Wema ci Woŋwlɛ Ðaɖa Ebretɔwo
1 Sasaɔ, Mawu to enyɔnuɖɛtɔwo ji yí xo nuxu nɔ mìwo tɔgbiwo zenɛniɖe to alɔkpa vovovowo ji. 2 Vɔ ecɛyɛ le vɔvɔnu nɔ azan cɛwoɔ, éxo nuxu nɔ mì to Evi lɔ ji, eyɛ ci esɔ nɔ aɖu cinɔ nɔ enuwo pleŋ, eyi ji eto yí wa xexe* lɔ. 3 Eyi nyi kanfukanfu Mawu tɔ, éɖo Mawu nɔnɔmɛ han pɛpɛpɛ yí lé enuwo pleŋ do te ɖɛ to yi nyɔ ci yí ɖo ŋsɛn ji. Ci ena yí mìmɛ́ so mìwo nuvɔnwo mɛ ɖegbɔɔ, énɔ nyinɔnɔ do ɖushi mɛ nɔ Bubutɔ Gangantɔ lɔ le jeŋkwi mɛ. 4 Eyi evale ŋkɔ nɔ mawudɔlawo keke yí xɔ ŋkɔ ci yí nyɔ sesese wu wowotɔ.
5 Le kpɔwɛ mɛ, mawudɔla ci Mawu nu nɔ kpɔ mɔ: “Anyi vi ènyi; egbɛɔ, ŋtrɔ daoɔ”? Alo: “Navanyi eda ni yí yɛavanyi evi nɔŋ ɔ”? 6 Vɔ hwenu egbedɔ Eviɛ ŋkɔtɔ ɖaɖa nyigban jiɔ, énu mɔ: “Mawudɔlawo pleŋ le na bubu yi.”*
7 Énu so mawudɔlawo nu hɛnnɛ mɔ: “Ésɔ yi dɔlawo wa gbɔngbɔnwo yí sɔ yi dɔwaviwo* wa ezoɖewo.” 8 Vɔ énu so Evi lɔ nu mɔ: “Mawu nyi ao fyɔʒinkpin so mavɔ yi mavɔ yí efyɔci ao Fyɔɖuxu lɔ tɔ anyi efyɔci enujɔjɔɛwawa tɔ. 9 Enujɔjɔɛwawa jɔnɔ ji nɔ eo yí enudɔndɔnwawa dejɔnɔ ji nɔ eo ɖeeɖe o. Eyi taɖo Mawu, ao Mawu shi jijɔmi nɔ eo wu ao kpenawo.” 10 Égbenu mɔ: “Oo Axwetɔ, so gɔnmɛjejeɔ, èɖo gɔnmɛɖokpewo nɔ nyigban lɔ yí jeŋkwiwo nyi edɔ ciwo yí èsɔ ao lɔ̀wo wa. 11 Woagu swi; vɔ eoɔ, àkpɔtɔ ali. Wo pleŋ adahɛn shigbe lé awu danahɛn nɛ, 12 àŋwla wo shigbe lé woŋwlanɔ awu lɛgbɛ nɛ; àɖɔli wo shigbe lé woɖɔnɔli awu nɛ. Vɔ eoɔ, èkpɔtɔ le ahan yí vɔvɔnu dali nɔ ao xwewo gbeɖe o.”
13 Vɔ mawudɔla ci enu nɔ kpɔ mɔ: “Nɔ̀ nyinɔnɔ do anyi ɖushi mɛ keke je hwenu nasɔ ao ketɔnɔwo wa afɔɖojinu nɔ eoɔ”? 14 De gbɔngbɔnwo yí wo pleŋ nyi yí li nɔ sɛnsɛndɔ kɔkɔɛ* yí Mawu dɔ wo ɖaɖa nɔ woayi kpedo mɛ ciwo woahwlɛn gan nu ba?