Wema Amɛvetɔ ci Woŋwlɛ Ðaɖa Korɛntitɔwo

7 Eyi taɖo exlɔ veviwo, ci Mawu ɖo egbe cɛwo nɔ mìɔ, mìaklɔ enu ciwo yí xonɔ ɖyi gbaza koɖo gbɔngbɔn so mìwoɖekiwo nu yí ale agbla jekɔ keŋ amɛ́ vɛ keŋkeŋ le Mawu vɔnvɔn mɛ.

2 Mína texwe mì do míwo jiwo mɛ. Mìdewa vɔn do mɛɖe o, mìdedahɛn nu le mɛɖe nu o, mìdetafu mɛɖe do o. 3 Ŋdenukɔ nyɔ cɛ keŋ asɔ do hwɛ mí o, ɖo ŋnu vayi sa mɔ míwo nu le eji mɛ nɔ mì sɔyi ekugbe agbegbe. 4 Ŋvoŋ fɛɛ yí le nuxu xokɔ nɔ mí, ŋsɔ mí sɔ yikɔ go sugbɔ. Ŋkpɔ akɔnfɛ sugbɔ, ŋkpɔkɔ jijɔ manumanu le mìwo funkpekpewo pleŋ mɛ.

5 Le nyɔnɔnwi mɛ ci mìvaɖo Maseduani ɔ, mìdevoŋ ɖeeɖe o,* ɖo wole aya dokɔ nɔ mì le enuwo pleŋ mɛ, wofɔn gu yí le ahwa wakɔ koɖo mì yí vɔnvɔn le mì mɛ. 6 Vɔ Mawu ci yí fanɔ akɔn nɔ mɛ ciwo yí gbɔjɔ wɛ yí elɛ vava Titu tɔ fa akɔn nɔ mì. 7 Denyi yi vava ɖekɛ yɔ o, vɔ lé mífa akɔn ni do nyi ŋci yí fa akɔn nɔ mì hɛnnɛ, énu nɔ mì mɔ míwo jikɔ veviɖe mɔ yewoakpɔŋ yí le vevi sekɔ do ŋnu yí sɔ ɖe le ji nɔŋ veviɖe; éna yí eji jɔŋ sugbɔ.

8 Nɔ wema ci ŋŋwlɛ ɖaɖa mí na yí míci ŋshishi mɛ can ɔ, deve nɔŋ o. Nɔ éve nɔŋ doŋkɔ sa can ɔ, (ŋkpɔ mɔ wema ci ŋŋwlɛ ɖaɖa mí na yí míci ŋshishi mɛ, vɔ na nɔ hwenu kleŋ ɖe yɔ) 9 eji jɔkɔŋ yɛ, denyi ci ena yí míci ŋshishi mɛ taɖo yɔ o, vɔ ci ena yí míci ŋshishi mɛ keke yí trɔ ji mɛ yɔ. Ðo míci ŋshishi mɛ sɔgbe koɖo Mawu dro keŋ nɔ mìŋgbewa ŋɖe yí asɔ dahɛn nu le mí nu o. 10 Nɔ woci ŋshishi mɛ sɔgbe koɖo Mawu droɔ, éna yí wotrɔnɔ ji mɛ keŋ akpɔ hwlɛngan; eyi devavenɔ amɛ nu o, vɔ nɔ woci ŋshishi mɛ sɔgbe koɖo lé xexe lɔ jijiɛ doɔ, éhɛnnɔ eku vɛ. 11 Ci míci ŋshishi mɛ sɔgbe koɖo Mawu dro ɖe, míkpɔ nyɔna gangan ci yí to so mɛ ɖa! Ɛɛ, mídasɛ mɔ yewomɛ́, ɛɛ, enudɔndɔnwawa ve mí nu, ɛɛ, vɔnvɔn lé mí, ɛɛ, míɖo edro veviɖe, ɛɛ, ezo le mí mɛ, ɛɛ, mídra enu ci yí dahɛn do; le enuwo pleŋ mɛɔ, mídasɛ mɔ yewomɛ́* le enyɔ cɛ mɛ. 12 Ci ŋŋwlɛ nu ɖaɖa míɔ, denyi mɛ ci yí je agɔ alo mɛ ci woje agɔ do ŋci ŋŋwli o, vɔ ŋŋwli keŋ akpɔ mɔ míadasɛ le Mawu ŋmɛ nyao mɔ, yewoji veviɖe mɔ yewoaɖo to mì ma. 13 Eyi dɔ taɖo mìkpɔ akɔnfɛ.

Vɔ sɔ kpe nɔ akɔnfɛ ci mìkpɔɔ, eji jɔjɔ mì sugbɔ ci mìkpɔ mɔ eji jɔjɔ Titu, ɖo mí pleŋ mífa akɔn ni.* 14 Ðo nɔ ŋsɔ mí sɔ yi go le Titu gbɔɔ, eŋ dakpɛnŋ ɖeeɖe o, vɔ shigbe lé enyɔ ciwo pleŋ mìnu nɔ mí nyi nyɔnɔnwi nɛɔ, ahanke lé mìsɔ mí sɔ yi go le gbɔ nyi nyɔnɔnwi hɛnnɛ nɛ. 15 Nɛnɛke, nɔ éɖo ŋwi lé mí pleŋ senɔ tonu do koɖo lé míxɔɛ koɖo bubu sɔ kpe nɔ vɔnvɔn sugbɔ doɔ, lɔnlɔn ci eɖo nɔ mí gangannɔ doji. 16 Eji jɔkɔŋ mɔ natɛnŋ agbe dɔn do mí nu le enuwo pleŋ mɛ.