Wema Ŋkɔtɔ ci Woŋwlɛ Ðaɖa Timɔte
3 Nyɔnɔnwi yí nyɔ cɛ nyi: Nɔ ŋsu ɖe jijiɛ mɔ yeanyi enujikpɔtɔɔ,* edɔ nywi yí druikɔ. 2 Wodeɖo akpɔ enyɔ ɖe anu so enujikpɔtɔ nu o, áɖe nyɔnu kuɖeka, áwanɔ nu le dredrenu, susu ale te ni,* áwanɔ nu le totonu, áxɔnɔ amɛwo mɛdru, ásun ji akplanɔ nu amɛ. 3 Deɖo anyi ahanumutɔnɔ alo danuwatɔ* o, vɔ ásenɔ enu gɔnmɛ yí dawanɔ vu o, dalɔnnɔ eho hɛnnɛ o, 4 éɖo anyi mɛ ci yí hɛnnɔ yi xomu nywiɖe* yí eviɛwo asɔ wowoɖekiwo hwenɔ nyɔnɔnwimɛtɔ keŋkeŋ, 5 (ɖo nɔ mɛɖe denya lé ahɛn yiŋtɔ xomu* do ɖe, lé awɛ ale bu nɔ Mawu hamɛ lɔɔ?), 6 deɖo anyi mɛ ci yí trɔ ji mɛ yoyu o, keŋ nɔ ŋgbevatɔ ego yiyi yí woadɔn eto ni shigbe lé wodɔn to nɔ Legba nɛ o. 7 Ahanke mɛ ciwo yí dele hamɛ lɔ mɛ can ɖo aɖenɔ kunu nywi so nu* nɛ keŋ nɔ woŋgbedo hwɛ ɖe yi* yí aje Legba fɛnca mɛ o.
8 Nɛnɛke hamɛmɛshinshinwo kpedonutɔwo ɖo anyi mɛ ciwo yí donɔ vevi nu, wodeɖo aɖo aɖezɛnve o,* wodanunɔ aha sugbɔ o, wodasɔ ŋbia tafunɔ amɛwo do keŋ akpɔ eho o. 9 Woanɔnɔ gbeji nɔ enyɔwlawla kɔkɔɛ xɔse lɔ tɔ koɖo ayexa mɛmi.
10 Gbesɔ kpe niɔ, woado mɛ cɛwo kpɔ doŋkɔ kpɔ mɔ woawɛ dru ma, eyi nɔ wodekpɔ nyɔ ɖe so wo nuɔ, wo le wa sɛnsɛndɔ lɔ.
11 Ahanke nyɔnuwo can ɖo anyi mɛ ciwo yí donɔ vevi nu, wodanyi eɖyixoamɛtɔwo o, woawanɔ nu le dredrenu yí anɔnɔ gbeji le enuwo pleŋ mɛ.
12 Hamɛmɛshinshinwo kpedonutɔwo ɖo aɖe nyɔnu kuɖeka yí ahɛnnɔ wowo viwo koɖo wowo xwemɛtɔwo nywiɖe. 13 Ðo ŋsu ciwo yí wa ɖaŋ wakɔ sɛnsɛndɔ lɔ nywiɖeɔ, amɛwo xonɔ nuxu nywi so wo nu yí wovonɔŋ fɛɛ yí xonɔ nuxu so lé woxɔ Kristo Yesu ji se do nu.
14 Ci ŋwakɔ toto mɔ nava eo gbɔ le majinjinɖe mɛ can ɔ, ŋŋwlɛkɔ enu cɛwo ɖaɖa eo 15 keŋ nɔ ŋdevava kabaɔ, nànya lé àzan eoɖeki do le Mawu xwe ci yí nyi Mawu agbuagbu lɔ hamɛ lɔ mɛ, eyi nyi xɔdomɛci nɔ nyɔnɔnwi lɔ yí li do te. 16 Le nyɔnɔnwi mɛɔ, egbejinɔnɔ nɔ Mawu nyɔwlawla kɔkɔɛ cɛ gangan haan: ‘Wodasɛ yi le gbaza mɛ, wokpɔɛ do amɛjɔjɔɛ ji le gbɔngbɔn mɛ, édasɛ yiɖeki nɔ mawudɔlawo, woɖe kunu so nu le jukɔnwo mɛ, woxɔɛ ji se le xexe lɔ mɛ, woxɔɛ do jeŋkwi mɛ le kanfukanfu mɛ.’