Wema ci Woŋwlɛ aɖa Rɔmatɔwo
16 Ŋji mɔ míwo le wa ɖaŋ axɔ mìwo nɔvinyɔnu Febe ci yí wakɔ sɛnsɛndɔ le Sanŋkre hamɛ lɔ mɛ nywiɖe. 2 Míwa ɖaŋ axɔɛ le Axwetɔ lɔ mɛ shigbe lé woɖo axɔ amɛkɔkɔɛwo nɛ, míakpedo nu le enushianu ci yí awudi mɛ, ɖo yiŋtɔ can kpedo amɛ sugbɔ nu, ékpedo nyɛ can nu.
3 Mído gbe nɔ Priska* koɖo Akilasi, anyi bɔdonutɔwo yí wonyi le Kristo Yesu dɔ lɔ wawa mɛ. 4 Wosɔ wowo gbewo* do afɔku mɛ keŋ yí hwlɛn anyi gbe* gan. Denyi nyɛɖekɛ yí dokɔ akpe nɔ wo o, vɔ amɛmanyiʒuifuwo hamɛwo pleŋ can dokɔ akpe nɔ wo. 5 Mído gbe nɔ hamɛ ci yí le wowo xwe mɛ hɛnnɛ. Mído gbe nɔ anyi xlɔ vevi Epenɛti nɔŋ, yɛ can le amɛ ŋkɔtɔ ciwo yí vatrɔ Kristo nukplaviwo mɛ le Azi.* 6 Mído gbe nɔ Mari ci yí do gbla sugbɔ do ta nɔ mí. 7 Mído gbe nɔ Andronikusu koɖo Ʒuniasi, wonyi anyi xomumɛtɔwo yí nɔ gakpa mɛ koɖoŋ hɛnnɛ, apotruwo jeshi wo ɖɛ nywiɖe yí wonyi Kristotɔwo doŋkɔ nɔŋ.
8 Mído gbe nɔ Anpliatusu nɔŋ, ényi anyi xlɔ vevi le Axwetɔ lɔ mɛ. 9 Mído gbe nɔ Wibɛn, mɛ ci yí wanɔ dɔ koɖo mì le Kristo mɛ. Mído gbe nɔ anyi xlɔ vevi Sitakisi. 10 Mído gbe nɔ Apelɛsi, mɛ ci nu yí kpe nɔ Kristo. Mído gbe nɔ mɛ ciwo yí le Aristobulu xwe mɛ. 11 Mído gbe nɔ anyi xomumɛtɔ Erodiɔn, mído gbe nɔ Nasisi xwemɛtɔ ciwo yí nyi Axwetɔ dokplɔtɔwo. 12 Mído gbe nɔ Trifɛni koɖo Trifozi, nyɔnu cɛwo wa dɔ sɛnsinɖe le Axwetɔ lɔ mɛ. Mído gbe nɔ mìwo xlɔ vevi Pɛsisi, ɖo nyɔnu cɛ can wa dɔ sɛnsinɖe le Axwetɔ lɔ mɛ. 13 Mído gbe nɔ Rufusi, mɛ ci Axwetɔ can yí agbedo gbe nɔ nɔlɔ ci yí nyi enɔ han nɔŋ. 14 Mído gbe nɔ Asɛnkriti, Flegɔn, Ɛmɛsi, Patrobasi, Ɛmasi koɖo nɔvi ciwo yí le wo gbɔ. 15 Mído gbe nɔ Filolɔgi, Ʒuli, Nere koɖo nɔviɛ nyɔnushi sɔ kpe nɔ Olɛnpasi koɖo amɛkɔkɔɛ ciwo pleŋ yí le wo gbɔ. 16 Mísɔ lɔnlɔn ki shi* nɔ míwonɔnɔwo yí ado gbe nɔ míwonɔnɔwo. Kristo hamɛ lɔwo pleŋ do gbe ɖaɖa mí.
17 Ecɛyɛɔ, nɔviwo, ŋdokɔ ŋsɛn mí mɔ míwo le nɔ zanŋte do mɛ ciwo yí hɛnnɔ mama va amɛwo mɛ nu. Mɛ cɛwo dɔ yí xɔse gbɔjɔnɔ nɔ mɛbuwo, wotrɔnɔ kpe enu ciwo míkpla. Mínɔ azɔge nɔ wo. 18 Ðo hwashiwo yí mɛ ŋtɔ́ hanwo nyi. Wodenyi hwashiwo nɔ mìwo Xwetɔ Kristo o, vɔ wonyi hwashiwo nɔ wowoŋtɔwo drowo.* Wonunɔ enyɔviviwo koɖo amɛbleble nyɔwo yí sɔ wunɔ ji nɔ amɛmanyaɖewo. 19 Mɛshiamɛ nya mɔ mísenɔ tonu. Eyi taɖo míwo nu jɔkɔ ji nɔŋ, vɔ ŋji mɔ míwo le nya ŋɖɛ yí awanɔ nunywi yí míŋgbekpla nuvwinwawa o. 20 Ðo Mawu ci yí nanɔ fafa acuku Satana do míwo fɔwo gɔnmɛ hannyahannya sabaɖe. Mìwo Xwetɔ Yesu le wa xomɛvu gangan nɔ mí.
21 Anyi kpena Timɔte ci yí wanɔ dɔ koɖoŋ do gbe ɖaɖa mí. Anyi xomumɛtɔ ciwo yí nyi Lusiwusi, Ʒazɔn koɖo Sosipatrosi can do gbe ɖaɖa mí.
22 Enyɛ Tɛtiu ci yí ŋwlɛkɔ wema cɛ can do gbe ɖaɖa mí le Axwetɔ mɛ.
23 Gayo, mɛ ci gbɔ ŋze yí hamɛ lɔ pleŋ bɔnɔ do yi xwe mɛ do gbe nɔ mí. Eju lɔ ho jikpɔtɔ* Eratu do gbe nɔ mí, nɔviɛ Katusi can do gbe nɔ mí. 24* ——
25 Mawu atɛnŋ ato enyɔ ci ŋnukɔ so Yesu Kristo nu koɖo eŋɛnywi ci ŋdrakɔ ji yí ado ŋsɛn mí. Wovanu ŋɛdu cɛ to enyɔwlawla kɔkɔɛ ci wobɔ nu do so gbeɖegbe ji. 26 Ecɛyɛɔ, mìvase nyɔ lɔ yí woto enyɔ ciwo yí enyɔnuɖɛtɔwo ŋwlɛ do Enuŋwlɛŋwlɛ lɔwo mɛ ji yí nui nɔ mì. Mìwo Mawu mavɔmavɔtɔ lɔ na gbe mɔ wo le nu enyɔ lɔ nɔ jukɔn bu mɛ tɔwo keŋ nɔ woaxɔɛ se yí ase tonu. 27 Woato Yesu Kristo ji yí akanfu Mawu ci ɖekɛ kpaŋ yí nya ŋɖɛ sɔyi mavɔmavɔ. Amɛn.