Wema Amɛvetɔ ci Woŋwlɛ Ðaɖa Korɛntitɔwo
1 Enyɛ Pɔlu, ŋnyi apotru Kristo Yesu tɔ to Mawu dro ji. Nyɛ koɖo mìwo nɔvi Timɔte yí ŋwlɛkɔ wema cɛ ɖaɖa Mawu hamɛ ci yí le Korɛnti koɖo amɛkɔkɔɛ ciwo pleŋ yí le Akayi.
2 Mìwo Da Mawu koɖo Axwetɔ Yesu Kristo le wa xomɛvu gangan nɔ mí yí agbena fafa mí.
3 Kanfukanfu nɔ Mawu ci yí nyi Eda nɔ mìwo Xwetɔ Yesu Kristo, Eda ci yí ɖɔ koɖo ŋshishikuku yí gbenyi akɔnfafawo pleŋpleŋ Mawu. 4 Mawu fanɔ akɔn nɔ mì le mìwo cukaɖawo* pleŋ mɛ. Akɔnfɛ ci mìxɔnɔ so Mawu gbɔ na mìsun ji yí fanɔ akɔn nɔ mɛbuwo nɔ wotokɔ cukaɖa* ɖekpokpui mɛ. 5 Ðo shigbe lé mìkpekpeɛ fun sugbɔ do Kristo ŋci nɛɔ, ahanke akɔnfafa ci mìxɔkɔ to Kristo ji can sukɔgbɔ doji nɛ. 6 Mìtotoɔ cukaɖawo mɛ keŋ nɔ míakpɔ akɔnfafa koɖo hwlɛngan. Nɔ wofa akɔn nɔ mìɔ, míwo can míakpɔ akɔnfafa hɛnnɛ yí akpedo mí nu míado ji le efun ciwo hanci mìwo kpekɔ mɛ hɛnnɛ. 7 Mìkando mí ji pleŋpleŋ, ɖo mìnya mɔ ci míkpekpeɛ fun shigbe mìwo nɛɔ, woafa akɔn nɔ mí shigbe lé wofa akɔn nɔ mìwo can nɛ.
8 Ðo nɔviwo, mìdeji mɔ mìawla efun ciwo mìkpe le Azi kan mɛ do mí o. Wodo aya nɔ mì keke ewugan mì yí mìdenya mɔ mìagan kpetii o. 9 Le nyɔnɔnwi mɛɔ, éwa nɔ mì shigbe mɔ woso eku kojo nɔ mì hannɛ keŋ nɔ mìŋgbekando mìwoɖekiwo ji o, vɔ mìakando Mawu ci yí fɔnnɔ amɛ so ku ji. 10 Eyɛ yí hwlɛn mì gan le eku gangan ŋtɔ́ mɛ. Ágbehwlɛn mì gan ke, eyi mìkando ji mɔ ákpɔtɔ ahwlɛnhwlɛn mì gan. 11 Míwo can míatɛnŋ akpedo mì nu yí ado gbe ɖaɖa do ta nɔ mì. Eyi nɔ amɛ sugbɔ do gbe ɖaɖaɔ, woakpedo mì nu yí anyi ɖoŋci nɔ gbedoɖa cɛwo. Ecɛ adɔ yí amɛ sugbɔ ado akpe do kpekpedonu cɛ ci mìxɔ ŋci.
12 Enu ci mìsɔ yikɔ go ke, mìwo yexa mɛ̀, ɖo le xexe cɛ mɛ, taŋtaŋ le míwo gbɔɔ, mìnɔ agbe mɛmi yí esɔgbe koɖo nyɔnɔnwi ci yí so Mawu gbɔ, mìdenɔ agbe esɔ koɖo xexe lɔ mɛ nunya o, vɔ mìnɔ agbe esɔ koɖo xomɛvu gangan Mawu tɔ. 13 Mìdeŋwlɛkɔ ŋɖe nɔ mí sɔ zeto enu ci míatɛnŋ ahlɛn* yí agbemɔŋje mɛ nu o yí ŋkando ji mɔ míakpɔtɔ amɔnɔŋje ŋcɛwo mɛ petii* 14 shigbe lé míwo can mímɔŋje mɛ keke sɔ je fiɖe nɛ mɔ, míasɔ mì sɔ yi go shigbe lé mìwo can mìasɔ mí sɔ yi go le mìwo Xwetɔ Yesu ŋkeke lɔ ji nɛ.
15 Eyi taɖo ci ŋkando ji ahan ɔ, ŋji sa mɔ nava mí gbɔ doŋkɔ keŋ nɔ eji agbejɔ mí zevetɔ.* 16 Ðo ŋji sa mɔ nɔ ŋvayikɔ Maseduani ɔ, mavayɔ mí kpɔ. Eyi nɔ ŋtrɔ so Maseduani ɔ, magbeto mí gbɔ, eyi hwenu naso kpe Ʒude ɔ, míaɖe afɔnu ti nɔŋ. 17 Ci ŋdrɔɛ ahan sa ɖe, ɖɔkui enyi yí ŋɖɔkɔa? Alo ŋdrɔkɔ enuwo mɔ nawa shigbe lé agbetɔ bunɔ tamɛ kpɔ nɛ keŋ anu mɔ “Ɛɛ, ɛɛ” yí sabaa mamɔ “Oo, ooa”? 18 Vɔ ci mìkando Mawu jiɔ, enyɔ ci mìnu nɔ mí datɛnŋ anyi “Ɛɛ” gan yí agbenyi “Oo” o. 19 Ðo Mawu Vi Yesu Kristo ci nyɔ Silvɛn,* Timɔte koɖo nyɛŋtɔ nu nɔ mí denyi “Ɛɛ” gan yí gbenyi “Oo” o, vɔ “Ɛɛ” nyinɔ “Ɛɛ” nɔ yɛ hweɖekpokpuinu. 20 Ðo nɔ Mawu gbeɖuwo gbesugbɔ do ɖe can ɔ, wonyi “Ɛɛ” to eyɛ ji. Eyi taɖo to eyɛ ji hɛnnɛɔ, wonunɔ mɔ “Amɛn” nɔ Mawu keŋ nɔ mìakanfui. 21 Vɔ Mawu yí nyi mɛ ci yí ɖo kpe yi ji mɔ míwo koɖo mìwo nyi Kristo tɔ, eyi lɔ ke yí gbeshi ami nɔ mì. 22 Ésɔ enu do jeshi mì hɛnnɛ yí sɔ gbɔngbɔn kɔ do mìwo jiwo mɛ yí enyi kpeɖoji nɔ ŋci yí avava.
23 Ŋdeji mɔ míase vevi o, eyi taɖo ŋdeva Korɛnti hɔɖo o; Mawu ŋtɔ nya mɔ nyɔnɔnwi yí ŋnukɔ. 24 Denyi kpɔ mɔ mìɖukɔ ega do míwo xɔse ji yɔ o, vɔ mìwakɔ edɔ doju koɖo mí nɔ míakpɔ jijɔ, ɖo xɔse ci míɖo yí na míle ete.