Wema ci Woŋwlɛ Ðaɖa Galatitɔwo

4 Ecɛyɛ ŋnukɔ mɔ, nɔ cinɔɖutɔ lɔ kpɔtɔ nyi vihwɛɔ, evototo ɖe dele gblamɛ nɔ yɛ koɖo hwashi o, nɔ eyi nyi axwetɔ nɔ nuwo pleŋ can. 2 Vɔ ékpɔtɔ nɔnɔ gɔnmɛ nɔ enucɔtɔwo koɖo axwejikpɔtɔwo keke je hwenu azan ci edalɔ ɖo ɖɛ asun. 3 Ahanke mìwo can, hwenu mìnyi vihwɛwoɔ, mìnyi hwashiwo yí kplɔnɔ xexe lɔ susuwo do.* 4 Vɔ hwenu azan ci Mawu ɖo ɖɛ vasun ɔ, édɔ eviɛ ɖaɖa yí nyɔnu ɖeka ci yí le gɔnmɛ nɔ ese lɔ ji, 5 keŋ nɔ atɛnŋ axwle mɛ ciwo yí le ese lɔ gɔnmɛ yí ahwlɛn wo gan yí woaxɔ mì shigbe eviwo nɛ.

6 Ecɛyɛ ci mínyi eviwoɔ, Mawu dɔ Eviɛ gbɔngbɔn ɖaɖa mìwo jiwo mɛ yí edokɔ axwa mɔ:“Abba,* Eda!” 7 Eyi taɖo dègbenyi hwashi o, vɔ evi ènyi yí ci ènyi Mawu viɔ, Mawu ana cinɔ eo.

8 Vɔ ci mídejeshi Mawu saɔ, mínyi hwashiwo nɔ ŋciwo yí denyi mawu ŋtɔŋtɔwo o. 9 Vɔ ecɛyɛ ci mívajeshi Mawu ɖɛ alo ci Mawu vajeshi mí ɖɛ ɖe, nyi yí taɖo mígbetrɔ kpe xexeɛ mɛ nugbaliwo koɖo enumaɖotawo gbɔ yí jikɔ mɔ yewoagbenyi hwashiwo nɔ woɔ? 10 Mísɔnɔ ŋkeke ɖewo, wleci ɖewo, hwenu ɖewo, koɖo exwe ɖewo mɔ wole veviɖe wu kpɛtɛwo. 11 Ŋvɔnvɔn do nu nɔ mí, ɖo agbla ciwo ŋje do ta nɔ mí tɛnŋ nyi enugbali.

12 Nɔviwo, ŋɖekɔ kuku nɔ mí mɔ, míwo le trɔ nyɛ han. Ðo sasaɔ, nyɛ can ŋle shigbe lé míle yɛ nɛ. Mídeje agɔ ɖe doŋ o. 13 Vɔ mínya mɔ hwenu ŋble yí emɔ hun nɔŋ ŋkɔtɔ yí ŋnu eŋɛnywi lɔ nɔ mí. 14 Eyi ci anyi lanmɛ lɔ na yí mícaka can ɔ, mídegbaliŋ o yí anyi nu denyɔŋ nɔ mí o,* vɔ míxɔŋ shigbe mawudɔla nɛ alo shigbe Kristo Yesu nɛ. 15 Fini jijɔ ci míkpɔ sa lɔ le yɛɔ? Ðo ŋkando ji mɔ, nɔ míasun ji saɔ, míaɖe míwo ŋkuviwo yí asɔ wo jo nɔŋ. 16 Ecɛyɛ ci ŋto nyɔnɔnwi nɔ mí taɖo ŋvatrɔ míwo ketɔnɔa? 17 Mɛɖewo jekɔ agbla veviɖe keŋ adɔn mí do wowoɖekiwo nu, vɔ de susu nywi taɖo yɔ o. Wojikɔ adɔn mí so ŋnu keŋ nɔ míaji veviɖe mɔ yewoakplɔ wo do. 18 Vɔ denyina mɔ mɛɖe asɔ susu nywi yí aji veviɖe mɔ yeadɔn mí do yiɖeki nu o, gan denyi hwenu ŋle mí gbɔ ɖekɛ yí awɛ ahan o. 19 Vinyɛ veviwo, ŋkpɔtɔ seseɛ vevi do mí nu shigbe lé evidɔmɛ ɖunɔ nyɔnu funɔ nɛ keke je hwenu yí míaɖo Kristo nɔnɔmɛ han. 20 Édrodroɔŋ mɔ nale mí gbɔ yɛ sa yí axo nuxu nɔ mí do alɔkpa bu ji, ɖo ŋdegbenya lé nawa míwo nyɔ do o.

21 Mínu nɔŋ mase, míwo ciwo yí ji mɔ yewoawa do ese lɔ ji ɖe, mídenya enyɔ ci Ese lɔ nu ba? 22 Le kpɔwɛ mɛ, woŋwlɛ ɖɛ mɔ evi ŋsuvi amɛve le Abrahamu shi, ɖeka nɔlɔ nyi hwashi yí xlɔtɔ nɔlɔ yɛle vovo mɛ. 23 Nyɔnu hwashi lɔ ji vi shigbe lé wojinɔ eviwo pleŋ do nɛ, vɔ nyɔnu ci yí le vovo mɛ yɛji vi sɔgbe koɖo egbe ci Mawu ɖo. 24 Enujɔjɔ cɛwo nyi kpɔwɛ ci yí ɖo gɔnmɛsese bu. Nyɔnu cɛwo le dumɛ nɔ enublabla amɛve. Wowa enublabla ɖeka le Sinai To ji yí mɛ ciwo yí le nublabla lɔ gɔnmɛ nyi hwashiwo, enublabla cɛ le shigbe Aga nɛ. 25 Aga le dumɛ nɔ Sinai ci yí nyi Arabi to ɖeka. Aga sɔ koɖo Ʒerusalɛmu ci yí li gbɛ, ɖo yɛ koɖo eviɛwo nyi hwashiwo. 26 Vɔ Ʒerusalɛmu ci yí le jeŋkwi mɛ yɛle vovo mɛ, eyi nyi mìwo nɔ.

27 Ðo woŋwlɛ ɖɛ mɔ: “Eo nyɔnu konɔ ci yí deji vi kpɔ o, kpɔ̀ jijɔ. Eo nyɔnu ci evidɔmɛ deɖu kpɔ o, dò jijɔ xwa, ɖo nyɔnu ci wogbe viwo sugbɔ wu nyɔnu ci gbɔ yí asu le viwo.” 28 Ecɛyɛɔ, nɔviwo, mínyi gbeɖu lɔ viwo shigbe Izaki nɛ. 29 Vɔ mɛ ci woji shigbe lé wojinɔ eviwo pleŋ do nɛ tɔ yumɛ cici nɔ mɛ ci woji toto gbɔngbɔn lɔ ji, ahan lɔ ele keke vaɖo egbɛ nɛ. 30 Vɔ lé enuŋwlɛŋwlɛ lɔ nuɔ? Émɔ: “Nyà hwashi lɔ koɖo eviɛ, ɖo hwashi lɔ vi daɖu cinɔ koɖo nyɔnu ci yí le vovo mɛ lɔ vi gbeɖe o.” 31 Eyi taɖo nɔviwo, mìdenyi nyɔnu hwashi lɔ viwo o, vɔ nyɔnu ci yí le vovo mɛ viwo yí mìnyi.