Wema Ŋkɔtɔ ci Woŋwlɛ Ðaɖa Korɛntitɔwo

7 Ecɛyɛ ŋjikɔ axo nuxu so enyɔ ciwo yí míŋwlɛ wema ɖaɖa yí biɔŋ se nu, enyɔ mɔ ŋsu datɔ alɔ̀ nyɔnu o.* 2 Vɔ ci mateliwawa* vasukɔgbɔ dojiɔ, ŋsu ɖekaɖeka le ɖe yi nyɔnu yí nyɔnu ɖekaɖeka le ɖe yi su. 3 Ŋsu le sɔ ŋci yí nyi ashiɛ tɔ sɔ jo ni yí nyɔnu can le sɔ ŋci yí nyi asuɔ tɔ sɔ jo ni. 4 Nyɔnu deɖo acɛ do yiŋtɔ lankpu ji o, vɔ asuɔ yí ɖo acɛ do ji; nɛnɛke ŋsu can deɖo acɛ do yiŋtɔ lankpu ji nɛ, vɔ ashiɛ yí ɖo acɛ do ji. 5 Míŋgbetekɔ míwoɖekiwo míwonɔnɔwo nɔ denyi kpɔ mɔ míbɔ yí lɔn do hwenu ɖe ji yɔ o, nɔ míatɛnŋ akpɔ gamɛ yí adonɔ gbe ɖaɖa yí atɛnŋ agbevanɔ ju ke, keŋ nɔ Satana ŋgbevatekɔ mí kpɔ nɔ ci mídetɛnŋ yí lekɔ míwoɖekiwo do mɛ o. 6 Míatɛnŋ awa do enyɔ ci ŋnu nɔ mí yɛ ji, gan de ese yí enyi yí ŋdokɔ nɔ mí o. 7 Vɔ naji mɔ amɛshiamɛ le nɔ shigbe nyɛ nɛ, ganŋkegan mɛɖekamɛɖeka xɔ enunana yitɔ so Mawu gbɔ. Éna ecɛ mɛɖe yí na ebu mɛbu.

8 Ecɛyɛ ŋnukɔ nɔ mɛ ciwo yí deɖe nyɔnu alo mɛ ciwo yí deɖe asu o koɖo kposhuwo mɔ, yɛanyɔ nɔ wo sɔwu nɔ wokpɔtɔ le shigbe enyɛ nɛ. 9 Vɔ nɔ wodetɛnŋ yí lekɔ wowoɖekiwo do mɛɔ, wo le ɖe nyɔnu alo aɖe asu, ɖo enyɔ mɔ woaɖe nyɔnu alo aɖe asu sɔwu mɔ woaɖoɖoɔ amɛgbɔdɔndɔn dro ci yí awukɔgan amɛ.

10 Ŋnakɔ enukplamu cɛwo mɛ ciwo yí ɖe nyɔnu alo ɖe asu, vɔ denyi enyɛ yɔ o, Axwetɔ lɔ yɔ. Nyɔnu deɖo aso le asuɔ gbɔ o. 11 Vɔ nɔ éso le asuɔ gbɔɔ, ŋgbeɖe mɛbu o alo le trɔgbɔ va asuɔ gbɔ; eyi ŋsu can deɖo aso le ashiɛ gbɔ o.

