Wema Amɛvetɔ ci Woŋwlɛ Ðaɖa Korɛntitɔwo
11 Nɔ ŋvaxoxoɔ nuxu ciwo yí da hwɛɖeka can ɔ, ŋji mɔ míado ji axɔɛ ahan. Mído ji yí xɔɛkɔ ahan vɔ hɛnnɛ. 2 Ŋhwankɔŋ do ta nɔ mí shigbe lé Mawu hwannɔŋ nɛ,* ɖo ŋsɔ mí sɔ ɖo gbe mɔ míaɖe ŋsu ɖeka, eyi nyi Kristo. Eyi ŋji mɔ nasɔ mí sɔ dasɛ ni shigbe cugbejɛ lealɔji* nɛ. 3 Vɔ ŋvɔnkɔ mɔ, shigbe lé edan lɔ zan ayexa yí ble Ɛva nɛɔ, étɛnŋ vadahɛn míwo susuwo yí míate so nyɔnɔnwitoto koɖo alɔjinɔnɔ* ciwo yí ɖo anyi Kristo tɔ gbɔ. 4 Ðo nɔ mɛɖe vaɖekɔ kunu so Yesu bu ɖe nu to akpo nɔ ci nyɔ mìnu nɔ mí alo éhɛn gbɔngbɔn bu ɖe vɛ to akpo nɔ ci míxɔ alo évanukɔ eŋɛnywi bu ɖe to akpo nɔ ci míxɔɔ, míɖe blɛ yí xɔnɔ mɛ ŋtɔ́ yɛ. 5 Ele han gan, ŋdekpɔ mɔ apotru gangan míwotɔ lɔwo nyɔ wuŋ le enu kuɖeka kpetii mɛ o. 6 Vɔ nɔ ŋdebi le nuxuxoxo mɛ can ɔ, nunya dewa ɖe yí hwedoŋ o. Le nyɔnɔnwi mɛɔ, mìdasɛ ecɛ nɔ mí petii to emɔwo pleŋ ji le enuwo pleŋ mɛ.
7 Alo ci ŋsɔ nyɛɖeki hwe yí wona kɔkɔ míwo yí ŋgbedra eŋɛnywi lɔ nɔ mí koɖo jijɔ yí ŋdexɔ ŋɖe ɖe, agɔ ŋjea? 8 Ŋlɔn yí hamɛ buwo do alɔ̀ŋ yí ele shigbe ŋtafu wo yí xɔ enuwo le wo shi nɛ keŋ asɔ wa sɛnsɛndɔ nɔ míwo. 9 Ci ŋle mí gbɔɔ, enuwo wudoŋ, gan ŋdenyi agban nɔ mɛɖekɛ le mí mɛ o, ɖo nɔviwo so Maseduani yí va yí hɛn enuwo vɛ nɔŋ gbiŋ yí sɔ kpɔ anyi ʒanwo gbɔ. Ɛɛ, le enuwo pleŋ mɛɔ, ŋdevanyi agban nɔ mí o yí nakpɔtɔ awɛwɛ ahan. 10 Nɔ Kristo nyɔnɔnwi lɔ kpɔtɔ le ŋmɛ duuɔ, ŋdavami yɛ sɔsɔ yi go le Akayi ju lɔ pleŋ mɛ o. 11 Nyi yí taɖoɔ? Ci ŋdelɔn mí taɖo yɔa? Mawu nya mɔ ŋlɔn mí.
12 Mɛɖewo le ego yikɔ mɔ, yewonyi apotruwo shigbe mìwo nɛ. Eyi taɖo, nakpɔtɔ awakɔ enu ci ŋwakɔ gashiagamɛ keŋ nɔ woŋgbevakpɔ susu ɖekpokpui ci woasɔ yi go o. 13 Ðo nɛnɛmunɔwo nyi apotru ŋsukantɔwo, edɔwatɔ ciwo yí blenɔ amɛ yí le enu wakɔ shigbe mɔ wonyi apotru Kristo tɔwo hannɛ. 14 Dekpaca mì ɖeeɖe o, ɖo Satana ŋtɔ can sɔ yiɖeki trɔnɔ klɛnklɛn dɔla. 15 Eyi taɖo nɔ yi dɔwaviwo can sɔ wowoɖekiwo trɔkɔ enujɔjɔɛwawa dɔwaviwoɔ, dekpaca amɛ ɖeeɖe o, vɔ enu ci yí akpe wo le vɔvɔnu asɔ koɖo edɔ ciwo yí wowakɔ.
