Wema ci Woŋwlɛ Ðaɖa Ebretɔwo
9 Enublabla xoxwi lɔ ɖo ese ciwo ji woazɔn do yí awa sɛnsɛndɔ kɔkɔɛ lɔ yí texwe kɔkɔɛ yitɔ nyi nyigban ji. 2 Ðo wowa akpaxwe ŋkɔtɔ nɔ avɔnzava lɔ yí kaɖigbanhɛnnu, ekplɔn koɖo kpɔnnɔ kɔkɔɛwo* le enɔ yí woyɔɛ mɔ Kɔkɔɛtɔxu. 3 Vɔ woyɔnɔ xɔmɛsovɔn amɛvetɔ lɔ godu nɔ avɔnzava lɔ mɔ Kɔkɔɛtɔxu Gangantɔ. 4 Enu ciwo yí le nɔ yí nyi shikagban ci mɛ wotɔnɔ zo linfin do, enublabladaka ci nu shika le trɔdo pleŋ yí shikaze ci mɛ mana le, Arɔn kpo ci yí je koɖo ekpe ciwo ji woŋwlɛ enublabla lɔ do le enublabladaka lɔ mɛ; 5 eyi kanfukanfu sherubɛnwo tɔ le tamɛ ni yí do fafɛ do evuɖaɖa nucunu* lɔ ji. Vɔ denyi hweyɛnu yí mìavaxoxoɔ nuxu so ŋcɛwo nu kitokito o.
6 Ci wowa enu cɛwo ɖegbɔ ahan ɔ, avɔnsatɔwo ɖonɔ akpaxwe ŋkɔtɔ mɛ nɔ avɔnzava lɔ blaŋblaŋ yí wanɔ sɛnsɛndɔ kɔkɔɛwo; 7 vɔ avɔnsatɔ gangantɔ ɖekɛ kpaŋ yí yinɔ akpaxwe amɛvetɔ mɛ nɔ avɔnzava lɔ zeɖeka le exwe ɖeka mɛ, éhɛnnɔ ehun yi dandandan keŋ asɔ wa vɔnsa do ta nɔ yiŋtɔ koɖo nuvɔn ciwo yí jukɔn lɔ wa le manyamanya mɛ. 8 Gbɔngbɔn kɔkɔɛ lɔ dasɛ petii mɔ ci avɔnzava ŋkɔtɔ lɔ kpɔtɔ li duuɔ, wodedasɛ emɔ ci yí yi kɔkɔɛtɔxu* lɔ hɔɖo o. 9 Avɔnzava cɛ nyi kpɔwɛ nɔ enu ciwo yí jɔkɔ yɛ le hwecɛnu yí sɔgbe koɖo toto cɛɔ, wosɔ enunanawo jonɔ yí gbewanɔ vɔnsawo. Éle ahan gan, enu cɛwo detɛnŋ na yí mɛ ci yí wakɔ sɛnsɛndɔ kɔkɔɛ yexa mɛnɔ vɛ o. 10 Enu ciwo ɖekɛ nu woku do yí nyi ŋɖuɖuwo, ŋciwo woanu koɖo amɛklɔklɔkɔnu vovovowo.* Enu cɛwo nyi enu ciwo ese biɔ mɔ woawakɔ nɔ lankpu lɔ yí woɖo awakɔ do wo ji keke ana nɔ hwecinu woɖo ɖɛ mɔ woawa enuwo do totonu.
11 Vɔ hwenu Kristo va shigbe avɔnsatɔ gangantɔ nɛ nɔ enunywi ciwo yí li vɔɔ, éyi avɔnzava ci yí gangan wu yí gbenyɔ wu mɛ, denyi alɔ̀ yí wosɔ wa avɔnzava cɛ o, édasɛ mɔ denyi nyigban cɛ ji nu ɖe o. 12 Éyi kɔkɔɛtɔxu lɔ, denyi egbɔwo koɖo nyibusuwo hun yí ehɛn yi o, vɔ yiŋtɔ hun yí ehɛn yi zeɖeka nɔ hwenu lɔwo pleŋ yí xɔ hwlɛngan mavɔ vɛ* nɔ mì. 13 Ðo nɔ egbɔwo koɖo nyibusuwo hun sɔ kpe nɔ afi nyibushi tɔ ciwo wowúnɔ do gotu nɔ mɛ ciwo yí demɛ́ na yí gbaza lɔ mɛ́nɔ ɖe, 14 Kristo ci yí to gbɔngbɔn mavɔ ji yí sɔ yiɖeki na Mawu yí enyi vɔnsa ci nu afɛn ɖe dele hun daklɔ mìwo yexawo so edɔwawa kukuwo mɛ sɔwu keŋ nɔ mìatɛnŋ awa sɛnsɛndɔ kɔkɔɛ nɔ Mawu agbuagbu lɔ ba?
