Wema Amɛvetɔ ci Woŋwlɛ Ðaɖa Korɛntitɔwo

10 Enyɛ Pɔlu, ŋsɔ xomɛfafa koɖo adɔnusoswi Kristo tɔ xokɔ nuxu nɔ mí. Mɛɖewo nukɔ mɔ nɔ ŋle mí gbɔɔ, nyɛŋɖyinɔ mɛ ci yí kle, vɔ yí gbenɔ dɔn nɔ ŋdele mí gbɔ o. 2 Ŋɖekɔ kuku nɔ mí mɔ míŋgbena nɔ ŋva mí gbɔɔ, magbe dɔn asɔ gbeta sɛnŋsɛnŋ ciwo ŋdrɔdrɔ do mɛɖewo ciwo yí kpɔnɔ mì mɔ mìzɔnkɔ le gbaza mɛ nu o. 3 Ðo nɔ mìzɔnkɔ le gbaza mɛ can ɔ, mìdewakɔ ahwa le gbaza mɛ o. 4 Ahwawanu mìwotɔwo denyi gbaza mɛ tɔ o, vɔ wonyi ahwawanu sɛnŋsɛnŋ ciwo yí Mawu sɔ na mì keŋ nɔ mìasɔ mu enu ciwo yí do ke sɛnŋsɛnŋɖe xwin. 5 Ðo enu ciwo mìmukɔ xwin yí nyi susu koɖo ŋɖekpokpui ci yí cukɔ emɔ nɔ amɛwo yí woajeshi Mawu yí eglo, mìdɔnnɔ susu ɖekpokpui vɛ keŋ nɔ anyi hwashi yí ase tonu nɔ Kristo. 6 Eyi mìle gbesɔsɔ yí adɔn to nɔ tonumasetɔ ɖekpokpui nɔ míwo wa ɖaŋ se tonu vɛ.

7 Míkpɔnɔ nuwo shigbe lé wole do le agogbe nɛ. Nɔ mɛɖekpokpui kando ji mɔ yenyi Kristo tɔɔ, le trɔ agbebu nyɔ cɛ kpɔ: Shigbe lé enyi Kristo tɔ nɛɔ, ahanke mìwo can nyi yitɔ nɛ. 8 Axwetɔ lɔ na acɛ mì mɔ mìwo le sɔ do ŋsɛn mí yí denyi mɔ mìasɔ dahɛn nu le mí nu o; vɔ nɔ ŋsɔ acɛ ŋtɔ́ sɔ yi go hwɛɖeka can ɔ, ŋdaɖu ŋkpɛn o. 9 Ŋdeji mɔ le wa nɔ mí shigbe mɔ ŋŋwlɛkɔ wemawo ɖaɖa keŋ asɔ do vɔnvɔn nɔ mí nɛ o. 10 Ðo wonukɔ mɔ: “Enyɔ ciwo yí nɔnɔ wema ciwo eŋwlɛnɔ ɖaɖa mɛ kpɛnnɔ yí ɖonɔ ŋsɛn. Vɔ nɔ yiŋtɔ vaɔ, amɛklekli ɖeka enyi yí yi nuxuwo deɖonɔ ta o.” 11 Mɛ ciwo yí nukɔ ahan le nya mɔ, enu ciwo mìŋwlɛnɔ ɖaɖa mí hwenu mìdele mí gbɔ lɔwo ke yí mìawa nɔ mìva mí gbɔ. 12 Ðo mìdegbe dɔn yí hlɛnnɔ mìwoɖekiwo do mɛɖewo mɛ alo sɔ mìwoɖekiwo sɔnɔ kpɔ koɖo mɛɖewo ciwo yí kannɔfu wowoɖekiwo o, vɔ ci wosɔ wowonɔnɔwo sɔ dredreɛ do wowoŋtɔwo nu yí gbesɔ wowoŋtɔwo sɔ sɔsɔ kpɔ koɖo wowonɔnɔwoɔ, enumɛmɔŋje hwedo wo.

13 Gan mìdayi go zeto mìwo lixowo nu o, vɔ fini Mawu kan nɔ mì yí mìayi go sɛn yí fini wokan nɔ mì lɔ keke bonu va míwo can gbɔ. 14 Le nyɔnɔnwi mɛɔ, mìdezeto lixowo nu yí va mí gbɔ shigbe mɔ mídele fini wokan nɔ mì mɛ hannɛ o, ɖo mìwo yí nyi amɛ ŋkɔtɔ ciwo yí va keke mí gbɔ yí hɛn eŋɛnywi ci yí kuso Kristo nu vɛ nɔ mí. 15 Gbeɖe, denyi egbla ciwo yí mɛbu do le mìwo lixowo godu yí mìsɔ le ego yikɔ o, vɔ mìkpɔkɔ emɔ mɔ nɔ xɔse míwotɔ kpɔtɔ gangankɔ dojiɔ, edɔ ci mìwa le fini wokan nɔ mì lɔ can agangankɔ doji. Eyi mìakpɔtɔ awakɔ sugbɔ doji, 16 keŋ atɛnŋ adra eŋɛnywi lɔ le eju ciwo yí denyi míwotɔwo mɛ, nɔ mìŋgbevasɔ edɔ ci mɛbu wa vɔ le fini wokan ni asɔ yi go o. 17 “Vɔ mɛ ci yí yikɔ goɔ, le yi go mɔ yejeshi Yehowa.”* 18 Ðo denyi mɛ ci yí kanfukɔ yiɖeki nu yí kpenɔ nɔ Yehowa* o, vɔ mɛ ci yiŋtɔ kanfu nu yí kpenɔ ni.