Wema Ŋkɔtɔ ci Woŋwlɛ Ðaɖa Korɛntitɔwo
3 Eyi taɖo nɔviwo, ŋdesun ji yí xo nuxu nɔ mí shigbe mɛ ciwo yí gbɔngbɔn lɔ dadasɛ emɔ nɔ nɛ o, vɔ ci mínyi vifinwo le Kristo mɛɔ, ŋxo nuxu nɔ mí shigbe mɛ ciwo yí agbetɔ susu dadasɛ emɔ nɔ nɛ. 2 Anɔshu yí ŋna mí, denyi ŋɖuɖu sɛnŋ yɔ o, ɖo ŋsɛn dele mí nu ahan tɔ o, mídesɛnŋ hɔɖo o. 3 Míkpɔtɔ ɖoɖoɔ agbetɔ susuwo. Ci míhwankɔŋ míwonɔnɔwo yí le evu wakɔ koɖo míwonɔnɔwo ɖe, de agbetɔ susuwo yí dɔ míwakɔ ahan ba? De mɛ ciwo yí le xexeɛ mɛ tɔ han yí míwakɔ nɛ ba? 4 Ðo mɛɖewo nukɔ mɔ, “Pɔlu tɔ ŋnyi,” vɔ mɛbuwo nu mɔ, “Apolosu tɔ ŋnyi,” de mɛ ciwo yí le xexe cɛ mɛ tɔ han míwakɔ ahan ba?
5 Ecɛyɛ ɖe, mi yí nyi Apolosu ɔ? Ɛɛ, mi yí nyi Pɔlu ɔ? Edɔ ci Axwetɔ ɖo nɔ mì kpoŋ yí mìwakɔ, mìkpedo mí nu yí mívatrɔ xɔsetɔwo yɔ. 6 Ŋdo nu yí Apolosu wu shi ni, vɔ Mawu yí na yí eshinnɔ. 7 Mɛ ci yí do nu koɖo mɛ ci yí na eshi yi dele veviɖe o, vɔ Mawu ci yí na eshinkɔ yí le veviɖe. 8 Mɛ ci yí do nu koɖo mɛ ci yí wu shi ni le edɔ wakɔ doju,* vɔ mɛɖekaɖeka axɔ edɔ ci ewa fɛncu. 9 Ðo mìle edɔ wakɔ koɖo Mawu. Míwo yí nyi Mawu gble ci edekɔ, míwo yí nyi exɔ ci Mawu cukɔ.
10 Mawu wa xomɛvu gangan nɔŋ yí ŋɖo gɔnmɛɖokpe ɖeka shigbe exɔcutɔ bibi* nɛ, vɔ mɛbu can vacukɔ xɔ do gɔnmɛɖokpe lɔ ji, mɛɖekaɖeka le wa ɖaŋ akpɔ lé ecukɔ xɔ do ji do nywiɖe. 11 Ðo mɛɖe datɛnŋ agbeɖo gɔnmɛɖokpe bu sɔ zeto ci woɖo ɖɛ nu o, eyi nyi Yesu Kristo. 12 Vɔ nɔ mɛɖekpokpui sɔ shika, egacuho, ekpe veviwo, aci, egbe alo ebè sɔ cu xɔ do gɔnmɛɖokpe lɔ jiɔ, 13 eŋ avake yí woadasɛ enushianu yí edɔ ci mɛɖekamɛɖeka wa aze yí woakpɔ, ɖo ezo yí woasɔ dasɛ yi. Eyi ezo lɔ ŋtɔ adasɛ exɔ ci hanci mɛɖekamɛɖeka cu. 14 Mɛɖekpokpui xɔ ci yí akpɔtɔ le te le gɔnmɛɖokpe lɔ jiɔ, mɛ lɔ axɔ fɛncu. 15 Nɔ edɔ ci mɛɖe wa fiɔn ɔ, enuwo abu ni. Vɔ woahwlɛn yiŋtɔ gan yí ale shigbe ezo mɛ yí woɖi ti le hannɛ.
16 Mídenya mɔ Mawu gbedoxɔ yí míwoŋtɔwo mínyi yí Mawu gbɔngbɔn le mí mɛ ba? 17 Nɔ mɛɖe gu Mawu gbedoxɔ lɔ swiɔ, Mawu agu yɛ can swi, ɖo enukɔkɔɛ yí Mawu gbedoxɔ lɔ nyi yí míwo yí nyi gbedoxɔ cɛ.
18 Mɛɖe ŋgbelɔn able yiɖeki o: Nɔ mɛɖe le mí mɛ yí bukɔ mɔ yenya ŋɖɛ le xexe* cɛ mɛɔ, le trɔ xlunɔ keŋ atɛnŋ anyi ŋɖɛnyatɔ. 19 Xexe cɛ ŋɖɛnyanya nyi exlunu le Mawu gbɔ. Ðo woŋwlɛ ɖɛ mɔ: “Élenɔ ŋɖɛnyatɔwo le wowoŋtɔwo yexa ciwo yí wozannɔ mɛ.” 20 Wogbeŋwlɛ ɖɛ mɔ: “Yehowa* nya mɔ enugbali yí ŋɖɛnyatɔwo susu nyi.” 21 Eyi taɖo, mɛɖekɛ ŋgbesɔ agbetɔ yikɔ go o, ɖo enuwo pleŋ nyi míwotɔ. 22 Nɔ enyi Pɔlu yɔ oo, Apolosu yɔ oo alo Sefasi* yɔ oo alo xexe lɔ alo agbe alo eku alo ŋciwo yí li yɛ alo ŋciwo yí gbɔgbɔ yɔ can ɔ, wo pleŋ nyi míwotɔ. 23 Eyi míwoɔ, Kristo tɔ yí mínyi yí Kristo yɛnyi Mawu tɔ.