Wema Amɛvetɔ ci Woŋwlɛ Ðaɖa Timɔte
4 Ŋbiɔkɔ eo veviɖe le ŋmɛ nɔ Mawu koɖo Kristo Yesu, mɛ ci yí aɖo kojo nɔ amɛleagbuwo koɖo amɛkukuwo hwenu adasɛ yiɖeki petii koɖo hwenu ale yi Fyɔɖuxu lɔ mɛ mɔ: 2 Eo le dra enyɔ lɔ, dò vevi nu yí akpɔtɔ awɛkɔ le hwenu nywiwo koɖo hwenu vɔnwo mɛ, sɔ̀ jigbɔnɖɛxɔxɔ pleŋ gbe nyɔ nɔ amɛ, aka ɖyi nu, ado ŋsɛn amɛ shigbe enukplamɛtɔ nywi nɛ. 3 Ðo hwenu ɖeka avava yí woagbe mɔ yewodase enukplakpla nywi* lɔ o, vɔ woakplɔ wowoŋtɔwo drowo do yí ajijiɛ enukplamɛtɔwo trɔdo wowoɖekiwo nɔ woanunuɔ enyɔ ciwo yí avivi sese nɔ wo.* 4 Woagbe mɔ yewodagbese nyɔnɔnwi lɔ o, keŋ aɖokɔ to ŋsukankan xolɔlɔwo. 5 Vɔ eoɔ, kpɔ̀tɔ abukɔ tamɛ kpɔ nywiɖe le enuwo pleŋ mɛ, dò ji le cukaɖawo mɛ, wà eŋɛnywidradradɔ lɔ* yí awa sɛnsɛndɔ aotɔ lɔ vɛ pleŋ.
6 Ðo wosɔŋ kɔkɔ ɖɛ shigbe vɛn ci wosɔ wa vɔnsa hannɛ vɔ yí hwenu woajoŋ gogo pleŋpleŋ. 7 Ŋwa ahwa nywi lɔ, ŋlɔ eju lɔ keke yi vɔvɔnu, ŋkpɔtɔ ɖo xɔse. 8 Tɔ so evyɛɔ, wodra ejiɖuɖukuku enujɔjɔɛwawa tɔ do ɖɛ nɔŋ, eyi Axwetɔ lɔ ci yí nyi kojojɔjɔɛɖotɔ asɔ cu fɛn nɔŋ le ŋkeke ŋtɔ́ ji. Denyi nyɛɖekɛ acu fɛn nɔ o, vɔ ácu fɛn nɔ mɛ ciwo pleŋ yí kpɔkɔ emɔ veviɖe mɔ yɛadasɛ yiɖeki hɛnnɛ.
9 Jè agbla keke ava ŋgbɔ blaŋ. 10 Ðo ci Demasi lɔn enu ciwo yí le xexe* lɔ mɛɔ, éso gbeɖe ŋɖɛ; éyi Tɛsaloniki, Kresɛnsi yi Galati yí Titu yi Dalmasi. 11 Luiki ɖekɛ yí le ŋgbɔ. Nɔ ègbɔgbɔɔ, nàkplɔ Maki vɛ, ɖo ákpedo ŋnu sugbɔ le anyi dɔ ci ŋwakɔ nɔ Mawu mɛ. 12 Vɔ, ŋdɔ Tishiku yɛ ɖaɖa Efezi. 13 Nɔ ègbɔgbɔɔ, nàhɛn awu lɛgbɛ ci ŋgbe ɖɛ do Kaposi gbɔ le Troasi vɛ nɔŋ sɔ kpe nɔ wemaŋwlaŋwla lɔwo, taŋtaŋ ciwo yí nyi elangbazawema* lɔwo.
14 Alɛsandru ci yí zannɔ gajun yí sɔ wanɔ enuwo, wa enuvevi sugbɔ koɖoŋ. Yehowa* acu fɛn ni nɔ enu ciwo ewa. 15 Éle mɔ eo can àcɔ eoɖeki le nu, ɖo éfɔn gu do mìwo ŋɛdu lɔ ji haan.
16 Hwenu ŋhwlɛnhwlɛn ta nɔ nyɛɖeki ŋkɔtɔ le egawo ŋkɔɔ, mɛɖekɛ dexɔ doŋ ji o, vɔ wo pleŋ gbeŋ ɖɛ. Mawu le sɔ ke wo. 17 Gan Axwetɔ lɔ le te le axa nɔŋ yí do ŋsɛnŋ keŋ nɔ woatɛnŋ adra eŋɛnywi lɔ vɛ pleŋpleŋ to ŋji nɔ jukɔnwo pleŋ atɛnŋ asi, eyi wohwlɛnŋ gan le nu mɛ nɔ janŋtan. 18 Axwetɔ lɔ ahwlɛnŋ gan le nuvwin ɖekpokpui mɛ. Áhwlɛnŋ gan keŋ nɔ manɔ jeŋkwi mɛ Fyɔɖuxu yitɔ lɔ mɛ. Woakanfui so mavɔ sɔyi mavɔ. Amɛn.
19 Dò gbe nɔ Priska koɖo Akilasi sɔ kpe nɔ Onezifɔ xwemɛtɔwo nɔŋ.
20 Eratu yɛci Korɛnti, vɔ ŋtashi Trofimu ɖɛ do Miletu, ɖo agan dele nu o. 21 Jè agbla keke ava gbɔxwe vuvɔ hwenu aɖo.
Ebulu do gbe ɖaɖa eo. Pudɛnsi, Linu koɖo Klodia sɔ kpe nɔ nɔviwo pleŋ do gbe ɖaɖa eo hɛnnɛ.
22 Axwetɔ lɔ le nɔ koɖo eo nɔ gbɔngbɔn nywi ci èdadasɛ. Le wa xomɛvu gangan nɔ mí.