Wema ci Woŋwlɛ Ðaɖa Ebretɔwo
2 Ecɛ yí taɖo ele veviɖe mɔ, mìasɔ susu ɖo enyɔ ciwo mìse sa ji nywiɖe sɔwu nɔ mìŋgbevabu emɔ gbeɖe o. 2 Ðo nɔ kankandoji le enyɔ ci wonu to mawudɔlawo ji nu yí mɛɖekpokpui ci yí da le ese ji alo gbe tonu sese yí wodɔn to ni shigbe lé eje do nɛ ɖe, 3 wodadɔn to nɔ mìwo can nɔ mìkpɔ hwlɛngan gangan ŋtɔ́ do enugbali ji ba? Ðo yi nyɔ yí Axwetɔ lɔ nu nɔ mì doŋkɔ yí mɛ ciwo yí si ɖo kpe yi ji nɔ mì, 4 hwenu yí Mawu can ɖe kunu bɔdo wo nu toto enujiŋ gangan hamɛhamɛwo koɖo ŋsɛndɔ vovovowo ji yí gbema gbɔngbɔn kɔkɔɛ lɔ sɔgbe koɖo yi dro.
5 Ðo denyi mawudɔlawo yí esɔ xexe* ci yí gbɔgbɔ ci nu mìxoxoɔ nuxu so sɔ do gɔnmɛ nɔ o. 6 Vɔ kunuɖetɔ ɖeka nu le fiɖeka mɔ: “Nyi yí agbetɔ nyi yí èɖoɖoɔ ŋwi yi ahan alo nyi agbetɔvi nyi yí èleleɛ bu ni ahan ɔ? 7 Èwɛ yí ele gɔnmɛ nɔ mawudɔlawo hwɛɖeka; èna kanfukanfu koɖo bubu yi. Èsɔ ɖo nu nɔ ao dɔ ciwo èsɔ alɔ̀ sɔ wa. 8 Èsɔ enuwo pleŋ do yi fɔwo gɔnmɛ.” Ci Mawu sɔ enuwo pleŋ do gɔnmɛ niɔ, dekpɔtɔ ŋɖekɛ ci desɔ do gɔnmɛ ni o. Vɔ kakacɛɔ, mìdekpɔ enu ciwo pleŋ esɔ do gɔnmɛ ni hɔɖo o. 9 Gan mìkpɔ Yesu ci wona yí evale gɔnmɛ nɔ mawudɔlawo hwɛɖeka. Ecɛyɛɔ, wona kanfukanfu koɖo bubu yi, ɖo ékpe fun keke yí ku keŋ nɔ to xomɛvu gangan Mawu tɔ jiɔ, ata eku kpɔ do nu nɔ mɛshiamɛ.
10 Mɛ ci yí dɔ yí enuwo pleŋ li yí woto ji yí wa enuwo pleŋ hɛn evi sugbɔ yi kanfukanfu mɛ, eyi taɖo esɔgbe mɔ éɖo awɛ yí Amɛkplɔtɔ Vevitɔ ci yí adɔ yí woakpɔ hwlɛngan akpe fun sugbɔ keŋ ale blebu. 11 Ðo mɛ ci yí sɔ amɛwo wakɔ amɛkɔkɔɛwo koɖo mɛ ciwo yí wosɔ wakɔ amɛkɔkɔɛ lɔwo pleŋ yí to so amɛ kuɖeka mɛ, eyi taɖo dewa ŋkpɛn ni mɔ áyɔ wo mɔ ye nɔviyewo o. 12 Énu mɔ: “Nadra ao ŋkɔ nɔ nɔvinyɛwo; naji ha asɔ kanfu eo le hamɛ lɔ mɛ.” 13 Égbenu mɔ: “Naɖe ji do nu.” Égbenu hɛnnɛ mɔ: “Kpɔ ɖa! Enyɛ koɖo evi ciwo Yehowa* naŋ ke.”
14 Eyi taɖo ci “ɖevi lɔwo” nyi ehun koɖo gbazaɔ, yɛŋtɔ can vatrɔ ehun koɖo gbaza nɔ atɛnŋ ato yi ku ji yí asɔ Legba ci yí atɛnŋ awu amɛ sɔ trɔ enugbali 15 keŋ nɔ atɛnŋ ana vovo mɛ ciwo pleŋ yí sɔ wowoɖekiwo sɔ wa hwashi le wowo gbe pleŋ mɛ ci wovɔnvɔn nɔ eku. 16 Ðo le nyɔnɔnwi mɛɔ, denyi mawudɔlawo nu yí ekpekpeɛdo o, vɔ Abrahamu viviɛ nu yí ekpekpeɛdo. 17 Eyi taɖo evaʒan mɔ ále shigbe “nɔviɛwo” nɛ le ŋɖekpokpui mɛ. Éwɛ ahan keŋ atɛnŋ anyi avɔnsatɔ gangantɔ ci yí kunɔ ŋshishi nɔ amɛ yí gbele gbeji le Mawu dɔwo wawa mɛ, eyi atɛnŋ asa vɔn* do ta nɔ jukɔn lɔ nuvɔnwo yí awɛ nɔ fafa ava gblamɛ nɔ wowo koɖo Mawu. 18 Eyi ci yiŋtɔ kpe fun hwenu woti kpɔɔ, átɛnŋ akpedo mɛ ciwo yí totoɔ tetekpɔwo mɛ nu.