Wema Ŋkɔtɔ ci Woŋwlɛ Ðaɖa Tɛsalonikitɔwo

3 Eyi taɖo ci mìle te keke egloɔ, mìkpɔ mɔ yɛanyɔ wu nɔ mìci Atɛni mìwoɖekɛwo. 2 Eyi mìdɔ Timɔte ɖaɖa, ényi mìwo nɔvi ci yí wakɔ sɛnsɛndɔ nɔ Mawu* yí drakɔ eŋɛnywi ci yí kuso Kristo nu, ádo ŋsɛn mí yí agbefa akɔn nɔ mí keŋ nɔ míwo xɔse asɛnŋ 3 nɔ cukaɖa cɛwo ŋgbevahunhun mɛɖe o. Ðo míwoŋtɔwo mínya mɔ mìdatɛnŋ aze nɔ efunkpekpe cɛ hanciwo o. 4 Hwenu mìle mí gbɔɔ, mìnunɔ nɔ mí mɔ mìato cukaɖawo mɛ, eyi enu ci yí jɔ nɛ shigbe lé ele nyanya mɛ nɔ mí nɛ. 5 Eyi taɖo ci ŋle te keke egloɔ, ŋdɔ amɛ ɖaɖa keŋ akpɔ lé míle gbeji do, ɖo Amɛdokpɔtɔ lɔ tɛnŋ vate mí kpɔ yí edɔ ci mìwa tɛnŋ vatrɔ enugbali.

6 Vɔ yinɛ yí Timɔte so le mí gbɔ yí vaɖo mì gbɔ yɛ nɛ, éva nu enyɔnywiwo nɔ mì so egbejinɔnɔ koɖo lɔnlɔn míwotɔ nu. Émɔ míwokpɔtɔ ɖokɔ ŋwi mì kpɔ veviɖe gashiagamɛ yí jijiɛ mɔ yewoakpɔ mì shigbe lé mìwo can jijiɛ mɔ mìakpɔ mí nɛ. 7 Eyi taɖo nɔviwo, egbejinɔnɔ míwotɔ dɔ yí mìkpɔ akɔnfɛ ci mìle vevisese* koɖo cukaɖawo mɛ can. 8 Ci míle ete sɛnsinɖe le Axwetɔ lɔ mɛɔ, ŋsɛn* gbetrɔ yí ɖo mì mɛ. 9 Mína yí eji jɔkɔ mì sugbɔ le ŋkɔ nɔ mìwo Mawu keke mìdenya lé mìado akpe lɔ nɔ Mawu do o. 10 Mìfannɔ kwi veviɖe ezan koɖo kede keŋ atɛnŋ akpɔ mí ŋmɛŋmɛ yí asɔ enu ciwo yí hwedo míwo xɔse sɔ jo nɔ mí.

11 Mìwo Mawu ci yí nyi Eda ŋtɔ koɖo mìwo Xwetɔ Yesu le wɛ nɔ mìava mí gbɔ. 12 Gbesɔwu hunnɔɔ, Axwetɔ lɔ le wɛ nɔ míalɔn míwonɔnɔwo koɖo mɛbuwo doji shigbe lé mìwo can mìlɔn mí sugbɔ nɛ, 13 keŋ nɔ míasɛnŋ* yí wodakpɔ afɛn ɖe le mí nu o yí míale kɔkɔɛɖe le ŋkɔ nɔ mìwo Mawu ci yí nyi Eda hwenu yí mìwo Xwetɔ Yesu ava koɖo yi mɛkɔkɔɛwo pleŋ.