Wema ci Woŋwlɛ aɖa Rɔmatɔwo
4 Ci enyi ahan ɖe, enyɔ ci mìatɛnŋ anu so mìwo tɔgbi gbaza mɛ tɔ Abrahamu nuɔ? Nyi ekpɔ yí xɔɔ? 2 Le kpɔwɛ mɛ, nɔ enyi edɔ ciwo yí Abrahamu wa nu yí wokpɔ do sa yí yɔɛ mɔ amɛjɔjɔɛɔ, ákpɔ susu ci yí taɖo ayi go. Vɔ datɛnŋ ayi go le Mawu gbɔ o. 3 Ðo enyɔ ci enuŋwlɛŋwlɛ lɔ nuɔ? Émɔ “Abrahamu xɔ Yehowa* ji se yí ekpɔɛ do amɛjɔjɔɛ ji.” 4 Nɔ mɛɖe le edɔ wakɔɔ, wodekpɔnɔ efɛn ci woacu ni mɔ yɛnyi xomɛvu yí woawa ni o, vɔ efɛn enyi woɖu di. 5 Nɔ mɛɖe dewa dɔ ɖe o gan yí xɔ mɛ ci yí yɔnɔ amɛmavɔnmawu mɔ amɛjɔjɔɛ ji seɔ, xɔse ci eɖo ana woakpɔɛ do amɛjɔjɔɛ ji. 6 Nɔ Mawu dekpɔ do mɛɖe dɔwawawo nu gbɔxwe yí yɔɛ mɔ amɛjɔjɔɛɔ, eji jɔnɔ mɛ lɔ sugbɔ. Davidi can xo nuxu so nyɔ cɛ nu ci enu mɔ: 7 “Eji jɔnɔ mɛ ciwo yí da le ese ji yí wosɔ ke wo; eji jɔnɔ mɛ ciwo nuvɔnwo wosɔ enu cɔn* hɛnnɛ; 8 eji jɔnɔ mɛ ci nuvɔn Yehowa* dayɔ mɔ ŋɖe o.”
9 Ecɛyɛ ɖe, mɛ ciwo yí so vo ɖekɛ yí akpɔ jijɔ cɛa? Alo mɛ ciwo yí deso vo can akpɔ jijɔ lɔ? Ðo mìnu mɔ: “Xɔse ci Abrahamu ɖo na yí Mawu kpɔɛ do amɛjɔjɔɛ ji.” 10 Vɔ lé ele do hwenu Mawu kpɔɛ do amɛjɔjɔɛ jiɔ? Éso voa, alo deso vo o? Éso vo hwenɔnu go, tɔtɔnɔ yí enyi. 11 Eyi exɔ jeshidu ci yí nyi evososo ci yí ɖo kpe yi ji mɔ wokpɔɛ do amɛjɔjɔɛ ji, ɖo éɖo xɔse ci dekpɔ so vo hwenɔnu can; nɔ atɛnŋ anyi eda nɔ mɛ ciwo pleŋ yí ɖo xɔse ci wodeso vo can keŋ nɔ woakpɔ wo do amɛjɔjɔɛwo ji. 12 Égbenyi eda nɔ evi ciwo pleŋ woso vo nɔ. Denyi mɛ ciwo pleŋ yí lɔn do evososo ji ɖekɛ yí mìwo da Abrahamu nyi eda nɔ o, vɔ égbenyi eda nɔ mɛ ciwo yí zɔnkɔ to yi fɔteshiwo mɛ yí ɖo xɔse ci han eɖo hwenu yí deso vo o.
13 Ðo denyi ese ɖe nu yí wokpɔ do yí ɖo gbe nɔ Abrahamu alo viviɛwo mɔ woaɖu cinɔ nɔ xexe ɖeka o, vɔ enujɔjɔɛ ci ewa to xɔse ji nu wokpɔ do. 14 Nɔ enyi ese lɔ ji yí amɛwo ato yí aɖu cinɔ nɔ gbeɖu lɔɔ, anyi xɔse lɔ nyi enugbali yí egbe ci woɖo nɔ Abrahamu can nyi enugbali. 15 Le nyɔnɔnwi mɛɔ, Ese hɛnnɔ dɔmɛzi vɛ, vɔ nɔ ese deliɔ, woda le ese ji nyɔ ɖe dali hɛnnɛ o.
16 Eyi taɖo enyi xɔse ci mìɖo yí dɔ mìxɔ gbeɖu lɔ, ɖo Mawu wa xomɛvu gangan nɔ mì. Abrahamu viviwo pleŋ atɛnŋ axɔ gbeɖu lɔ, denyi mɛ ciwo yí wanɔ do Ese lɔ ji ɖekɛ yɔ o, vɔ mɛ ciwo yí ɖo xɔse ci han yí Abrahamu ɖo can axɔ gbeɖu lɔ. Le nyɔnɔnwi mɛɔ, Abrahamu yí nyi eda nɔ mì pleŋ. 17 (Shigbe lé woŋwli ɖɛ nɛ mɔ: “Ŋsɔ eo nɔ nànyi eda nɔ jukɔn sugbɔwo.”) Abrahamu dasɛ mɔ yeɖo xɔse le ŋmɛ nɔ Mawu ci yí fɔnnɔ amɛkukuwo do agbe yí xonɔ nuxu so enu ciwo yí deli nu shigbe mɔ woli hannɛ.* 18 Ci ŋɖe deli yí Abrahamu akpɔ emɔ nɔ can ɔ, ékando ji yí ɖo xɔse mɔ yeavanyi eda nɔ jukɔn sugbɔwo shigbe lé Mawu nui ni nɛ mɔ: “Ahan yí viviowo avasugbɔ do nɛ.” 19 Ci xɔse yitɔ degbɔjɔ can ɔ, ékpɔ yɛŋtɔ gbaza mɔ yɛku (ɖo exwe 100 han yí le eta ni), ékpɔɛ hɛnnɛ mɔ Sara vijidɔ ku.* 20 Gan ci Mawu ɖo gbe niɔ, xɔse dehwedi yí exo nu kpɔ o, vɔ xɔse yitɔ do ŋsɛn yi yí ekanfu Mawu. 21 Ékando ji pleŋpleŋ mɔ, átɛnŋ awa do egbe ci eɖo ji. 22 Eyi na taɖo “Mawu kpɔɛ do amɛjɔjɔɛ ji.”
23 Gan denyi yiɖekɛ nu woŋwlɛ so mɔ “Mawu kpɔɛ do amɛjɔjɔɛ ji o.” 24 Woŋwli so mìwo can nu. Mawu akpɔ mì do amɛjɔjɔɛwo ji hɛnnɛ, ɖo mìxɔ Eyɛ ci yí fɔn mìwo Xwetɔ Yesu so ku ji se. 25 Wosɔ na nɔ aku do tamɛ nɔ mìwo nuvɔnwo yí wofuin so ku keŋ nɔ woayɔ mì mɔ amɛjɔjɔɛwo.