12 Ŋnukɔ nyɔ cɛ nɔ mɛkpɛtɛwo, ɛɛ enyɛ yɔ, denyi Axwetɔ lɔ yɔ o: Nɔ nɔviŋsu ɖe ashiɛ nyi maxɔsetɔ gan yí lɔn mɔ yeanɔ gbɔɔ, ŋgbeso gbeɖi ɖɛ o. 13 Eyi nɔ nyɔnu ɖe su nyi maxɔsetɔ gan yí ŋsu lɔ lɔn mɔ yeanɔ gbɔɔ, nyɔnu lɔ ŋgbeso gbeɖi ɖɛ o. 14 Ðo nyɔnu lɔ taɖo yí woakpɔ ŋsu maxɔsetɔ lɔ do amɛkɔkɔɛ ji. Ahanke nɔviŋsu lɔ taɖo yí woakpɔ nyɔnu maxɔsetɔ lɔ do amɛkɔkɔɛ ji hɛnnɛ nɛ. Nɔ denyi ahan ɔ, míwo viwo anyi amɛmakɔmakɔwo; vɔ ecɛyɛɔ, wole kɔkɔɛɖe. 15 Vɔ nɔ maxɔsetɔ lɔ mɔ yeasoɔ, le so yi. Nɔ evajɔ ahan ɔ, nɔviŋsu lɔ alo nɔvinyɔnu lɔ damɔ kokoko yeɖo anɔ gbɔ o, vɔ Mawu yɔ mí nɔ míanɔ fafa mɛ. 16 Nyɔnu, lé àwɛ anya nɔ enyi eo yí ahwlɛn asuo gan ɔ? Alo ŋsu, lé àwɛ anya nɔ enyi eo yí ahwlɛn ashio gan ɔ?

17 Ci enyi ahan yɔ can ɔ, mɛɖekaɖeka le kpɔtɔ anɔkɔ agbe sɔgbe koɖo nɔnɔmɛ ci mɛ ele hwenu yí Yehowa* yɔɛ. Enukplamu cɛ yí ŋna le hamɛ lɔwo pleŋ mɛ. 18 Mɛɖe so vo gbɔxwe yí woyɔɛa? Le kpɔtɔ anɔ ahan. Mɛɖe nyi tɔtɔnɔ gbɔxwe yí woyɔɛa? Ŋgbemɔ yeaso vo o. 19 Evososo denyi ŋɖe o, evomasomaso can denyi ŋɖe o, vɔ wawa do Mawu sewo ji yí nyi enuvevitɔ. 20 Lé mɛɖe le do gbɔxwe woyɔɛɔ, le kpɔtɔ anɔ ahan. 21 Hwashi ènyi hwenu woyɔ eoa? Ŋgbeɖe fun nɔ eo o, vɔ nɔ emɔ hun nɔ eo yí àje vovo mɛɔ, ŋgbelɔn nɔ ayi te eo o. 22 Ðo mɛ ci yí nyi hwashi hwenu Axwetɔ lɔ yɔɛɔ, éxɔ vovo le Axwetɔ lɔ mɛ; ahanke mɛ ci yí le vovo mɛ gbɔxwe woyɔɛ nyi hwashi nɔ Kristo nɛ. 23 Eho blebu wosɔ xwle mí; míŋgbenyi hwashi nɔ agbetɔwo ke o. 24 Nɔviwo, lé mɛɖe le do gbɔxwe woyɔɛɔ, le kpɔtɔ anɔ ahan le ŋmɛ nɔ Mawu.

25 Ecɛyɛɔ, denyi Axwetɔ lɔ gbɔ yí ŋxɔ ese so nɔ mɛ ciwo yí dekpɔ ɖe nyɔnu alo ɖe asu o,* vɔ nyɛŋtɔ susu yí ŋnukɔ shigbe mɛ ci Axwetɔ lɔ ku ŋshishi nɔ nɛ, ɖo ŋle gbeji ni. 26 Eyi taɖo ŋkpɔ mɔ, lé enu lɔ gbɔngbɔnnu do yɛɔ, anyɔ mɔ amɛ akpɔtɔ anɔ le ele. 27 Nɔ nyɔnu le eo shiɔ, ŋgbemɔ yeaso gbeɖi ɖɛ o. Nɔ dèɖe nyɔnu hɔɖoɔ, ŋgbemɔ yeaɖe o. 28 Vɔ nɔ èɖe asu alo ɖe nyɔnuɔ, dèje agɔ o. Eyi nɔ mɛ ci yí deyi ŋsu gbɔ alo nyɔnu gbɔ kpɔ ɖe asu alo ɖe nyɔnuɔ, deje agɔ hɛnnɛ o. Gan mɛ ciwo yí ɖe nyɔnu alo ɖe asu ado go cukaɖawo.* Vɔ ŋji mɔ makpedo mí nu nɔ míaze nɔ cukaɖa ŋtɔ́wo.

