Wema ci Woŋwlɛ Ðaɖa Ebretɔwo
8 Ecɛyɛɔ, susu vevi ci yí le enyɔ ci mìnukɔ mɛ ke: Avɔnsatɔ gangantɔ cɛ han le mì shi, eyi enɔ nyinɔnɔ do ɖushi mɛ nɔ Bubutɔ Gangantɔ lɔ fyɔʒinkpin le jeŋkwi mɛ 2 yí wakɔ sɛnsɛndɔ* le kɔkɔɛtɔxu lɔ koɖo avɔnzava ŋtɔŋtɔ ci Yehowa* wa mɛ yí denyi agbetɔ yí wɛ o. 3 Ðo woɖonɔ avɔnsatɔ gangantɔ ɖekpokpui nɔ asɔ enunanawo jonɔ yí agbewanɔ vɔnsawo; eyi dɔ taɖo ele veviɖe mɔ yɛ can ɖo ana ŋɖe. 4 Nɔ nyigban ji eleɔ, danyi avɔnsatɔ o, ɖo amɛwo li vɔ yí sɔ enunanawo jonɔ shigbe lé Ese lɔ nui nɛ. 5 Ŋsu cɛwo wanɔ sɛnsɛndɔ kɔkɔɛ yí enyi kpɔwɛ koɖo kpɔli nɔ jeŋkwi mɛ nuwo shigbe lé Mawu nui do nɔ Moizi hwenu ejikɔ awa avɔnzava lɔ nɛ: Énu mɔ: “Tèkpɔ awa enu lɔwo pleŋ pɛpɛpɛ nɔ asɔgbe koɖo kpɔwɛ ci ŋdasɛ nɔ eo le eto lɔ ji.” 6 Vɔ ecɛyɛɔ, wosɔ sɛnsɛndɔ ci yí nyɔ wu xoxoxo sɔ na Yesu, ɖo ényi gblamɛdradotɔ hɛnnɛ nɔ enublabla ci yí nyɔ sɔwu, gbeɖu nywitɔwo yí wosɔ wa enublabla cɛ le eseɛ mɛ.
7 Nɔ afɛn dele enublabla ŋkɔtɔ nu saɔ, amɛvetɔ daʒan o. 8 Ðo afɛn yí ekpɔ le jukɔn lɔ nu ci enu mɔ: “Yehowa* nu mɔ, ‘Míkpɔ ɖa! Ŋkekewo li yí gbɔgbɔ yí nabla enu yoyu koɖo Izraɛli jukɔn sɔ kpe nɔ Ʒuda jukɔn lɔ.’ 9 Yehowa* gbenu mɔ, ‘Dale shigbe enu ci ŋbla koɖo wowo tɔgbiwo le ŋkeke ci ji ŋle alɔ̀ nɔ wo yí kplɔ wo ti le Eʒipti ju lɔ mɛ nɛ o, ɖo wodewa do enu ci ŋbla koɖo wo ji o, eyi taɖo ŋmi ebu lele nɔ wo.’
10 “Yehowa* nu mɔ, ‘Ðo ecɛ yí nyi enu ci nabla koɖo Izraɛli jukɔn lɔ le ŋkeke ŋtɔ́wo godu. Nasɔ anyi sewo do susu mɛ nɔ wo, naŋwlɛ wo do ejiwo mɛ nɔ wo, eyi nanyi wowo Mawu yí woanyi anyi jukɔn.
11 “‘Eyi mɛɖekɛ dagbekpla nu yi kpena koɖo nɔviɛ yí amɔ: “Èɖo ajeshi Yehowa!”* o. Ðo wo pleŋ ajeshiŋ ɖɛ so vihwɛwo ji keke je mɛganxoxuwo ji. 12 Ðo nasɔ enumajɔmajɔ ciwo wowa sɔ ke wo* yí ŋdagbeɖo ŋwi wowo nuvɔnwo o.’”
13 Ci exoxoɔ nuxu so “enublabla yoyu” nuɔ, ésɔ ŋkɔtɔ sɔ wakɔ enu xoxwi. Eyi nɔ ŋɖe do xoxwi yí exwe yikɔ niɔ, dajinjin gbɔxwe woaɖi swi o.