Wema ci Woŋwlɛ aɖa Rɔmatɔwo
11 Ecɛyɛ ŋbiɔkɔ se mɔ, Mawu gbe yi jukɔn yɔa? Ahan yɔ nɛ go! Ðo Izraɛlivi nyɛ can ŋnyi yí nyi Abrahamu viviɛ so Bɛnʒamɛ kɔta mɛ. 2 Mawu degbe yi jukɔn ci ecan doŋkɔ o. Mídenya enu ci enuŋwlɛŋwlɛ lɔ nu so Eli nu hwenu eje Izraɛliviwo hwɛ nɔ Mawu ba? 3 “Yehowa,* wowu ao nyɔnuɖɛtɔwo, wogban ao vɔnsakpewo hannyahannya, nyɛɖekɛ yí kpɔtɔ yí ecɛyɛɔ, wojijiɛ awuŋ.”* 4 Vɔ lé Mawu nu do nu niɔ? Énu ni mɔ: “Ŋwa agbetɔ 7 000 ɖɛ yí wowo deje klo ji nɔ Bali yí sin o.” 5 Ahanke le kakacɛ mɛ can ɔ, Izraɛlivi ɖewo kpɔtɔ li yí Mawu wa xomɛvu gangan nɔ wo keŋ yí can wo. 6 Ecɛ dasɛ mɔ xomɛvunu gangan ewa ci ecan wo yí denyi edɔ ciwo wowa nu ekpɔ do o. Nɔ enyi edɔ wowa gbɔxwe ecan wo saɔ, degbenyi xomɛvu ewa nɔ wo o.
7 Lé mìanu yɛɔ? Enu ci teŋ Izraɛli jikɔ veviɖeɔ, dekpɔɛ o. Vɔ mɛ ciwo wocan lɔwo kpɔɛ. Eji mɛ sɛnŋ nɔ mɛ ciwo yí kpɔtɔ, 8 shigbe lé woŋwli ɖɛ nɛ mɔ: “Keke vaɖo egbɛɔ, Mawu na yí wodɔn alɔn keke eyi ku nɔ wo keŋ nɔ wowo ŋkuviwo ŋgbekpɔ nu yí wowo towo ase ŋɖe hɛnnɛ o.” 9 Davidi gbenu hɛnnɛ mɔ: “Wɛ nɔ ekplɔn wowotɔ atrɔ fɛnca, eɖɔ̀, ekpe ci yí donɔ afɔbli amɛ koɖo etodɔndɔn nɔ wo. 10 Wowo ŋkuviwo le do vinvin nɔ woŋgbekpɔ nu o, agban le kpɛn wo nɔ woazɔnzɔn gozomɛ hweshiahwenu.”
11 Eyi taɖo ŋbiɔkɔ se mɔ, Ʒuifuwo klɛn nu yí juin yí enyi evɔ nɔ woa? Oo! Afɔ baɖa ci woɖe nyi hwlɛngan nɔ jukɔn bu mɛ tɔwo, ecɛ na yí wohwanŋ wo. 12 Ecɛyɛ nɔ afɔ baɖa ci woɖe nyi nyɔna nɔ xexe lɔ yí woɖe wo kpɔtɔ hɛnnɛ gan yí ewa nywi nɔ jukɔn bu mɛ tɔwoɔ, nyɔna lɔ asugbɔ wu haan nɔ wovasɔgbe vɛ pleŋ!
13 Ecɛyɛ ŋxokɔ nuxu nɔ míwo ciwo yí nyi jukɔn bu mɛ tɔwo. Ci ŋnyi apotru nɔ jukɔnwoɔ, sɛnsɛndɔ ci ŋwakɔ nɔ Mawu jenɔŋ nɔŋ sugbɔ* 14 nɔ makpɔ mɔ natɛnŋ awa ɖe keŋ nɔ nyɛŋtɔ mɛwo ahwanŋ yí woahwlɛn mɛɖewo gan le wo mɛ ma. 15 Ðo nɔ ci wogbe wo dɔ yí wodra gblamɛ do nɔ xexe lɔ koɖo Mawu ɖe, ágbenyi nubu ɖe sɔwu mɔ woafɔn wo so ku va agbe mɛ nɔ wovaxɔ woa? 16 Gbesɔ kpe niɔ, nɔ wokan akpaxwe ɖe nɔ kpɔnnɔɣɔ nyanya shigbe ekusɛnsɛn ŋkɔtɔ nɛ yí enyi enukɔkɔɛɔ, kpɔnnɔɣɔ nyanya lɔ pleŋ can ale kɔkɔɛɖe. Eyi nɔ acikewo le kɔkɔɛɖeɔ, acilɔ̀vi lɔwo can ale kɔkɔɛɖe.
