Wema ci Woŋwlɛ Ðaɖa Ebretɔwo
7 Mɛlkisedɛki cɛ nyi Salɛmu fyɔ yí gbenyi Mawu Ejiɖaatɔ vɔnsatɔ, évado go Abrahamu hwecinu eɖu efyɔwo ji yí trɔ gbɔgbɔ yí cu shi ni. 2 Eyi Abrahamu sɔ madowo nɔ enuwo pleŋ jo ni.* Ŋkɔŋkɔtɔɔ, yi ŋkɔ lɔ gɔnmɛ yí nyi “Enujɔjɔɛwawa Fyɔ,” eyi egbenyi Salɛmu fyɔ ci gɔnmɛ yí nyi “Fafa Fyɔ.” 3 Deɖo eda o, kpɔ deɖo enɔ o, wodejeshi yi kannu o, wodenya hwenu woji alo hwenu eku hɛnnɛ o, vɔ wona yí ele shigbe Mawu Vi nɛ, ékpɔtɔ nyi avɔnsatɔ nɔ hwenuwo pleŋ.*
4 Míkpɔ lé ŋsu cɛ anyi amɛvevi do ɖa, eyɛ ci yí blematɔgbi* Abrahamu sɔ madowo nɔ enunywitɔ ciwo yí ekpɔ le ahwagbemɛ sɔ jo nɔ. 5 Nyɔnɔnwi yɔ, Ese lɔ nu nɔ Levi vi ciwo yí wosɔ ɖo avɔnsatɔwo mɔ wo le xɔnɔ madowo le jukɔn lɔ ci yí nyi wowo nɔviwo shi, ci wonyi Abrahamu viviɛwo can. 6 Vɔ ŋsu cɛ ci yí deso wowo kannu mɛ xɔ madowo le Abrahamu shi yí cu shi nɔ mɛ ci woɖo gbewo nɔ. 7 Éze petii mɔ, mɛ ci yí nyi amɛ gangantɔ yí cu shi nɔ amɛ hwɛhwɛtɔ. 8 Levi viwo xɔnɔ madowo, vɔ wokunɔ; gan ŋsu ɖetɔ lɔ ci yí xɔ madowoɔ, Enuŋwlɛŋwlɛ lɔwo ɖo kpe yi ji mɔ yɛle agbe. 9 Eyi woatɛnŋ anu mɔ Levi ŋtɔkpu ci yí xɔnɔ madowo can cu madowo to Abrahamu ji. 10 Ðo tɔgbiɛ dekpɔ ji hwenu Mɛlkisedɛki do go yi o.
11 Ecɛyɛ ɖe, nɔ woatɛnŋ anyi amɛmaɖonuvɔn to avɔnsasadɔ ci Levi viwo wanɔ ji ɖe (ɖo éle Ese ci wosɔ na jukɔn lɔ mɛ ahan), nyi yí taɖo ele mɔ woagbeɖo avɔnsatɔ bu ci nyɔ wonu mɔ yɛle shigbe Mɛlkisedɛki nɛ yí dele shigbe Arɔn nɛɔ? 12 Ðo ci wojikɔ atrɔ lé woanyi avɔnsatɔ doɔ, éle dandan mɛ mɔ woatrɔ Ese lɔ hɛnnɛ. 13 Mɛ ci nu wonu nyɔ cɛwo soɔ, akɔta bu mɛ yí eso yí mɛɖe deso akɔta ŋtɔ́ mɛ kpɔ yí wa dɔ le avɔnsakpe lɔ gbɔ o. 14 Ðo éze gbajɛɛ mɔ mìwo Xwetɔ lɔ so Ʒuda kɔta mɛ, vɔ Moizi denu enyɔ ɖekɛ so avɔnsatɔwo nu mɔ woaso akɔta ŋtɔ́ mɛ o.
15 Eyi ecɛ vaze petii ŋtɔkpu hwenu woɖo avɔnsatɔ bu ci yí le shigbe Mɛlkisedɛki nɛ. 16 Ðenyi kannu ci mɛ eso yí dɔ ele avɔnsasadɔ wakɔ shigbe lé Ese lɔ nui do nɛ o, vɔ enu ci yí dɔ ewɛkɔ yí nyi mɔ éɖo ŋsɛn ci yí nakɔ agbe ci wodatɛnŋ agu swi yi. 17 Ðo wonu so nu mɔ: “Avɔnsatɔ ènyi tɛgbɛɛ shigbe Mɛlkisedɛki nɛ.”
18 Eyi taɖo wote ese xoxwi lɔ yɛ do akpa, ɖo ŋsɛn vɔ ni yí dekpe ŋɖe ji o. 19 Ðo Ese lɔ deɖe nuvɔn swi vɛ keŋkeŋ o, vɔ Mawu na emɔkpɔkpɔ ci yí nyɔ wu mì; eyi to yɛ jiɔ, mìatɛnŋ ate gogui. 20 Ahanke wodeɖo avɔnsatɔ cɛ enumata o 21 (ɖo le nyɔnɔnwi mɛɔ, wodeta nu gbɔxwe yí sɔ mɛɖewo ɖo avɔnsatɔ o, vɔ wota nu gbɔxwe yí sɔ mɛ cɛ yɛ ɖo avɔnsatɔ yí Mɛ ci yí ta nu lɔ nu mɔ: “Yehowa* ta nu yí datrɔ yi susu o,* ‘Avɔnsatɔ ènyi tɛgbɛɛ’”), 22 Yesu vanyi kpeɖoji* nɔ enublabla ci yí nyɔ wu. 23 Gbesɔ kpe niɔ, éle mɔ amɛ sugbɔ anyi avɔnsatɔwo yí akplɔ nɔnɔ do, ɖo wokukuɔ yí wodesɛnŋ wanɔ edɔ lɔ keke asɔyi o, 24 vɔ ci yɛle agbe tɛgbɛɛɔ, mɛɖe datɛnŋ anyi avɔnsatɔ kplɔɛ do o. 25 Eyi taɖo asun ji hɛnnɛ yí ahwlɛn mɛ ciwo yí teteɛ gogo Mawu to ji gan keŋkeŋ, ɖo éle agbe hweɖekpokpuinu yí aɖeɖeɛ kuku do ta nɔ wo.
26 Ésɔgbe mɔ avɔnsatɔ gangantɔ cɛ han le mì shi, egbejinɔtɔ enyi, afɛn ɖekɛ dele nu o, eɖyi dele nu o, éto akpo nɔ nuvɔnwatɔwo, eyi wona kɔkɔ yi yí eyi ji wu jeŋkwiwo. 27 To akpo nɔ avɔnsatɔ gangantɔ cɛwoɔ, deʒan mɔ áwanɔ vɔnsawo ŋkeŋke, áwa do ta nɔ yiŋtɔ nuvɔnwo doŋkɔ yí avawɛ do ta nɔ jukɔn lɔ tɔwo o, ɖo éwa vɔnsa cɛ zeɖeka nɔ hwenu lɔwo pleŋ hwenu esɔ yiɖeki sa vɔn. 28 Ðo Ese lɔ sɔnɔ agbetɔ ciwo yí nyi nuvɔnmɛwo sɔ ɖonɔ avɔnsatɔ gangantɔwo, vɔ enu ci wota le Ese lɔ godu yɛsɔ Evi ci wowa yí enyi amɛmaɖonuvɔn tɛgbɛɛ sɔ ɖo avɔnsatɔ gangantɔ.