Wema ci Woŋwlɛ aɖa Rɔmatɔwo
5 Ecɛyɛ ci wokpɔ do mìwo xɔse nu yí yɔ mì mɔ amɛjɔjɔɛwoɔ, mìatɛnŋ anɔ fafa mɛ koɖo Mawu* to mìwo Xwetɔ Yesu Kristo ji. 2 Ci mìxɔ Yesu ji seɔ, éhun mɔ nɔ mì nɔ mìagogo Mawu yí agbeɖu le nɔ xomɛvu gangan yitɔ. Eji atɛnŋ ajɔ mì,* ɖo mìle emɔ kpɔkɔ mɔ mìaxɔ kanfukanfu Mawu tɔ. 3 Denyi ecɛ ɖekɛ yɔ o, vɔ eji atɛnŋ ajɔ mì* nɔ mìle efunkpekpewo mɛ, ɖo mìnya mɔ efunkpekpe hɛnnɔ ejidodo vɛ; 4 ejidodo na yí mìwo nu kpenɔ nɔ Mawu yí ecɛ nanɔ emɔkpɔkpɔ mì 5 yí emɔkpɔkpɔ dena woɖunɔ ŋkpɛn o; ɖo wosɔ Mawu lɔnlɔn kɔ do ejiwo mɛ nɔ mì to gbɔngbɔn kɔkɔɛ ci ena mì ji.
6 Le nyɔnɔnwi mɛɔ, Kristo ku do ta nɔ amɛmavɔnmawuwo do hwenu ci woɖo ɖɛ lɔ ji ci mìkpɔtɔ nyi mɛ ciwo yí gbɔjɔ. 7 Ðo agbɔnnu gbɔxwe amɛ aku do ta nɔ amɛjɔjɔɛ, taŋfuin amɛ alɔn aku do ta nɔ amɛnywi. 8 Vɔ lé Mawu dasɛ mɔ yelɔn mì do yí nyi mɔ, hwenu mìkpɔtɔ nyi nuvɔnmɛwoɔ, Kristo ku do ta nɔ mì. 9 Eyi taɖo ci woto ehun yitɔ ji yí yɔ mì mɔ amɛjɔjɔɛwoɔ, mìatɛnŋ akando ji sɔwu mɔ woato ji yí ahwlɛn mì gan hwenu Mawu adasɛ yi dɔmɛzi. 10 Ðo nɔ woto Eviɛ ku ji yí dra gblamɛ do nɔ mìwo koɖo Mawu hwenu mìnyi yi ketɔnɔwoɔ, mìakando ji sɔwu mɔ ci wovadra gblamɛ do nɔ mì yɛɔ, woato agbe yitɔ ji yí ahwlɛn mì gan. 11 Denyi yiɖekɛ yɔ o, vɔ eji gbejɔkɔ mì hɛnnɛ le Mawu mɛ to mìwo Xwetɔ Yesu Kristo ji, eyɛ ci ji woto yí dra gblamɛ do nɔ mì yɛ.
12 Nuvɔn to amɛ kuɖeka ji yí va xexe lɔ mɛ yí nuvɔn hɛn eku vɛ. Eyi taɖo agbetɔwo pleŋ kunɔ, ɖo wo pleŋ wa nuvɔn. 13 Nuvɔn le xexe lɔ mɛ gbɔxwe Ese va, vɔ wodatɛnŋ ado hwɛ mɛɖe mɔ yɛwa nuvɔn nɔ ese deli o. 14 Gan eku ɖu fyɔ so Adamu ji keke vaɖo Moizi ji, éɖu fyɔ nɔ mɛ ciwo yí dewa nuvɔn Adamu tɔ han hɛnnɛ. Adamu ɖyi mɛ ci yí avava.
15 Vɔ enunana lɔ dele shigbe nuvɔn nɛ o, nuvɔn ci amɛ kuɖeka wa na yí amɛ sugbɔ ku, vɔ xomɛvu gangan Mawu tɔ koɖo enu ci enanɔ amɛ gbali to xomɛvu gangan amɛ kuɖeka ci yí nyi Yesu Kristo tɔ ji gangan sɔwu. Mawu ato enunana cɛ ji yí acu shi nɔ amɛ sugbɔ keke awugan! 16 Lé enu ci Mawu na gbali koɖo nuvɔn ci amɛ kuɖeka wa to akpo do ke: Nuvɔn ci amɛ kuɖeka wa na yí wodo hwɛ amɛwo pleŋ, vɔ enu ci Mawu na do ta nɔ nuvɔn sugbɔ dɔ yí woyɔ amɛwo mɔ amɛjɔjɔɛwo. 17 Nuvɔn ci amɛ kuɖeka ŋtɔ́ wa na yí eku ɖu efyɔ. Vɔ mìkando ji sugbɔ sɔwu mɔ amɛwo anɔ agbe yí aɖu fyɔ to amɛ kuɖeka ci yí nyi Yesu Kristo ji. Anyi ahan, ɖo woɖu ele sugbɔ nɔ xomɛvu gangan Mawu tɔ koɖo enu ci ena wo ci yí dɔ wonyi amɛjɔjɔɛwo!
18 Eyi taɖo shigbe lé nuvɔn mɛ kuɖeka tɔ dɔ yí wodo hwɛ amɛwo pleŋ nɛɔ, ahanke enujɔjɔɛwawa amɛ kuɖeka tɔ na yí woyɔ amɛwo pleŋ mɔ amɛjɔjɔɛwo keŋ nɔ woanɔ agbe nɛ. 19 Ðo shigbe lé tonumase amɛ kuɖeka tɔ na yí amɛ sugbɔ trɔ nuvɔnmɛwo nɛɔ, ahanke tonusese amɛ kuɖeka tɔ can na yí amɛ sugbɔ atrɔ amɛjɔjɔɛwo nɛ. 20 Ecɛyɛɔ, Ese va keŋ nɔ nuvɔnwawa asugbɔ doji. Vɔ fini nuvɔn sugbɔ leɔ, xomɛvu gangan Mawu tɔ can asukɔgbɔ doji. 21 Do nyi ŋciɔ? Keŋ nɔ shigbe lé nuvɔn koɖo eku ɖu fyɔ nɛɔ, xomɛvu gangan Mawu tɔ can aɖu fyɔ ahan to enujɔjɔɛwawa ji keŋ ana agbe mavɔ to mìwo Xwetɔ Yesu Kristo ji.