ do alɔ̀ mɛ nɔ amɛwo yí gbali le Pilati gbɔ ci Pilati ji mɔ yeatashi can. 14 Ɛɛ, mígbali amɛkɔkɔɛ koɖo amɛjɔjɔɛ cɛ yí nu mɔ wo le jo ŋsu ci yí nyi amɛwutɔ nɔ yewo. 15 Eyi míwu Amɛkplɔtɔ Vevitɔ lɔ ci yí nanɔ agbe. Vɔ Mawu fuin so amɛkukuwo mɛ keke mìkpɔ tɔxu. 16 To yi ŋkɔ koɖo xɔse ci mìɖo do yi ŋkɔ nu jiɔ, ŋsɛn ɖo ŋsu cɛ ci míkpɔkpɔ yí gbejeshi ɖɛ mɛ. Xɔse ci mìɖo do nu yí na yí edɔ̀ mi nɔ ŋsu cɛ keŋkeŋ le ŋmɛ nɔ mí pleŋ. 17 Ecɛyɛɔ, nɔviwo, ŋnya mɔ enu ci míwaɔ, mídenya gbɔxwe yí wɛ o. Ahanke míwo gawo can denya nɛ. 18 Vɔ to ecɛ jiɔ, Mawu na yí enyɔ ciwo yí enu to enyɔnuɖɛtɔwo pleŋ ji mɔ ye Kristo akpe fun jɔ do ji.

19 “Eyi taɖo mítrɔ ji mɛ yí atrɔ va Mawu gbɔ yí woacucu míwo nuvɔnwo swi keŋ nɔ gbɔndomɛ hwenuwo ava nɔ mí so Yehowa* ŋtɔ gbɔ. 20 Ádɔ Kristo ci ecan nɔ mí ɖaɖa hɛnnɛ, eyi nyi Yesu. 21 Ele mɔ jeŋkwi ahɛn mɛ cɛ ɖɛ keke ana nɔ hwenu woadra enuwo pleŋ do shigbe lé Mawu nui to yi nyɔnuɖɛtɔ kɔkɔɛ ciwo yí ni sa ji nɛ. 22 Le nyɔnɔnwi mɛɔ, Moizi nu mɔ: ‘Yehowa* míwo Mawu asɔ enyɔnuɖɛtɔ ɖeka le míwo nɔviwo mɛ nɔ mí yí ale shigbe enyɛ nɛ. Míɖo ase enyɔ ɖekpokpui ci anu nɔ mí. 23 Le nyɔnɔnwi mɛɔ, mɛɖekpokpui* ci yí dase enyɔ ci enyɔnuɖɛtɔ lɔ anuɔ, woagui swi keŋkeŋ le jukɔn lɔ mɛ.’ 24 Enyɔnuɖɛtɔwo pleŋ, so Samiɛli ji keke je mɛ ciwo yí vakplɔɛ do ji sugbɔtɔ can xo nuxu so ŋkeke cɛwo nu gbajɛɛ. 25 Míwo yí nyi enyɔnuɖɛtɔwo viwo yí gbenyi cinɔɖutɔwo nɔ enu ci Mawu bla koɖo míwo tɔgbiwo, ci enu nɔ Abrahamu mɔ: ‘Vivio ɖeka ji yí woato yí acu shi nɔ xomu ciwo pleŋ yí le nyigban ji.’ 26 Ci Mawu sɔ yi Dɔwavi ɖegbɔɔ, míwo gbɔ edɔɛ ɖaɖa doŋkɔ nɔ akpedo mɛɖekaɖeka nu nɔ míatrɔ le godu nɔ míwo nuwana vɔnwo keŋ nɔ acu shi nɔ mí.”