Wema ci Woŋwlɛ Ðaɖa Galatitɔwo
2 Le exwe 14 goduɔ, ŋgbetrɔyi Ʒerusalɛmu koɖo Barnabasi, ŋkplɔ Titu bɔdo nyɛɖeki nu hɛnnɛ. 2 Enu ci wodasɛ nɔŋ taɖo yí ŋyi yí nu eŋɛnywi ci ŋdrakɔ nɔ jukɔn bu mɛ tɔwo nɔ nɔvi lɔwo. Amɛŋkuvilejiwo ɖekɛ yí ŋyɔ do akpo yí nu enyɔ lɔ nɔ keŋ akando ji mɔ ŋdelɔkɔ ju alo lɔ ju gbali o. 3 Ci Titu ci yí le koɖoŋ nyi Grɛkitɔ can ɔ, wodemɔ kokoko yɛɖo aso evo o. 4 Vɔ nɔvi ŋsukantɔ ciwo yí be yí ɖo hamɛ lɔ mɛ yí ɖe nyɔ lɔ ti keŋ asɔ dahɛn vovo ci mìɖo ci mìnyi Kristo Yesu dokplɔtɔwo, ɖo woji mɔ yewoasɔ mì wa hwashiwo; 5 vɔ mìdetashi mìwoɖekiwo ɖɛ nɔ wo o, oo, mìdena mɔ wo hwɛɖeka* kpetii o, keŋ nɔ nyɔnɔnwi eŋɛnywi lɔ tɔ akpɔtɔ anɔ mí mɛ.
6 Nɔ mɛ ciwo wokpɔnɔ do amɛveviwo ji gbenyi ŋɖeŋɖe vayi sa can ɔ, yɛdele veviɖe nɔ nyɛ o, ɖo denyi lé amɛ le do le agogbe yí Mawu kpɔnɔ o. Amɛŋkuvileji ŋtɔ́wo dekpla enu yoyu ɖeŋ o. 7 Vɔ wokpɔɛ mɔ wodɔ nyɛ mɔ nyɛ le dra eŋɛnywi lɔ nɔ mɛ ciwo yí deso vo o, shigbe lé wodɔ Piɛ mɔ yɛ le dra eŋɛnywi lɔ nɔ mɛ ciwo yí so vo nɛ. 8 Ðo mɛ ci yí na ŋsɛn Piɛ yí enyi apotru nɔ mɛ ciwo yí so voɔ, eyi lɔ ke yí na ŋsɛnŋ yí ŋnyi apotru nɔ jukɔn bu mɛ tɔwo. 9 Ci wokpɔɛ mɔ wowa xomɛvu gangan nɔŋ ɔ, Ʒaki, Sefasi* koɖo Ʒan ciwo wokpɔnɔ mɔ wowo yí dɔ yí hamɛ lɔ lo do,* na ashi nyɛ koɖo Barnabasi yí sɔ dasɛ mɔ mìbɔ yí wanɔ dɔ doju keŋ nɔ mìwoayi jukɔn bu mɛ tɔwo gbɔ yí wowoayi mɛ ciwo yí so vo gbɔ. 10 Ŋci ɖekɛ wobiɔ mì mɔ mìwo le wa yí nyi mɔ, mìakpɔtɔ aɖonɔ ŋwi wamɛnɔwo, eyi ŋje agbla veviɖe yí wɛni hɛnnɛ.
11 Ci Sefasi* va Antiɔshi ɔ, ŋgbe nyɔ ni gannaganna, ɖo eze petii mɔ éwa fɛn wa nu.* 12 Ðo gbɔxwe ŋsu ciwo yí so Ʒaki gbɔ avaɖoɔ, éɖukɔ nu koɖo jukɔn bu mɛ tɔwo, vɔ ci wovaɖoɔ, émi enu ɖuɖu koɖo wo yí tɔ azɔge nɔnɔ nɔ wo, ɖo évɔnkɔ nɔ mɛ ciwo yí so vo. 13 Ʒuifu kpɛtɛwo can bɔdo nu le ayemɛnuwawa ŋtɔ́ mɛ keke yí dɔn Barnabasi can do ayemɛnuwawa wowotɔ lɔ mɛ hɛnnɛ. 14 Vɔ ci ŋkpɔ mɔ wodewakɔ nu sɔ koɖo nyɔnɔnwi ci yí kuso eŋɛnywi lɔ nuɔ, ŋnu nɔ Sefasi* le wo pleŋ ŋmɛ mɔ: “Nɔ eo ci yí nyi Ʒuifu nɔkɔ agbe shigbe jukɔn bu mɛ tɔwo nɛ yí dènɔkɔ agbe shigbe Ʒuifuwo nɛ ɖe, lé àwɛ anu nɔ jukɔn bu mɛ tɔwo mɔ woɖo awa do Ʒuifuwo kɔnuwo ji dandandan ɔ?”
15 Mìwo ciwo yí nyi Ʒuifu vijijiwo yí mìdenyi nuvɔnwatɔ ciwo yí so jukɔn kpɛtɛwo mɛɔ, 16 mìnya mɔ denyi nɔ mɛɖe wakɔ do ese lɔ ji yí woayɔɛ mɔ amɛjɔjɔɛ o, vɔ nɔ éxɔ Yesu Kristo ji se ɖekɛ yí adɔ woayɔɛ mɔ amɛjɔjɔɛ. Eyi taɖo mìxɔ Kristo Yesu ji se nɔ woatɛnŋ ayɔ mì mɔ amɛjɔjɔɛwo nɔ ci mìxɔ Kristo ji se yí denyi ci mìwakɔ do ese lɔ ji yɔ o, ɖo denyi kpɔ mɔ nɔ mɛɖe wakɔ do ese lɔ ji yí woayɔɛ mɔ amɛjɔjɔɛ o. 17 Vɔ nɔ wokpɔ mì do nuvɔnwatɔwo ji hwenu mìjijiɛ mɔ woayɔ mì mɔ amɛjɔjɔɛwo to Kristo ji ɖe, edasɛ mɔ Kristo dodoɔ ŋsɛn mì mɔ mìwo le wa nuvɔn yɔa? Gbeɖe! 18 Nɔ ŋgbetrɔ yí dradra enu ciwo ŋdahɛn vayi doɔ, anyi ŋdadasɛ mɔ ŋnyi agɔjetɔ. 19 Ðo, to ese lɔ jiɔ, ŋku nɔ ese lɔ keŋ nɔ matɛnŋ anɔ agbe nɔ Mawu. 20 Wokanŋ do aci nu koɖo Kristo, denyi enyɛ yí gbele agbe o, Kristo yí le agbe le ŋmɛ. Le nyɔnɔnwi mɛɔ, ci ŋxɔ Mawu Vi lɔ ji se taɖo yí ŋle agbe ci ŋle yɛ le gbaza mɛ. Mawu Vi lɔ lɔnŋ yí sɔ yiɖeki na do ta nɔŋ. 21 Ŋdegbe xomɛvu gangan Mawu tɔ o, ɖo nɔ enyi wawa do ese lɔ ji yí adɔ woanyi amɛjɔjɔɛɔ, anyi Kristo ku gbali.