Wema Ci Ʒaki Ŋwlɛ
2 Nɔvinyɛwo, míxɔ mìwo Xwetɔ Yesu Kristo ci wokanfu lɔ ji se gbɔxwe yí gbetrakɔ amɛ mɛa? 2 Ðo nɔ mɛɖe do alɔgavi shika tɔ yí le awu nyakpɔkpɔ mɛ yí va bɔbɔ le mí gbɔ yí wamɛnɔ ɖe can va yí le awu xoɖyi mɛ ɖe, 3 mídonɔ bubu mɛ ci yí do awu nyakpɔkpɔ lɔ nu yí nunɔ mɔ, “Nɔ̀ nyinɔnɔ do texwe nywi cɛ,” gan yí anu nɔ wamɛnɔ lɔ yɛ mɔ, “Eɔ le nɔ te” alo, “Nɔ̀ nyinɔnɔ do anyi fɔɖojinu gbɔa”? 4 Nɔ ényi ahan ɖe, denyi mama mídokɔ míwonɔnɔwo mɛ ahan yí trɔ kojoɖotɔ ciwo yí sɔnɔ gbeta vwinwo ba?
5 Nɔvinyɛ veviwo, míɖo toŋ. Mawu decan mɛ ciwo yí xexe lɔ kpɔnɔ mɔ wonyi wamɛnɔwo nɔ woanyi dɔkunɔwo le xɔse mɛ yí aɖu cinɔ nɔ Fyɔɖuxu ci gbe eɖo nɔ mɛ ciwo yí luin ba? 6 Vɔ mígbali wamɛnɔwo. Denyi dɔkunɔwo yí tanɔfu mí do yí kplɔnɔ mí yi kojoɖoxuwo ba? 7 Wodenunɔ enyɔkpotuwo do ŋkɔ nywi ci wona mí nu ba? 8 Enuŋwlɛŋwlɛ lɔ nu mɔ, “Èɖo alɔn ao kpena shigbe eoŋtɔ nɛ.” Ecɛyɛ nɔ míwakɔ do efyɔse cɛ jiɔ, anyi míwɛkɔ nywiɖe. 9 Vɔ nɔ míkpɔtɔ trakɔ amɛ mɛɔ, anyi míle nuvɔn wakɔ yí ese lɔ dokɔ hwɛ mí* mɔ mínyi agɔjetɔwo.
10 Nɔ mɛɖe wakɔ do Ese lɔ pleŋ ji gan yí da le ese ɖeka jiɔ, anyi éda le wo pleŋ ji. 11 Ðo mɛ ci yí nu mɔ, “Ŋgbewa hashi o,” lɔ ke yí gbenu mɔ, “Ŋgbewu amɛ o.” Ecɛyɛ nɔ dèwa hashi o gan yí wu amɛɔ, anyi èda le ese lɔ ji. 12 Míkpɔtɔ axokɔ nuxu yí awakɔ nu shigbe mɛ ciwo yí woasɔ jukɔn ci yí le vovo mɛ se* sɔ ɖo kojo nɔ nɛ. 13 Ðo mɛ ci yí dekunɔ ŋshishi nɔ amɛɔ, wodaku ŋshishi ni nɔ woɖokɔ kojo ni o. Ŋshishikuku ɖunɔ kojoɖoɖo ji.
14 Nɔvinyɛwo, nɔ mɛɖe nukɔ mɔ yeɖo xɔse gan yí dedadasɛ yi to yi dɔwawawo ji ɖe, nyɔna ci yí le mɛɔ? Xɔse ŋtɔ́ atɛnŋ ahwlin gan ba, alo? 15 Nɔ enudodo dele nɔviŋsuwo alo nɔvinyɔnuwo shi o* yí gbeɖeka ŋɖuɖu desunnɔ wo o, 16 gan yí mɛɖe le mí mɛ yí nu nɔ wo mɔ, “Míyi le fafa mɛ, míakpɔ awu ado yí aɖu nu nywiɖe,” vɔ yí mídesɔ enu ci wowo lankpu ʒan sɔ jo nɔ wo ɖe, nyɔna ci yí le mɛɔ? 17 Ahanke xɔse ci nu edɔwawawo debɔdo nyi enukuku nɛ.
18 Vɔ mɛɖe tɛnŋ nu mɔ: “Èɖo xɔse yí nyɛŋɖo edɔwawawo. Dàsɛ ao xɔse ci nu edɔwawawo debɔdo nɔŋ nɔ madasɛ anyi xɔse to anyi dɔwawawo ji.” 19 Èxɔɛ se mɔ Mawu kuɖeka yí li, alo? Èwɛkɔ nywiɖe. Gbɔngbɔnvɔnwo can xɔɛ se yí hunhunnɔ. 20 Oo, eo ŋɖɛmanyatɔ, èji mɔ yeanya mɔ xɔse ci nu yí edɔwawawo debɔdo nyi enugbalia? 21 Denyi edɔ ci mìwo da Abrahamu wa yí na taɖo woyɔɛ mɔ amɛjɔjɔɛ ba? Ɛɛ, ci esɔ eviɛ Izaki na do avɔnsakpe lɔ ji godu yí woyɔɛ mɔ amɛjɔjɔɛ. 22 Èkpɔ mɔ xɔse yitɔ koɖo yi dɔwawawo zɔnkɔ doju yí edɔ ciwo ewa na yí xɔse yitɔ le blebu. 23 Eyi enu ci woŋwlɛ ɖɛ vamɛ mɔ: “Abrahamu xɔ Yehowa* ji se yí ekpɔɛ do amɛjɔjɔɛ ji,” eyi woyɔɛ mɔ Yehowa* xlɔ.
24 Míkpɔ mɔ edɔ ci amɛ wa nu yí wokpɔ do yí yɔɛ mɔ amɛjɔjɔɛ yí denyi xɔse ci eɖo ɖekɛ nu yí wokpɔ do o. 25 Denyi ahanke wokpɔ do edɔ ciwo yí Raxabu sakabo lɔ wa nu yí yɔ yɛ can mɔ amɛjɔjɔɛ nɛ ba? Ɛɛ, ci ewa ɖaŋ xɔ amɛdɔdɔ lɔwo yí kpedo wo nu yí woto emɔ bu yí shi taɖo Mawu yɔɛ mɔ amɛjɔjɔɛ. 26 Le nyɔnɔnwi mɛ shigbe lé lankpu ci mɛ gbɔngbɔn dele nyi enukuku nɛɔ, ahanke xɔse ci nu edɔwawawo debɔdo can nyi enukuku nɛ.