Wema Amɛvetɔ ci Woŋwlɛ Ðaɖa Tɛsalonikitɔwo

1 Enyɛ Pɔlu, Silvɛn* koɖo Timɔte yí ŋwlɛkɔ wema cɛ ɖaɖa hamɛ ci yí le Tɛsaloniki yí nyi Mawu mìwo Da koɖo Axwetɔ Yesu Kristo tɔ.

2 Mawu ci yí nyi Eda koɖo Axwetɔ Yesu Kristo le wa xomɛvu gangan nɔ mí yí agbena fafa mí.

3 Nɔviwo, éle dandan mɛ mɔ mìadonɔ akpe nɔ Mawu gashiagamɛ do ta nɔ mí. Ésɔgbe ahan, ɖo míwo xɔse shinkɔ doji yí lɔnlɔn ci mɛɖekaɖeka le mí mɛ ɖo nɔ yi kpena sɛnkɔŋ doji. 4 Ecɛ wɛ mɔ mìsɔ mí sɔ yikɔ go le Mawu hamɛ lɔwo mɛ; ɖo ci mítotoɔ yumɛcici koɖo cukaɖawo mɛ can ɔ, mídodoɔ ji yí kpɔtɔ kankando Mawu ji. 5 Ecɛ nyi kpeɖoji nɔ kojojɔjɔɛɖoɖo Mawu tɔ, ádɔ yí woakpɔ mí mɔ mínyi nu yí anɔ Mawu Fyɔɖuxu ci tamɛ míɖuɖuɔ aya do lɔ mɛ.

6 Ci Mawu wanɔ enujɔjɔɛɔ, ádɔn to nɔ mɛ ciwo yí dokɔ vevisese nɔ mí. 7 Vɔ míwo ciwo yí le aya ɖukɔ le cukaɖawo mɛɔ, woafa akɔn nɔ míwo koɖo mìwo hwenu yí woadasɛ Axwetɔ Yesu so jeŋkwi mɛ koɖo yi dɔdɔla sɛnŋsɛnŋwo 8 le ezojejewo mɛ, eyi adɔn to nɔ mɛ ciwo yí dejeshi Mawu koɖo mɛ ciwo yí deɖokɔ to eŋɛnywi mìwo Xwetɔ Yesu tɔ lɔ o. 9 Mìwo Xwetɔ aɖo kojo nɔ mɛ cɛwo, eto ci woadɔn nɔ wo yí nyi mɔ woagu wo swi tɛgbɛɛ yí woabu le ŋkɔ nɔ yɛ koɖo yi ŋsɛn gangan lɔ. 10 Hwenu woakanfu mìwo Xwetɔ koɖo yi mɛkɔkɔɛwoɔ, mɛ ciwo pleŋ yí xɔɛ ji se akpɔɛ yí ajiŋ nɔ wo. Eyi ci míkando enyɔ ciwo yí mìnu nɔ mí jiɔ, míwo can míanɔ wo mɛ.

11 Ecɛ yí dɔ taɖo mìdonɔ gbe ɖaɖa do ta nɔ mí hweɖekpokpuinu keŋ nɔ mìwo Mawu atɛnŋ akpɔ mí do mɛ ciwo yí ayɔ ji yí azan yi ŋsɛn gangan lɔ asɔ wa enunywi ciwo pleŋ eji mɔ yeawa. Ágbewɛ yí xɔsedɔ míwotɔwo amlɛ nywiɖe. 12 Ényi ahan keŋ nɔ woakanfu mìwo Xwetɔ Yesu ŋkɔ le mí mɛ yí agbekanfu míwo can, ɖo míle ju koɖi yí enyi xomɛvu gangan yí mìwo Mawu koɖo Axwetɔ Yesu Kristo wa nɔ mí ahan.