Wema Amɛvetɔ ci Woŋwlɛ Ðaɖa Korɛntitɔwo
8 Ecɛyɛɔ, nɔviwo, mìji mɔ mìanu lé Mawu wa xomɛvu gangan nɔ hamɛ ciwo yí le Maseduani do nɔ mí. 2 Ci wole tetekpɔ sɛnŋsɛnŋ mɛ yí je abɔ sugbɔ can ɔ, wokpɔ jijɔ manumanu yí na enuwo xomɛvutɔ.* 3 Ðo wona enu ci ji wokpe, ɛɛ, ŋɖokɔ kpe yi ji mɔ wona yí ewugan ci ji wosun ŋtɔkpu can. 4 Wowoŋtɔwo vakpɔ mì yí ɖe kuku veviɖe mɔ, mìwo le lɔn nɔ yewo can ana ŋɖe yí asɔ do alɔ̀ amɛkɔkɔɛwo.* 5 Wowa wu lé mìwo kpɔkɔ emɔ do. Wosɔ wowoɖekiwo jo nɔ Axwetɔ doŋkɔ yí gbesɔ wowoɖekiwo jo nɔ mì le Mawu dro lɔ mɛ. 6 Eyi taɖo mìdokɔ ŋsɛn Titu mɔ, ci enyi eyɛ yí tɔ xomɛvu nunana lɔwo xɔxɔ le mí gbɔɔ, le ɖegbɔ ni. 7 Míwanɔ nushianu nywiɖe, míwo xɔse sɛnŋ, míkpe ji yí xonɔ nuxu nywiɖe, míɖo nunya sugbɔ, mídonɔ vevi nu le enuwo pleŋ mɛ, mílɔnnɔ amɛwo shigbe lé mìwo can mìlɔn mí nɛ, eyi taɖo míkpɔtɔ ananɔ nu xomɛvutɔ hɛnnɛ.
8 Denyi ese ŋdokɔ nɔ mí ci ŋnukɔ ahan o, vɔ nɔ míanya lé mɛbuwo dokɔ vevi nu do yí agbekpɔ lé lɔnlɔn ci míɖo nyi nyɔnɔnwitɔ do. 9 Ðo míjeshi xomɛvu gangan mìwo Xwetɔ Yesu Kristo tɔ; ci enyi dɔkunɔ can ɔ, évatrɔ abɔnɔ do míwo ŋci keŋ nɔ míatɛnŋ atrɔ dɔkunɔwo to abɔjeje yitɔ ji.
10 Enyɔ ci ŋkpɔ yí anu so nyɔ cɛ nu ke: Míwoŋtɔwo nyɔna yí ecɛ nyi; ɖo so exwe ɖeka han keɔ, denyi tɔ mítɔ edɔ lɔ ji kpoŋ yɔ o, vɔ míji veviɖe mɔ yewoawɛ hɛnnɛ. 11 Eyi taɖo, míɖegbɔ nɔ edɔ ci mítɔ; nɔ míwɛ ahan ɔ, míaɖegbɔ ni sɔgbe koɖo enu ci yí le mí shi shigbe lé míɖo edro lɔ le tɔtɔmɛ nɛ. 12 Ŋci wona so ji mɛ yí jɔnɔ ji nɔ Mawu, ɖo denyi ŋci ji wodesun yí Mawu jinɔ mɔ wo le na o, vɔ ci ji wosun yí ejinɔ. 13 Ŋdeji mɔ yɛ le nɔ fafɛɖe nɔ mɛbuwo gan yí agbɔnnu nɔ míwo o. 14 Vɔ nɔ etasɔsɔ ani yí ŋciwo yí sugbɔ le míwo gbɔ yɛ atɛnŋ akpɔ eʒan wowotɔwo gbɔ. Ahanke ŋciwo yí sugbɔ le wowo gbɔ akpɔ míwo ʒanwo gbɔ hɛnnɛ, eyi etasɔsɔ ani pleŋpleŋ, 15 shigbe lé woŋwli ɖɛ nɛ mɔ: “Mɛ ci shi enu sugbɔ leɔ, desugbɔ ni glo o yí mɛ ci shi enu hwɛɖeka leɔ, dehwe ni sugbɔ o.”
16 Akpe nɔ Mawu mɔ, ésɔ edro lɔ do ji mɛ nɔ Titu nɔ asɔ ɖe le ji nɔ mí veviɖe shigbe lé mìwo can sɔ ɖe le ji nɔ mí veviɖe nɛ. 17 Ðo éwa do enyɔ ci mìnu ni ji, vɔ ci ejikɔ mɔ yeawa enu ci mìdɔɛɔ, yiŋtɔ dro mɛ yí egbɔkɔ mí gbɔ le. 18 Vɔ mìdɔkɔ nɔviŋsu ɖeka bɔdo nu, wokannɔfu nɔvi cɛ le hamɛwo pleŋ mɛ sɔ kudo enu ci ewakɔ do eŋɛnywi lɔ tamɛ ŋci. 19 Denyi ŋtɔ́ ɖekɛ yɔ o, vɔ hamɛwo yí sɔɛ hɛnnɛ nɔ azɔnnɔ emɔ koɖo mì hwenu mìakpekpeɛ ŋkuvi do xomɛvu nunanadɔ cɛ nu. Edɔ cɛ kanfukɔ Axwetɔ lɔ yí gbedadasɛ lé mìle gbesɔsɔ yí akpedo amɛ nu do. 20 Mìwɛkɔ ahan keŋ nɔ mɛɖe ŋgbevakpɔ afɛn ɖe so enunana faa dɔ cɛ ci nu mìkpekpeɛ ŋkuvi do nu o. 21 Ðo ‘mìkpekpeɛ ŋkuvi do enushianu nu le nyɔnɔnwitoto mɛ, denyi Yehowa* ŋmɛ ɖekɛ mìwakɔ ahan le o, vɔ mìwɛkɔ ahan le agbetɔwo ŋmɛ hɛnnɛ.’
22 Gbesɔ kpe niɔ, mìdɔdɔ mìwo nɔvi bu bɔdo wo nu hɛnnɛ. Mìdui kpɔ le enu sugbɔ mɛ yí kpɔ mɔ yɛsɔnɔ zo do enu nu; vɔ ecɛyɛɔ, égbesɔsɔ zo do enu nu sɔwu, ɖo ékando mí ji sugbɔ. 23 Vɔ nɔ mɛɖe biɔ enyɔ ɖe se so Titu nuɔ, anyi bɔdonutɔ ci yí wakɔ edɔ ɖekɛ koɖoŋ nɔ míwo nyɔna yí enyi, alo nɔ mɛɖe biɔ enyɔ se so mìwo nɔviŋsu lɔwo nuɔ, apotruwo yí wonyi nɔ hamɛwo yí kanfukɔ Kristo. 24 Eyi taɖo mídasɛ nɔ wo mɔ, yewolɔn wo yí agbena nɔ hamɛ lɔwo akpɔ enu ci yí taɖo mìsɔ mí sɔ yikɔ go.