29 Gbesɔ kpe niɔ, nɔviwo, ŋnukɔ nɔ mí mɔ gamɛ ci yí kpɔtɔ degbenyi ŋɖe o. Tɔ so evyɛɔ, mɛ ciwo yí ɖe nyɔnu le nɔ shigbe mɔ wodeɖe nyɔnu nɛ. 30 Eyi mɛ ciwo yí le avin fankɔ le nɔ shigbe wodele avin fankɔ hannɛ yí mɛ ciwo yí kpɔkɔ jijɔ le nɔ shigbe wodekpɔkɔ jijɔ hannɛ, eyi mɛ ciwo yí xwlexwleɛ nu le nɔ shigbe ŋɖe dele wo shi hannɛ. 31 Mɛ ciwo yí zanzan enu ciwo yí le xexe lɔ mɛ le nɔ shigbe mɛ ciwo yí dezanzan wo pleŋpleŋ nɛ, ɖo lé enuwo le do le xexe cɛ mɛ trɔkɔ. 32 Le nyɔnɔnwi mɛɔ, ŋji mɔ míami enu lolo kpɔ. Axwetɔ nuwo yí xanɔ mɛ ci yí deɖe nyɔnu o, ɖo éji mɔ ye nu le kpe nɔ Axwetɔ lɔ. 33 Vɔ xexe mɛ nuwo yí xanɔ mɛ ci yí ɖe nyɔnu, ɖo éji mɔ ye nu le kpe nɔ ye shiye 34 yí ema do ve. Gan Axwetɔ nuwo yí xanɔ nyɔnu ci yí deɖe asu o alo nyɔnu ci yí le alɔ̀ ji keŋ nɔ ale kɔkɔɛɖe le yi gbaza koɖo yi gbɔngbɔn mɛ. Vɔ xexe mɛ nuwo yí xanɔ nyɔnu ci yí ɖe asu, ɖo éjinɔ mɔ ye nu le kpe nɔ ye suye. 35 Míwoŋtɔwo nyɔna taɖo yí ŋnukɔ nyɔ cɛ, denyi nɔ míaxa le míwoɖekiwo mɛ yɔ o,* vɔ ŋji mɔ mado ŋsɛn mí nɔ míawa ŋci yí nyɔ yí asɔ míwoɖekiwo jo nɔ Axwetɔ lɔ keŋkeŋ yí ŋɖe dadɔn míwo susu o.

36 Vɔ nɔ mɛɖe kpɔ mɔ yedewakɔ nu nywiɖe ci ele te asumaɖe alo nyɔnumaɖe gan yí degbenyi jajɛ ahan tɔɔ, ŋci awa ke: Le wa enu ci yí drui; deje agɔ o. Le ɖe asu alo le ɖe nyɔnu. 37 Nɔ mɛɖe ɖui koŋ le yi ji mɛ yí kpɔ mɔ nyɔnuɖeɖe alo asuɖeɖe dewudo ye o, vɔ yí kpe ji yí ɖukɔ yi drowo ji yí ɖui le yiŋtɔ ji mɛ mɔ yeanɔ ahan yí yedaɖe asu alo aɖe nyɔnuɔ, éwɛ nywiɖe. 38 Mɛ ci yí ɖe nyɔnu alo ɖe asuɔ, yɛ can wɛ nywiɖe. Vɔ mɛ ci yí deɖeɔ, yɛwɛ nywiɖe sɔwu.

39 Nɔ ŋsu lɔ vlɛ yí le agbe duuɔ, ese bla ashiɛ do nu. Vɔ nɔ ékuɔ, nyɔnu lɔ vo yí aɖe mɛ ci yí drui. Vɔ éɖo aɖi le Axwetɔ lɔ mɛ. 40 Gan nyɛŋkpɔɛ mɔ eji ajɔɛ sɔwu nɔ éci ahan yí ŋkando ji mɔ Mawu gbɔngbɔn le koɖo nyɛ can hɛnnɛ.