17 Vɔ nɔ woso acilɔ̀vi ɖewo swi yí vasɔ eo ci yí nyi olivuci lɔ̀vi gbemɛtɔ ca do aci lɔ nu yí eke olivuci lɔ tɔ nakɔ eshi nywi eo can ɔ, 18 ŋgbeyiyiɛ go le acilɔ̀vi lɔwo nu o. Nɔ èyiyiɛ go le wo nuɔ, ɖo ŋwi mɔ denyi eo yí lé eke lɔ do te o, vɔ eke lɔ yí lé eo do te. 19 Àvanu mɔ: “Woso acilɔ̀vi lɔwo swi yí vasɔ nyɛ ɖɔli wo.” 20 Nyɔnɔnwi yɔ, xɔsemaɖo wowotɔ yí dɔ yí woso wo swi, vɔ xɔse ci èɖo dɔ yí èle te. Ŋgbeyiyiɛ go o, vɔ cɔ eoɖeki. 21 Ðo nɔ Mawu so aci lɔ ŋtɔ lɔ̀viwo swiɔ, áso eo can swi dru. 22 Eyi taɖo, nyà mɔ Mawu wanɔ xomɛvu yí gbedɔnnɔ eto nɔ amɛ. Édɔnnɔ to nɔ mɛ ciwo yí juin, vɔ ále xomɛvu wakɔ nɔ eo nɔ èkpɔtɔ le xomɛvu yitɔ lɔ mɛ; nɔ denyi ahan ɔ, áso eo can swi. 23 Eyi nɔ wowo can vaɖo xɔseɔ, woaca wo do aci lɔ nu, ɖo Mawu asun ji agbeca wo ke. 24 Nɔ Mawu so eo ci yí nyi olivuci gbemɛtɔ yí vasɔ ca do olivuci ci wodo do kpamɛ nu, ci denyi nu wowanɔ can ɖe, dale fafɛɖe sɔwu nɔ Mawu mɔ agbetrɔ asɔ olivuci ŋtɔŋtɔ lɔ̀vi lɔwo asɔ ca do olivuci lɔ nu ke ba!
25 Ðo, nɔviwo, ŋji mɔ enyɔwlawla kɔkɔɛ cɛ ale nyanya mɛ nɔ mí keŋ nɔ míŋgbebukɔ mɔ yewo yí nya ŋɖɛ vɛ o: Izraɛlivi ɖewo gbe mɔ yewodase tonu o, anyi ahan keke ana nɔ hwenu yí jukɔn bu mɛ tɔ ciwo Mawu can hlɛnhlɛnmɛ asɔgbe vɛ keŋkeŋ. 26 Lé anyi do yí woahwlɛn Izraɛliviwo pleŋ gan nɛ, shigbe lé woŋwli ɖɛ nɛ mɔ: “Hwlɛngantɔ* lɔ ato so Siɔn yí aɖe enudɔndɔn ciwo yí Ʒakɔbu wakɔ swi. 27 Eyi nyi enu ci nabla koɖo wo hwenu yí naɖe wowo nuvɔnwo swi.” 28 Nyɔnɔnwi yɔ, le eŋɛnywi lɔ kpaxweɔ, wonyi ketɔnɔwo nɔ Mawu yí enyi nyɔna nɔ mí; vɔ le toto ci ewa nɔ amɛwo cancan kpaxweɔ, ékpɔ do wowo tɔgbiwo nu yí sɔ wo wa amɛveviwo. 29 Ðo nɔ Mawu na nuwo amɛ alo éyɔ mɛɖeɔ, devavenɔ nu o. 30 Mídesenɔ tonu nɔ Mawu sa o, vɔ tonumase Ʒuifuwo tɔ na yí eku ŋshishi nɔ mí. 31 Ʒuifuwo nyi tonumasetɔwo yí eku ŋshishi nɔ mí, vɔ átɛnŋ aku ŋshishi nɔ wowo can shigbe lé ewɛ nɔ mí nɛ. 32 Ðo Mawu tashi wo pleŋ yí wole shigbe gakpamɛnɔtɔwo nɛ nɔ tonu ci wodese o, keŋ nɔ atɛnŋ aku ŋshishi nɔ wo pleŋ.
33 Oo, sɛnxu deli nɔ Mawu shicuwo, yi nunya koɖo enumɛmɔŋje yitɔ o. Wodatɛnŋ amɔ dwi nɔ yi kojoɖoɖowo o yí mɛɖe datɛnŋ anya lé ewanɔ yi nuwo do o. 34 “Mi yí jeshi Yehowa* susuɔ, alo mi yí ɖenɔ susu niɔ?” 35 Alo “mi yí na nu Mawu doŋkɔ yí Mawu ɖo acu fɛn ni do nuɔ?” 36 Ðo eyi wa enuwo pleŋ, eyɛ yí enuwo pleŋ li nɔ yí wo pleŋ nyi yitɔ. Kanfukanfu le nyi Mawu tɔ keke asɔyi mavɔ. Amɛn.