Wema Ŋkɔtɔ ci Piɛ Ŋwlɛ
4 Ci Kristo kpe fun le gbaza mɛɔ, míwo can mísɔ susu* ŋmɛ ɖekɛ lɔ bla akpa nɔ míwoɖekiwo, ɖo mɛ ci yí kpe fun le gbaza mɛ mi nuvɔn wawa 2 keŋ nɔ atɛnŋ azan gamɛ ci yí kpɔtɔ ni yí asɔ nɔ agbe le gbaza mɛ asɔ wa Mawu dro yí dagbenyi agbetɔwo drowo o. 3 Ðo vayiɔ, mízan gamɛ sugbɔ yí sɔ wa jukɔnwo mɛ tɔwo drowo hwenu míshin ŋta yí le enudɔndɔn wakɔ* yí ɖo edro vɔn ciwo ji wodatɛnŋ aɖu o yí nunɔ aha sugbɔ yí yinɔ agɔɖuxu ciwo wowanɔ enudɔndɔnwo le yí donɔ ahanunu gbɛ yí gbesɛnnɔ voju nyɔŋwo. 4 Ékpaca wo mɔ mídegbenɔkɔ agbe baɖabaɖa ŋtɔ́wo koɖo wo o, eyi taɖo woxokɔ nuxu vɔnwo so mí nu. 5 Vɔ mɛ cɛwo ajo kɔnŋta nɔ mɛ ci yí le gbesɔsɔ aɖo kojo nɔ amɛleagbuwo koɖo amɛkukuwo. 6 Le nyɔnɔnwi mɛɔ, ecɛ yí dɔ taɖo yí wodra eŋɛnywi lɔ nɔ amɛkukuwo can keŋ nɔ woanɔ agbe le gbɔngbɔn mɛ le Mawu nukpɔkpɔ mɛ, ci woɖo kojo nɔ wo le gbaza mɛ le agbetɔwo nukpɔkpɔ mɛ can.
7 Vɔ vɔvɔnu nɔ enuwo pleŋ gogo. Eyi taɖo susu le nɔ te nɔ mí yí míanɔ zanŋte* nɔ gbedoɖawo wawa. 8 Sɔwu enuwo pleŋ ɔ, mílɔn míwonɔnɔwo veviɖe, ɖo lɔnlɔn cɔnnɔ agɔjeje sugbɔ ji. 9 Míxɔnɔ míwonɔnɔwo mɛdru enyɔmato. 10 Mɛɖekaɖeka le mí mɛ xɔ enunana, eyi taɖo mízin asɔ kpedo míwonɔnɔwo nu shigbe axwejikpɔtɔ nywiwo nɛ nɔ xomɛvu gangan ci Mawu wa to emɔ vovowo ji. 11 Nɔ mɛɖe xokɔ nuxuɔ, le wɛ shigbe Mawu gbɔ yí exɔ enyɔ lɔwo so nɛ. Nɔ mɛɖe wakɔ sɛnsɛndɔɔ, le sɔ ŋsɛn ci Mawu nanɔ sɔ wɛ keŋ nɔ woatɛnŋ akanfu Mawu le enuwo pleŋ mɛ to Yesu Kristo ji. Kanfukanfu koɖo ŋsɛn anyi yitɔ so mavɔ yi mavɔ. Amɛn.
12 Amɛveviwo, tetekpɔ sɛnŋsɛnŋ ciwo yí vakɔ mí ji ŋgbekpaca mí shigbe enumajɔkpɔ ɖe yí jɔjɔ do mí ji nɛ o. 13 Vɔ míkpɔtɔ akpɔkɔ jijɔ ci míkpekpeɛ efun ciwo hanci Kristo kpe keŋ nɔ míatɛnŋ akpɔ jijɔ yí jijɔkpɔkpɔ lɔ agbewugan hwenu woadasɛ yi le kanfukanfu yitɔ mɛ. 14 Nɔ wodokɔ ŋkpɛn mí do Kristo ŋkɔ ŋciɔ, míkpɔnɔ jijɔ, ɖo kanfukanfu gbɔngbɔn lɔ, ɛɛ, Mawu gbɔngbɔn lɔ le mí ji.
15 Vɔ mɛɖekpokpui ŋgbekpekɔ fun le mí mɛ yí anyi ci ewu amɛ alo fi efi alo wa nuvwin alo ci edokɔ nu mɛbuwo nyɔ mɛ yí dɔ o. 16 Gan nɔ mɛɖe kpekpeɛ fun do Kristotɔ ci enyi ŋciɔ, ŋgbewa ŋkpɛn ni o; vɔ le kpɔtɔ akanfukɔ Mawu, ci ŋkɔ cɛ kpɔtɔ le nu. 17 Ðo ega xo yí woatɔ kojo ɖoɖo so Mawu xwe lɔ ji. Ecɛyɛ nɔ wotɔɛ so mìwo ji doŋkɔ ɖe, lé avanyi do nɔ mɛ ciwo yí dewakɔ do eŋɛnywi Mawu tɔ lɔ jiɔ? 18 “Eyi nɔ égbɔnnu gbɔxwe wohwlɛn amɛjɔjɔɛ gan ɖe, lé avanyi do nɔ mɛ ci yí devɔnnɔ nɔ Mawu koɖo nuvɔnwatɔɔ?” 19 Eyi taɖo mɛ ciwo yí kpekpeɛ fun ci wole Mawu dro wakɔ ŋciɔ, wo le kpɔtɔ asɔ wowoɖekiwo* dodoɔ alɔ̀ mɛ nɔ Gbɛɖotɔ egbejinɔtɔ lɔ yí ale enunywi wakɔ.