Wema Amɛvetɔ ci Woŋwlɛ Ðaɖa Tɛsalonikitɔwo
2 Vɔ nɔviwo, kuso mìwo Xwetɔ Yesu Kristo vava koɖo hwenu woabɔ mì doju koɖi nuɔ, mìdokɔ ŋsɛn mí mɔ, 2 míwoŋgbelɔn nɔ enyɔ ɖe ci yí womɔ yɛso gbɔngbɔn mɛ* alo enyɔ ɖe ci wonu alo wema ɖe ci womɔ yɛso mì gbɔ mɔ, Yehowa* ŋkeke lɔ va vɔ adɔ yí míaɖe blɛ acaka le susu mɛ alo avɔn o.
3 Míŋgbelɔn nɔ mɛɖe able mí* le ŋɖekpokpui mɛ o, ɖo ŋkeke ŋtɔ́ dava nɔ xɔsegbegbe deva doŋkɔ yí wodasɛ mɛ ci yí dewanɔ do ese ji ci yí nyi evi ci woagu swi lɔ o. 4 Egufɔntɔ enyi yí gangannɔ yiɖeki yí nunɔ mɔ yele ta nɔ enu ciwo pleŋ woyɔnɔ mɔ mawu alo enu ciwo wosɛnnɔ keŋ yí le nyinɔnɔ le Mawu gbedoxɔ mɛ yí dadasɛ yiɖeki nɔ amɛwo pleŋ mɔ yenyi mawu. 5 Mídeɖo ŋwi mɔ ŋnunɔ enyɔ cɛwo nɔ mí hwenu ŋkpɔtɔ le mí gbɔ ba?
6 Ecɛyɛɔ, mínya enu ci yí cukɔ emɔ ni keŋ nɔ woadasɛ yi le yiŋtɔ gamɛ ji. 7 Nyɔnɔnwi yɔ, esejimawamawa cɛ nyi wlawlamɛ nu yí ele edɔ wakɔ xoxoxo, vɔ ákpɔtɔ anɔ wlawlamɛ keke aje hwenu mɛ ci yí gluinkɔ ɖɛ lɔ dagbeli o. 8 Eyi woadasɛ esejimawatɔ lɔ, Axwetɔ Yesu awui to yi nu mɛ gbɔngbɔn ji yí agui swi keŋkeŋ to yi vava ji. 9 Hwenu esejimawatɔ cɛ avaɔ, áva koɖo Satana ŋsɛn yí awa enujiŋ gangan amɛblebletɔ hamɛhamɛwo 10 koɖo enumajɔmajɔ ɖekpokpui yí asɔ ble mɛ ciwo yí agu nɔ anyi fɛncu wowotɔ, ɖo wodelɔn mɔ yewoaxɔ nyɔnɔnwi lɔ keŋ nɔ woahwlɛn wo gan o. 11 Eyi taɖo Mawu tashi wo yí woble wo yí sɔ wo bu emɔ nɔ woakando ŋsukankan ji 12 keŋ nɔ woaɖo kojo nɔ wo pleŋ, ɖo wodekando nyɔnɔnwi lɔ ji o, vɔ enumajɔmajɔwawa yí jɔnɔ ji nɔ wo.
13 Éle han gan, nɔviwo, míwo ciwo yí Yehowa* lɔn, éle dandan mɛ mɔ mìadonɔ akpe nɔ Mawu gashiagamɛ do ta nɔ mí; ɖo ci míkando nyɔnɔnwi lɔ jiɔ, écan mí so tɔtɔmɛ keŋ nɔ míakpɔ hwlɛngan yí ewɛ yí mímɛ to yi gbɔngbɔn lɔ ji. 14 Éyɔ mí to eŋɛnywi ci yí mìdrakɔ ji nɔ míakpɔ hwlɛngan keŋ nɔ míatɛnŋ axɔ kanfukanfu mìwo Xwetɔ Yesu Kristo tɔ. 15 Eyi taɖo nɔviwo, mílo do gogwiɖe yí akpɔtɔ awawa do enu ciwo yí mìkpla mí ji, étɛnŋ nyi enyɔ ciwo yí mìnu nɔ mí alo enyɔ ciwo yí le wema ci mìŋwlɛ ɖaɖa mí mɛ. 16 Mìwo Da Mawu lɔn mì; eyi ci ewa xomɛvu gangan nɔ mìɔ, éfanɔ akɔn nɔ mì tɛgbɛɛ yí gbena emɔkpɔkpɔ nywi mì. Mìdokɔ gbe ɖaɖa mɔ yɛ koɖo mìwo Xwetɔ Yesu Kristo 17 le fa akɔn nɔ mí yí ado ŋsɛn mí keŋ nɔ enu ciwo pleŋ míwanɔ koɖo enyɔ ciwo pleŋ mínunɔ anyɔ.