Wema ci Woŋwlɛ Ðaɖa Efezitɔwo
6 Ðeviwo, míse tonu nɔ míwo dawo koɖo míwo nɔwo shigbe lé Axwetɔ lɔ ji do nɛ, ɖo enu ci yí sɔgbe yí woawa nɛ. 2 “Bù dao koɖo nɔo,” ecɛ yí nyi ese ŋkɔtɔ ci nu woɖo gbe bɔdo mɔ: 3 “Eyi adɔ yí enuwo anyɔ nɔ eo* yí nàdɔn ji le nyigban lɔ ji.” 4 Vidawo, míŋgbedonɔ dɔmɛzi nɔ míwo viwo o, vɔ míkpɔtɔ ahɛnkɔ wo yí akplakɔ nu wo yí anana kpla wo shigbe lé Yehowa* mɔ wo le wɛ nɛ.
5 Edɔwaviwo, mísenɔ tonu nɔ míwo xwetɔwo, mísɔ bubu gangan wɛni nyɔnɔnwimɛtɔ so ji mɛ shigbe lé míawɛ do nɔ Kristo nɛ. 6 Denyi hwenu amɛwo kpɔkpɔ mí ɖekɛ yí míasenɔ tonu keŋ anyɔ le agbetɔwo ŋmɛ o, vɔ míɖo asenɔ tonu ci mínyi Kristo dɔwavi ciwo yí wanɔ Mawu dro so ji mɛ pleŋ. 7 Míwa edɔ nɔ míwo xwetɔwo koɖo xomɛ shigbe Yehowa* yí míwɛkɔ nɔ nɛ yí denyi agbetɔwo yí míwɛkɔ nɔ o. 8 Ðo mínya mɔ edɔ nywi ɖekpokpui ci mɛɖekaɖeka wakɔɔ, Yehowa* acu yi fɛn ni, nɔ mɛ lɔ nyi hwashi alo le vovo mɛ can. 9 Nɛnɛke, míwo axwetɔwo, míkpɔtɔ awakɔ nu ɖaɖa wo gbɔ do ahan ji, míŋgbedonɔ vɔnvɔn nɔ wo o; vɔ mínya mɔ Axwetɔ ɖekɛ lɔ yí míwo koɖo wowo bɔ wa ɖɛ le jeŋkwi mɛ yí detranɔ amɛ mɛ o.
10 Le vɔvɔnuɔ, míkpɔtɔ axɔxɔ ŋsɛn le Axwetɔ lɔ gbɔ, ɖo yi ŋsɛn gangan. 11 Mísɔ Mawu hwawanuwo pleŋ do keŋ nɔ míŋgbeje Legba fɛncawo* mɛ o; 12 ɖo mìle ahwa wakɔ,* denyi ehun koɖo gbaza yí mìwɛkɔ koɖo o, vɔ mìwakɔ ahwa koɖo gbɔngbɔnvɔn ciwo yí le jeŋkwi mɛ, acɛkpakpawo koɖo ega ciwo yí kpakpa nɔ xexe lɔ ci yí le vinvin mɛ. 13 Eyi taɖo, mísɔ Mawu hwawanuwo pleŋ do keŋ nɔ míatɛnŋ asun ahwa ji awa le ŋkeke vwin lɔ ji; eyi nɔ míɖegbɔ nɔ enuwo pleŋ ɔ, míanɔ te gogwiɖe.
14 Eyi dɔ taɖo, mínɔ te gogwiɖe yí asɔ kpablanu nyɔnɔnwi lɔ tɔ bla do alin, mído egawu enujɔjɔɛwawatɔ. 15 Edro ci míɖo yí adra fafa ŋɛnywi lɔ le nyi fɔkpawo míado do afɔ. 16 Gbesɔ kpe nɔ enu cɛwo pleŋ ɔ, míhɛn xɔse kpoxɔnu gangan lɔ do alɔ̀ mɛ keŋ asɔ ciciɛ nuvwinwatɔ lɔ hwan ciwo pleŋ yí jejeɛ zo. 17 Mísɔ hwlɛngan gakuku lɔ cɔn hɛnnɛ yí asɔ ewi gbɔngbɔn lɔ tɔ ci yí nyi Mawu nyɔ lɔ do alɔ̀ mɛ. 18 Le gaxoxo ɖekɛ lɔ mɛɔ, míkpɔtɔ adonɔ gbe ɖaɖa nɔ Mawu hweɖekpokpuinu le enushianu mɛ le gbɔngbɔn lɔ mɛ yí awanɔ gbedoɖa koɖo kwifan hamɛhamɛwo pleŋ. Eyi taɖo, míkpɔtɔ anɔnɔ zanŋte yí aɖekɔ kuku do nu nɔ amɛkɔkɔɛ lɔwo pleŋ mamimami. 19 Mídonɔ gbe ɖaɖa do ta nɔ nyɛ can, keŋ nɔ nake aglan axo nuxuɔ, makpɔ enyɔwo anukɔ. Eyi masun ji axonɔ nuxu koɖo edɔngbegbe nɔ ŋnukɔ enyɔwlawla kɔkɔɛ eŋɛnywi lɔ tɔ nɔ amɛwo. 20 Mawu yí dɔŋ mɔ nyɛ le nu eŋɛnywi lɔ, ecɛ yí dɔ taɖo wosɔ awlɛgawo blaŋ. Mído gbe ɖaɖa nɔ Mawu do ta nɔŋ keŋ nɔ magbe dɔn yí axo nuxu so eŋɛnywi lɔ nu shigbe lé ŋɖo awɛ do nɛ.
21 Vɔ nɔ míwo can míanya lé ŋle do koɖo lé enuwo yikɔ do nɔŋ ɔ, mìwo nɔvi vevi Tishiku ci yí nyi edɔwatɔ egbejinɔtɔ le Axwetɔ lɔ mɛ ava yí anu enyɔwo pleŋ nɔ mí. 22 Susu cɛ koŋ yí dɔ ŋɖuikɔ ɖaɖa mí nɔ míanya lé mìle do yí agbefa akɔn nɔ mí.
23 Nɔviwo, Mawu ci yí nyi Eda koɖo Axwetɔ Yesu Kristo le na fafa mí yí awɛ yí míalɔnnɔ míwonɔnɔwo yí agbeɖo xɔse. 24 Mawu le wa xomɛvu gangan nɔ mɛ ciwo pleŋ yí lɔn mìwo Xwetɔ Yesu Kristo nyɔnɔnwimɛtɔ.