Wema ci Woŋwlɛ Ðaɖa Filipitɔwo
4 Eyi taɖo, nɔvinyɛwo, ŋlɔn mí, ŋjijiɛ veviɖe mɔ makpɔ mí, mínyi anyi jijɔ koɖo anyi fyɔkuku, mínɔ te gogwiɖe ahan le Axwetɔ lɔ mɛ, amɛveviwo yí mínyi nɔŋ.
2 Ŋdokɔ ŋsɛn Evodi koɖo Sɛntishi mɔ wo le ɖo susu ɖekɛ ŋmɛ le Axwetɔ lɔ mɛ. 3 Ɛɛ, eo ci yí nyi anyi kpena dɔwatɔ nyɔnɔnwitɔ, ŋdokɔ ŋsɛn eo can mɔ eo le kpɔtɔ akpekpeɛdo nyɔnu amɛve cɛwo nu. Nyɔnu cɛwo do gbla* do ta nɔ eŋɛnywi lɔ alɔlealɔmɛ koɖo nyɛ koɖo Klema sɔ kpe nɔ mɛkpɛtɛ ciwo yí nyi anyi kpena dɔwatɔwo. Woŋwlɛ mɛ cɛwo pleŋ ŋkɔwo do agbe wema lɔ mɛ.
4 Eji le jɔnɔ mí hweshiahwenu le Axwetɔ lɔ mɛ. Nagbenui nɔ mí ke, eji le jɔnɔ mí! 5 Míwɛ nɔ amɛwo pleŋ ajeshi mí ɖɛ mɔ, enugɔnmɛsetɔwo yí mínyi. Axwetɔ lɔ gogo. 6 Míŋgbelo nɔ ŋɖekpokpui o; vɔ le enushianu mɛɔ, míto gbedodoɖa, kwifanwawa koɖo akpedodowo ji yí anu enu ciwo yí wawa mí nɔ Mawu. 7 Eyi fafa Mawu tɔ ci mɛ agbetɔ datɛnŋ amɔŋje o aglɔn ta nɔ míwo jiwo koɖo míwo susuwo* to Kristo Yesu ji.
8 Le vɔvɔnuɔ, nɔviwo, enu ciwo nu míakpɔtɔ abunɔ tamɛ kpɔ so yí nyi enu ciwo pleŋ yí nyi nyɔnɔnwi, enu ciwo pleŋ nu yí bubu le, enu ciwo pleŋ yí le jɔjɔɛɖe, enu ciwo pleŋ yí mɛ́, enu ciwo pleŋ woatɛnŋ alɔn, enu ciwo pleŋ nu woxonɔ nuxu nywi so, enu ciwo pleŋ yí nyi wana nywi koɖo enu ciwo pleŋ woakanfu. 9 Enu ciwo míkpla yí xɔ gbe do wo ji, enu ciwo míse koɖo enu ciwo míkpɔ le ŋgbɔɔ, míwanɔ enu cɛwo; eyi fafa Mawu lɔ anɔ koɖo mí.
10 Ŋkpɔkɔ jijɔ sugbɔ le Axwetɔ lɔ mɛ mɔ, mígbesɔ ɖe le ji nɔŋ ke. Ci míbubuɔ anyitɔ kpɔ can ɔ, mídenya lé míawɛ akpedo ŋnu o. 11 De eʒan mɛ ŋle taɖo yí nukɔ ahan o, ɖo le nɔnɔmɛ ɖekpokpui mɛɔ, ŋkpla lé enu ci yí le ŋshi ajeŋ nɔŋ* do. 12 Ŋnya lé enu hwenɔdo amɛ do koɖo lé enu sunɔgbɔ le amɛ shi do. Le enuwo pleŋ mɛ, le nɔnɔmɛ ɖekpokpui mɛɔ, ŋkpla lé xodu ɖɔnɔ amɛ koɖo lé shive cinɔ amɛ do, ŋnya lé nawɛ do nɔ enu sugbɔ le ŋshi koɖo lé nawɛ do nɔ enu dɛnŋ. 13 Le enuwo pleŋ mɛɔ, ŋkpɔnɔ ŋsɛn to mɛ ci yí nanɔ ŋsɛnŋ ji.
14 Ci ele ahan can ɔ, míwɛ nywiɖe ci míkpedo ŋnu le anyi cukaɖawo mɛ. 15 Le nyɔnɔnwi mɛɔ, míwo Filipitɔwo, mínya hɛnnɛ mɔ ci míxɔ eŋɛnywi lɔ ŋkɔtɔ yí ŋso le Maseduani ɔ, hamɛ ɖekɛ desɔ ŋɖe ɖaɖaŋ o; ahanke ŋdexɔ ŋɖe le hamɛ ɖe gbɔ sɔ zeto míwo nu o. 16 Ðo hwenu ŋle Tɛsaloniki ɔ, mísɔ enu ciwo yí ʒanŋ ɖaɖaŋ, denyi zeɖeka o, vɔ zeve blebu. 17 Denyi enunana ɖe yí ŋjijiɛ o, vɔ ekusɛnsɛn ci yí ahɛn ele sugbɔ vɛ nɔ mí doji yí ŋjijiɛ. 18 Gan, ŋkpɔ enu ciwo pleŋ yí ʒanŋ keke egbewugan. Ci mísɔ enuwo ɖaɖaŋ to Epafroditi jiɔ, enuwo vasugbɔ le ŋshi zan. Wohwɛnhwɛn te lilili yí nyi vɔnsa ciwo yí jɔnɔ ji nɔ Mawu yí wa ɖaŋ kpenɔ ni. 19 Anyi Mawu ci shi enu sugbɔ le ana mí enu ciwo pleŋ yí wudo mí to Kristo Yesu ji. 20 Woakanfu mìwo Mawu ci yí gbenyi Eda keke asɔyi mavɔmavɔ. Amɛn.
21 Mído gbe nɔ amɛkɔkɔɛ ciwo pleŋ yí nyi Kristo Yesu tɔ nɔŋ. Nɔvi ciwo yí le koɖoŋ do gbe ɖaɖa mí. 22 Amɛkɔkɔɛwo pleŋ, taŋtaŋ mɛ ciwo yí le Seza xwe mɛ do gbe ɖaɖa mí.
23 Axwetɔ Yesu Kristo le wa xomɛvu gangan nɔ mí nɔ gbɔngbɔn nywi ci mídadasɛ.