Wema Ci Ʒaki Ŋwlɛ
4 Fini ahwa koɖo evu ciwo yí le mí mɛ soɔ? Denyi míwo gbaza mɛ dro ciwo yí wanɔ vu le mí* mɛ gbɔ yí woso ba? 2 Enu dronɔ mí, vɔ dele mí shi o. Míwunɔ amɛ yí enu cinɔ ŋmɛ nɔ mí, vɔ mídekpɔ yí xɔ o. Míwanɔ vu yí wanɔ ahwa. Dele mí shi o, ɖo mídebiɔnɔ o. 3 Nɔ míbiɔɔ, mídekpɔ yí xɔnɔ o, ɖo susu dɔndɔn mísɔ biɔɛni keŋ atɛnŋ azin nɔ míwo gbaza mɛ drowo.
4 Hashiwatɔwo,* mídenya mɔ nɔ wonyi xlɔ nɔ xexe lɔɔ, anyi wonyi ketɔnɔ nɔ Mawu ba? Eyi taɖo, mɛɖekpokpui ci yí ji mɔ yeanyi exlɔ nɔ xexe lɔ sɔ yiɖeki ɖokɔ ketɔ nɔ Mawu. 5 Alo míbukɔ mɔ gbali yí enuŋwlɛŋwlɛ lɔ nu mɔ: “Enu dronɔ gbɔngbɔn ci yí le mì mɛ veviɖe koɖo ŋbiaa”? 6 Gan xomɛvu ci Ewanɔ gangan wu ŋtɔ́. Eyi taɖo enuŋwlɛŋwlɛ lɔ nu mɔ: “Egoyitɔnɔwo nu dekpenɔ nɔ Mawu o, vɔ éwanɔ xomɛvu gangan nɔ mɛ ciwo yí sɔ wowoɖekiwo hwenɔ.”
7 Eyi taɖo mísɔ míwoɖekiwo hwe nɔ Mawu; vɔ mítrɔkpe Legba, eyi ashi nɔ mí. 8 Míte gogo Mawu yí Mawu ate gogo mí. Míklɔ míwo lɔ̀wo, míwo ciwo nyi nuvɔnwatɔwo yí aklɔ míwo jiwo, míwo ciwo yí susu zɛnnɔ ve nɔ. 9 Mínɔ ŋshishi mɛ, ase vevi yí afan avin. Nukui míwotɔ le trɔ vevisese yí jijɔ míwotɔ le trɔ ŋshishimɛnɔnɔ. 10 Mísɔ míwoɖekiwo hwe le ŋmɛ nɔ Yehowa,* eyi ana kɔkɔ mí.
11 Nɔviwo, mími nuxu xoxo do míwonɔnɔwo nu. Mɛɖekpokpui ci yí xokɔ nuxu do nɔviɛ nu alo ɖokɔ kojo nɔ nɔviɛɔ, éxokɔ nuxu do ese lɔ nu yí ɖokɔ kojo nɔ ese lɔ. Ecɛyɛ nɔ èɖokɔ kojo nɔ ese lɔɔ, dègbewakɔ do ese lɔ ji o, vɔ èvatrɔ kojoɖotɔ. 12 Esenatɔ koɖo Kojoɖotɔ kuɖeka kpaŋ yí li, eyi nyi mɛ ci yí atɛnŋ ahwlɛn amɛ gan yí atɛnŋ agu amɛ swi. Vɔ eo ɖe, mi ènyi yí ɖoɖoɔ kojo nɔ ao kpenaɔ?
13 Ecɛyɛɔ, míɖo toŋ, míwo ciwo yí nunɔ mɔ: “Egbɛ alo esɔ mìayi eju cɛ mɛ yí awa exwe ɖeka le nɔ yí ado ajɔ akpɔ ho,” 14 gan mídenya lé míwo gbe anɔ do esɔ o, ɖo míle shigbe ahun ci yí cunɔ kpiŋ na nɔ hwenu kleŋ ɖe yí sabaa agbeka nɛ. 15 Enyɔ ci míɖo anu taŋ yí nyi mɔ: “Nɔ édro Yehowa* ɔ, mìanɔ agbe awa ŋcɛ alo yiketɔ.” 16 Vɔ mítɛntɛn sugbɔ yí le ego yikɔ. Nuvwin yí egoyiyi ŋtɔ́wo pleŋ nyi. 17 Eyi taɖo, nɔ mɛɖe nya lé woawa enunywi do gan yí dewɛkɔɔ, nuvɔn yí enyi ni.