Wema Ci Ʒaki Ŋwlɛ
1 Enyɛ Ʒaki ci yí nyi hwashi nɔ Mawu koɖo Axwetɔ Yesu Kristo yí ŋwlɛkɔ wema cɛ ɖaɖa akɔta 12 ciwo yí gban kpedo lɔwo:
Ŋdo gbe nɔ mí!
2 Nɔvinyɛwo, eji le jɔ mí sugbɔ nɔ mítokɔ tetekpɔ hamɛhamɛwo mɛ, 3 ɖo mínya mɔ xɔse míwotɔ ci wodo kpɔ ahan ahɛn ejidodo vɛ. 4 Vɔ mítashi ejidodo nɔ aɖegbɔ yi dɔ keŋ nɔ míatɛnŋ asɔgbe yí anyɔ le enushianu mɛ yí ŋɖe dahwedo mí o.
5 Eyi taɖo, nɔ nunya hwedo mɛɖe le mí mɛɔ, le kpɔtɔ abiɔbiɔ Mawu nɔ ani, ɖo énanɔ nu amɛwo pleŋ xomɛvutɔ yí dedonɔ hwɛ* amɛ o. 6 Vɔ le kpɔtɔ abiɛkɔ koɖo xɔse, ŋgbexo nu kpɔ ɖeeɖe o, ɖo mɛ ci yí xokɔ nu kpɔ le shigbe axublabla ci jihɔn xo yikɔ yí gbɔgbɔ nɛ. 7 Le nyɔnɔnwi mɛɔ, mɛ ŋtɔ́ ŋgbekpɔkɔ emɔ mɔ yeaxɔ ŋɖekɛ le Yehowa* gbɔ o. 8 Susu zɛnnɔ ve ni yí delinɔ gwi le enu ciwo pleŋ ewanɔ mɛ* o.
9 Vɔ nɔvi ci yí nyi wamɛnɔ le kpɔ jijɔ* nɔ ci wogingin 10 yí eji le jɔ dɔkunɔ nɔ ci woɖi kpɔtɔ, ɖo ávayi shigbe sese ci yí le boji nɛ. 11 Shigbe lé nyidɔn venɔ gannaganna yí ɖunɔ egbe yí efiɔnnɔ yí sese yitɔwo juinni yí degbenyanɔ kpɔkpɔ nɛɔ, ahanke dɔkunɔ can agu le yi dɔkunu ciwo do ekplɔ mɛ nɛ.
12 Eji jɔnɔ mɛ ci yí kpɔtɔ dodoɔ ji le tetekpɔwo mɛ, ɖo ci yi nu vakpe nɔ Mawu ɔ, áxɔ agbe fyɔkuku lɔ ci Yehowa* sɔ ɖo gbe nɔ mɛ ciwo yí kpɔtɔ luinkɔ. 13 Nɔ mɛɖe le tetekpɔ mɛɔ, ŋgbenu mɔ: “Mawu yí teteɛŋ kpɔ o.” Ðo wodatɛnŋ asɔ enuvwinwo te Mawu kpɔ o yí yiŋtɔ detenɔ mɛɖe kpɔ hɛnnɛ o. 14 Vɔ droamu mɛɖekaɖeka tɔ yí duinni yí blini* do tetekpɔ mɛ. 15 Eyi nɔ edro lɔ sɛnŋ ɔ, édɔ yí mɛ lɔ wanɔ nuvɔn;* eyi nɔ éwa nuvɔn ɖegbɔɔ, ecɛ hɛnnɔ eku vɛ.
16 Nɔvinyɛ veviwo, míŋgbelɔn woable mí domɛ o. 17 Enunana nywiwo pleŋ koɖo enunana ciwo pleŋ nu afɛn dele so jeŋkwi mɛ, woso jeŋkwi mɛ klɛnklɛnwo Da gbɔ, mɛ ci yí deɖɔnɔli alo trɔnɔ shigbe lé kpɔli trɔnɔ nɛ o. 18 Edro yitɔ yí nyi mɔ yeato nyɔnɔnwi nyɔ lɔ ji yí aji mì keŋ nɔ mìavale shigbe ekusɛnsɛn ŋkɔtɔwo hannɛ nɔ enu ciwo yí ewa.
19 Nɔvinyɛ veviwo, mínya nyɔ cɛ: Mɛshiamɛ ɖo ale gbesɔsɔ aɖonɔ to blaŋ, daxonɔ nuxu blaŋ o yí dadonɔ dɔmɛzi blaŋ hɛnnɛ o, 20 ɖo agbetɔ dɔmɛzi dewanɔ enu ci yí le jɔjɔɛɖe le ŋmɛ nɔ Mawu o. 21 Eyi taɖo míɖe enuxoɖyixoɖyi ɖekpokpui koɖo enudɔndɔnwawa ɖekpokpui swi yí asɔ xomɛfafa xɔ enyɔ ci wodo do mí* mɛ, ci yí atɛnŋ ahwlɛn mí gan.
22 Vɔ mínyi mɛ ciwo yí wanɔ do enyɔ lɔ ji yí míŋgbenyi enyɔsetɔwo kpoŋ o keŋ nɔ míŋgbesɔ susu trofitrofiwo asɔ blekɔ míwoɖekiwo domɛ o. 23 Ðo mɛɖekpokpui ci yí sekɔ enyɔ lɔ yí dewakɔ do ji le shigbe mɛ ci yí glokɔ yi ŋmɛ kpɔ le weni mɛ nɛ. 24 Églo yiɖeki kpɔ yí ɖedo yí ŋlɔbe mɛ ci ŋmɛ enyi zeɖeka. 25 Vɔ mɛ ci yí glonɔ ese ci yí sɔgbe yí nanɔ vovo mɛ kpɔ yí kpɔtɔ wanɔ do enyɔ ci enu ji denyi enyɔsetɔ ci yí ŋlɔnɔbe enu o, vɔ ényi mɛ ci yí wanɔ do enyɔ lɔ ji yí eji ajɔɛ ci ewakɔ do ji.
26 Nɔ mɛɖe bukɔ mɔ yenyi Mawu sɛntɔ* gan yí delé aɖe yitɔ domɛɔ,* yiŋtɔ* eblekɔ domɛ yí sɛnsɛn yitɔ nyi enugbali. 27 Sɛnsɛn ci yí mɛ́ yí eɖyixoxo ɖe dele nu le ŋmɛ nɔ mìwo Mawu koɖo mìwo Da yí nyi mɔ: woalenɔ bu nɔ nyɔcɔviwo koɖo kposhuwo le wowo funkpekpewo mɛ yí ale bu nɔ amɛɖeki nɔ xexe lɔ ŋgbexo ɖyi amɛ o.