15 Ecɛ yí dɔ taɖo enyi gblamɛdradotɔ nɔ enublabla yoyu lɔ keŋ nɔ ci ekuɔ, mɛ ciwo yí woyɔ atɛnŋ akpɔ hwlɛngan le nuvɔn ciwo yí wowa le enublabla xoxwi lɔ mɛ to tafɛn lɔ ji yí woaxɔ cinɔ mavɔ gbe ci woɖo. 16 Nɔ enublabla liɔ, woɖo aɖo kpe mɛ ci yí bla nu lɔ ku ji. 17 Ðo eku yí dɔ yí enublabla wanɔ dɔ, vɔ nɔ mɛ ci yí bla enu lɔ kpɔtɔ le agbeɔ, enublabla lɔ deɖonɔ ŋsɛn o. 18 Eyi dɔ taɖo enublabla xoxwi lɔ can detɔ edɔ wawa ehunmakɔ ɖɛ o. 19 Ðo hwenu Moizi nu enu ciwo pleŋ yí le Ese lɔ mɛ nɔ jukɔn lɔ pleŋ ɔ, ésɔ lɛngbɔfu jun koɖo izɔpu do nyibusuwo koɖo egbɔwo hun ci esɔ eshi baka mɛ yí wú kɔ do enublabla wema* lɔ koɖo jukɔn lɔ pleŋ nu 20 yí nu mɔ: “Enublabla se ci ji Mawu mɔ míwo le kpɔtɔ awakɔ do hun ke.” 21 Ahanke ewu ehun lɔ do avɔnzava lɔ koɖo enu ciwo pleŋ wozannɔ le sɛnsɛndɔ kɔkɔɛ* lɔ mɛ nu nɛ. 22 Ɛɛ, sɔgbe koɖo Ese lɔɔ, ékpɔtɔ hwɛɖeka yí anyi enuwo pleŋ yí ehun klɔnɔ, eyi nɔ wodekɔ ehun ɖɛɔ, nuvɔnwo sɔsɔke ɖekɛ deli o.
23 Eyi taɖo ele veviɖe mɔ woato enu cɛwo ji yí ana yí enu ciwo yí nyi kpɔwɛ nɔ jeŋkwi mɛ nuwo amɛ́, vɔ jeŋkwi mɛ nuwo ʒan vɔnsa ciwo yí nyɔ wu sesese. 24 Ðo denyi kɔkɔɛtɔxu ci wosɔ alɔ̀ sɔ wa ci yí nyi kpɔwɛ nɔ enuŋtɔŋtɔ lɔ yí Kristo yi o, vɔ jeŋkwi mɛ ŋtɔ yí eyi keŋ atɛnŋ ayi ŋkɔ* nɔ Mawu hɔntɔn do ta nɔ mì. 25 Denyi mɔ ásɔ yiɖeki sasa vɔn gbɛmɛgbɛmɛ shigbe lé avɔnsatɔ gangantɔ lɔ yinɔ kɔkɔɛtɔxu lɔ xwekpekpe duu koɖo ehun ci yí denyi yiŋtɔ tɔ nɛ o. 26 Nɔ denyi ahan ɔ, so hwenu woɖo xexe* lɔ yí akpenɔ fun tɛgbɛɛ. Vɔ ecɛyɛɔ, édasɛ yiɖeki zeɖeka nɔ hwenu lɔwo pleŋ le vɔvɔnu nɔ xexe lɔ keŋ aɖe nuvɔn swi to vɔnsa ci esɔ yiɖeki wa ji. 27 Eyi shigbe lé agbetɔwo ɖo aku zeɖeka yí anyi evɔ, gan yí le ecɛ godu kojoɖoɖo ali nɛɔ, 28 ahanke Kristo can sɔ yiɖeki sa vɔn zeɖeka nɔ hwenu lɔwo pleŋ nɛ keŋ yí dro nuvɔn amɛ sugbɔ tɔ; eyi nɔ éva zevetɔɔ, denyi mɔ ávaɖe nuvɔn swi yɔ o,* vɔ áva keŋ ahwlɛn mɛ ciwo yí le te kpɔɛ veviɖe gan.