16 Ŋgbenuikɔ ke: Mɛɖe ŋgbebukɔ mɔ ŋnyi xlunɔ o, vɔ nɔ míbuikɔ ahan can ɔ, míxɔɛ nɔŋ ahan keŋ nɔ nyɛ can matɛnŋ ayi go hwɛɖeka. 17 Enyɔ cɛ ci ŋnukɔ yɛɔ, ŋdenuikɔ shigbe Axwetɔ lɔ tɔ hannɛ o, vɔ ŋnuikɔ shigbe mɛ ci yí nyi xlunɔ yí le ego yikɔ yí kando yiɖeki ji ɖoɖu hannɛ. 18 Ci amɛ sugbɔ yikɔ go sɔgbe koɖo gbaza lɔɔ,* nyɛ can nayi go hɛnnɛ. 19 Ci “mínya ŋɖɛ” ɖoɖuɔ, mísɔ jijɔ xɔkɔ xlunɔwo. 20 Le nyɔnɔnwi mɛɔ, nɔ mɛɖe sɔ mí sɔ wa hwashi, nɔ mɛɖe xɔ míwo dɔkunuwo, nɔ mɛɖe xɔ míwo nuwo le mí shi, nɔ mɛɖe yi go le mí nu yí mɛɖe xo tomɛ nɔ míɔ, mído ji yí xɔɛni ahan.
21 Ŋkpɛn enyi nɔ mì mɔ ŋnukɔ nyɔ cɛ, ɖo ewa shigbe mɔ mìwakɔ nu shigbe kleklitɔnɔwo nɛ.
Vɔ nɔ mɛbuwo wakɔ nu edɔngbegbetɔɔ, (ŋxokɔ nuxu shigbe sukunɔ nɛ) nyɛ can nyɛŋwakɔ nu edɔngbegbetɔ hɛnnɛ. 22 Ebretɔwo wonyia? Nyɛ can ŋnyi Ebretɔ hɛnnɛ. Izraɛliviwo wonyia? Nyɛ can ŋnyi Izraɛlivi hɛnnɛ. Abrahamu viviɛwo wonyia? Nyɛ can ŋnyi viviɛ hɛnnɛ. 23 Kristo dɔwaviwo yí wonyia? Ŋɖoɖoɔ ŋci shigbe mɔ mɛ ci tamɛ desɔgbe nɔ nɛ mɔ, ŋnyi yi dɔwavi wu wo: Ŋwa dɔ sɔwu, ŋnɔ gakpa mɛ sɔwu, zenɛni ci woxoŋ ɔ, wodatɛnŋ ahlin o yí eku gliŋ do zenɛniɖe. 24 Zeatɔn yí Ʒuifuwo xoŋ xoxo ɖeka to le 40 mɛ. 25 Woyaŋ zetɔn, woxo kpeŋ zeɖeka, tɔjihun gban doŋ zetɔn, ŋci axu ji ezan koɖo kede ɖeka. 26 Ŋzɔn emɔ zenɛniɖe, enuwo kpeŋ le etɔsasawo ji, enuwo kpeŋ le flafinɔwo lɔ̀ mɛ, enuwo kpeŋ le nyɛŋtɔ mɛwo mɛ, enuwo kpeŋ le jukɔn bu mɛ tɔwo mɛ, enuwo kpeŋ le jugan mɛ, enuwo kpeŋ le zogbeji, enuwo kpeŋ le axu ji, enuwo kpeŋ le nɔvi ŋsukantɔwo mɛ. 27 Ŋwa dɔ sɛnsinɖe yí do egbla sugbɔ, ŋcinɔ alɔnmadɔn zanmɛ blaŋblaŋ, shive cinɔŋ yí shikɔ cinɔŋ, ŋɖuɖu dɛnnɔŋ blaŋblaŋ, vuvɔ wanɔŋ yí enudodowo dɛnnɔŋ.*
28 To akpo nɔ agogbenu cɛwoɔ, nubu li yí ɖenɔ fun nɔŋ ŋkeŋke; eyi nyi mɔ: ŋlonɔ nɔ hamɛ lɔwo pleŋ. 29 Mi yí gbɔjɔ yí ŋdegɔnma gbɔjɔɔ? Mi yí klɛn nu yí ŋdegɔnma do dɔmɛzi sugbɔɔ?
30 Nɔ ŋɖo ayi goɔ, enu ciwo mɛ ŋgbɔjɔ le yí nasɔ yi go. 31 Axwetɔ Yesu Dalɔ ci yí nyi Mawu ci woakanfu sɔyi mavɔmavɔ nya mɔ ŋdele ŋsu kankɔ o. 32 Le Damasi ɔ, ejujikpɔtɔ ci efyɔ Aretasu kpa nɔ cɔkɔ Damasitɔwo jugan lɔ keŋ aleŋ, 33 vɔ wokɔŋ do kishi ɖeka mɛ yí sɔŋ toto jugan lɔ gli flɛsɛ ɖeka nu yí ɖyiɖyiŋ je nyigban, eyi egliŋ do.