Wema ci Woŋwlɛ Ðaɖa Titu
2 Vɔ eoɔ, kpɔ̀tɔ axoxoɔ nuxu so enu ci yí sɔgbe koɖo enukplakpla adodwi* lɔ nu. 2 Ŋsu shinshinwo le wanɔ nu le dredrenu yí adonɔ vevi nu, susu ɖo ale te nɔ wo, woasɛnŋ le xɔse mɛ, le lɔnlɔn mɛ, le ejidodo mɛ. 3 Ahanke nyɔnu shinshinwo adanasɛ le wowo nuwanawo mɛ mɔ yewovɔnnɔ nɔ Mawu, wodanunɔ enyɔ ciwo yí axo ɖyi amɛ o, woŋgbenyi hwashi nɔ aha sugbɔ nunu o, woakplanɔ nunywi amɛ 4 keŋ nɔ woatɛnŋ akpla nu cugbejɛ ciwo yí ɖe asu* mɔ, wo le lɔnnɔ wowo suwo, alɔnnɔ wowo viwo, 5 susu ɖo ale te nɔ wo, woanɔnɔ agbe nywi, awanɔ axomɛdɔwo,* awanɔ nunywi, asɔ wowoɖekiwo hwenɔ nɔ wowo suwo keŋ nɔ amɛwo ŋgbevaxokɔ nuxu dɔndɔn so Mawu nyɔ lɔ nu o.
6 Ahanke, kpɔ̀tɔ adodoɔ ŋsɛn ɖajɛviwo nɔ susu ale te nɔ wo, 7 ɖò kpɔwɛ nywi le edɔ nywi ɖeshiaɖe wawa mɛ. Kplànɔ enu ci yí mɛ́ amɛwo koɖo vevidodonu keŋkeŋ, 8 nùnɔ enyɔnywi* ciwo nu wodatɛnŋ akpɔ enyɔ ɖe anu so o keŋ nɔ eŋ akpɛn ketɔnɔwo, ɖo wodekpɔ enyɔdɔndɔn* ɖe anu so mì nu o. 9 Hwashiwo le sɔ wowoɖekiwo hwenɔ nɔ wowo xwetɔwo le enuwo pleŋ mɛ, wo le tekpɔ nɔ wowo nu akpenɔ nɔ wo, woŋgbehwlɛnnɔ nyɔ koɖo wo o, 10 woŋgbefinɔ enuwo le wowo xwetɔwo shi o, vɔ woadanasɛ mɔ yewonyi mɛ ciwo ji woatɛnŋ akando keŋkeŋ keŋ nɔ woatɛnŋ aɖo acɔ nɔ mìwo Hwlɛngantɔ Mawu nukplakpla lɔ le enuwo pleŋ mɛ.
11 Ðo ci Mawu wa xomɛvu gangan nɔ amɛwoɔ, éna yí amɛ hamɛhamɛwo pleŋ kpɔ hwlɛngan. 12 Ecɛ kplanɔ nu mì mɔ mìagbe Mawu mavɔnmavɔn koɖo xexe lɔ drowo yí le mìwo gbenɔnɔ mɛɔ, mìaɖonɔ susu nywi, awanɔ enujɔjɔɛ, anɔnɔ gbeji nɔ Mawu le xexe* cɛ mɛ, 13 ci mìle te kpɔ jijɔnu ci mìkpɔkɔ emɔ nɔ koɖo hwenu Mawu gangan lɔ sɔ kpe nɔ mìwo Hwlɛngantɔ Yesu Kristo adasɛ wowoɖekiwo le kanfukanfu mɛ. 14 Yesu yí sɔ yiɖeki na do ta nɔ mì yí na yí mìvo* so enuvwin ɖekpokpui ci yí trɔkpe Mawu se lɔ mɛ yí wɛ yí jukɔn ɖeka le kɔkɔɛɖe ni, jukɔn cɛ nyi enuvevi yitɔ ci kpakpa sɔnɔ nɔ edɔ nywiwo wawa.
15 Kpɔ̀tɔ akplakɔ enu cɛwo amɛwo, adokɔ ŋsɛn amɛwo, agbekɔ enyɔ nɔ amɛwo koɖo acɛwo pleŋ, ŋgbelɔn nɔ mɛɖekɛ akpɔ eo do enugbali ji o.