Wema ci Woŋwlɛ Ðaɖa Ebretɔwo
3 Eyi taɖo, nɔvi kɔkɔɛwo, míwo ciwo yí woyɔ nɔ jeŋkwi mɛ yiyi, mísɔ susu ɖo Yesu ci mìjeshi ɖɛ mɔ yɛnyi apotru koɖo avɔnsatɔ gangantɔ lɔ ji. 2 Énɔ gbeji nɔ Mɛ ci yí sɔɛ nɔ edɔ cɛ shigbe lé Moizi can nɔ gbeji le enuwo pleŋ mɛ le Mɛ ŋtɔ́ xwe mɛ nɛ. 3 Ðo wokpɔɛ* mɔ kanfukanfu yitɔ ɖo agangan wu Moizi tɔ shigbe lé bubu nɔnɔ mɛ ci yí cu exɔ nu sɔwu exɔ lɔ ŋtɔ nɛ. 4 Le nyɔnɔnwi mɛɔ, exɔ ɖekpokpui ci yí liɔ, amɛ yí cui, vɔ Mawu yí wa enushianu. 5 Moizi nɔ gbeji shigbe edɔwavi nɛ le enuwo pleŋ mɛ le Mɛ ŋtɔ́ xwe mɛ yí enyi kpeɖoji* nɔ enu ciwo nu wojikɔ axo nuxu so le ŋkɔ mɛ. 6 Vɔ Kristo yɛnɔ gbeji shigbe evi nɛ le Mawu xwe lɔ ji kpɔkpɔ mɛ. Mìwo yí nyi Yi xwe lɔ nɔ mìlé vovo ci mìvo fɛɛ yí xonɔ nuxu koɖo emɔkpɔkpɔ ci mìsɔ yinɔ go ɖɛ goŋgoŋ keke sɔyi vɔvɔnu.
7 Eyi taɖo, shigbe lé gbɔngbɔn kɔkɔɛ lɔ nui nɛɔ, “Nɔ míse yi gbemɛ gbɛɔ, 8 míŋgbelɔn nɔ eji mɛ asɛnŋ nɔ mí shigbe lé enyi do hweɖekanu ci wodo dɔmɛzi nɔŋ sugbɔ le ŋkeke ci ji wodoŋ kpɔ le zogbe lɔ ji nɛ o. 9 Ci míwo tɔgbiwo kpɔ edɔ ciwo yí ŋwa na nɔ exwe 40 can ɔ, wodoŋ kpɔ yí gbeteŋ kpɔ le nɔ. 10 Eyi dɔ taɖo hwenu ŋtɔ́ mɛ tɔwo nu nyɔŋ nɔŋ yí ŋnu mɔ: ‘Emɔ yí wowo jiwo bunɔ gashiagamɛ yí wodevajeshi anyi mɔwo ɖɛ o.’ 11 Eyi taɖo ŋta nu le anyi dɔmɛzi mɛ mɔ: ‘Wodaɖo anyi gbɔndomɛ lɔ mɛ o.’”
12 Nɔviwo, mícɔ míwoɖekiwo nɔ mɛɖe ŋgbevatɔ tete so Mawu agbuagbu lɔ gbɔ keŋ avaɖo eji vɔn ci yí dexɔ se o. 13 Vɔ míkpɔtɔ adodoɔ ŋsɛn míwonɔnɔwo gbeɖeka duu ci hwenu ci woyɔ mɔ “Egbɛ” lɔ kpɔtɔ li keŋ nɔ ŋsɛn ci yí nuvɔn ɖo ŋgbevable mɛɖe nɔ eji mɛ asɛnŋ ni o. 14 Ðo enu ci ji mìkando so tɔtɔmɛɔ, eyi lɔ ji mìakpɔtɔ akankando sɛnŋsɛnŋɖe keke sɔyi vɔvɔnu gbɔxwe axɔ enu ci Kristo xɔ hɛnnɛ. 15 Shigbe lé wonui nɛɔ, “Nɔ míse yi gbemɛ gbɛɔ, míŋgbelɔn nɔ eji mɛ asɛnŋ nɔ mí shigbe lé enyi do hweɖekanu ci wodo dɔmɛzi nɔŋ sugbɔ nɛ o.”
16 Vɔ miwo yí si gan yí gbedo dɔmɛzi ni sugbɔ ahan ɔ? Denyi mɛ ciwo pleŋ yí Moizi kplɔ so Eʒipti yɔ ba? 17 Keŋ ɖe, miwo nu yí nyɔŋ nɔ Mawu na nɔ exwe 40-ɔ? Denyi mɛ ciwo yí wa nuvɔn yí wowo cɔwo ci zogbe lɔ mɛ yɔ ba? 18 Miwo yí eta nu mɔ wodaɖo ye gbɔndomɛ lɔ mɛɔ? Denyi mɛ ciwo yí wa nu etosɛnsɛntɔ yɔ ba? 19 Eyi mìkpɔ mɔ wodetɛnŋ yí ɖo mɛ o, ɖo xɔse hwedo wo.