Wema Ŋkɔtɔ ci Woŋwlɛ Ðaɖa Korɛntitɔwo
12 Ecɛyɛɔ, nɔviwo, kuso gbɔngbɔn mɛ nunanawo nuɔ, ŋdeji mɔ woale manyamanya mɛ nɔ mí o. 2 Mínya mɔ hwenu mínyi maxɔsetɔwoɔ, míbu emɔ yí kplɔ voju ciwo yí dexonɔ nuxu do, míkplɔnɔ wo do yinɔ fishiafi ci wokplɔnɔ mí hɛn yi. 3 Ecɛyɛɔ, ŋji mɔ míanya mɔ mɛɖekpokpui datɛnŋ axo nuxu to Mawu gbɔngbɔn lɔ ji yí anu mɔ: “Yesu nyi mɛ ci wosɛn kpɛn nɔ!” o, eyi mɛɖekpokpui datɛnŋ anu mɔ: “Yesu nyi Axwetɔ!” nɔ denyi gbɔngbɔn kɔkɔɛ lɔ yí kpedo nu o.
4 Enunana hamɛhamɛ yí li, vɔ gbɔngbɔn kuɖeka yí li; 5 sɛnsɛndɔ hamɛhamɛ yí li, vɔ Axwetɔ kuɖeka yí li; 6 eyi edɔ hamɛhamɛ yí li, gan Mawu kuɖeka lɔ yí wakɔ wo pleŋ toto mɛshiamɛ ji. 7 Vɔ gbɔngbɔn lɔ zenɔ le mɛɖekaɖeka mɛ yí enyinɔ nyɔna nɔ mɛshiamɛ. 8 Ðo gbɔngbɔn kuɖeka lɔ ji woto yí na nunya nuxuxoxo* mɛɖe yí gbeto gbɔngbɔn lɔ ke ji yí na enujejeshi nuxuxoxo mɛbu. 9 Woto gbɔngbɔn ɖekɛ lɔ ji yí na xɔse mɛɖe yí to gbɔngbɔn lɔ ke ji yí na edɔ̀dada nunana mɛbu. 10 Wona enujiŋwawa nunana mɛɖe, mɛbu xɔ enyɔnunuɖɛ nunana, mɛbu xɔ enyɔ ciwo yí so gbɔngbɔn mɛ gɔnmɛsese nunana, mɛbu xɔ egbe vovovowo dodo nunana, yí mɛbu xɔ egbewo gɔnmɛɖeɖe nunana. 11 Vɔ gbɔngbɔn kuɖeka lɔ ji woto yí wa edɔ cɛwo pleŋ. Mɛɖekaɖeka xɔ enunana shigbe lé Mawu gbɔngbɔn lɔ ji do nɛ.
12 Agbetɔ lankpu ɖo ŋcinu sugbɔwo, vɔ lankpu kuɖeka lɔ yɔ yí ŋcinu lɔwo pleŋ nyi lankpu kuɖeka lɔ tɔ, ahan lɔ ke yí Kristo lankpu can le nɛ. 13 Ðo woto gbɔngbɔn kuɖeka lɔ ji yí wa ʒinʒindoshimɛ nɔ mì pleŋ le lankpu kuɖeka lɔ mɛ. Nɔ mìnyi Ʒuifuwo alo Grɛkitɔwo, hwashiwo alo mɛ ciwo yí le vovo mɛ can ɔ, gbɔngbɔn kuɖeka lɔ yí mì pleŋ xɔ.*
14 Le nyɔnɔnwi mɛɔ, de ŋcinu kuɖeka yí wosɔ wa lankpu lɔ o, vɔ sugbɔ wosɔ wɛ. 15 Nɔ afɔ nu mɔ, “Ci ŋdenyi alɔ̀ taɖo ŋdegbenyi lankpu lɔ ŋcinu ɖeɔ,” denyi eyi adɔ yí ato le lankpu lɔ ŋcinuwo mɛ o. 16 Eyi nɔ eto nu mɔ, “Ci ŋdenyi ŋkuvi taɖo ŋdegbenyi lankpu lɔ ŋcinu ɖeɔ,” denyi eyi adɔ yí ato le lankpu lɔ ŋcinuwo mɛ o. 17 Nɔ lankpu lɔ pleŋ nyi ŋkuvi sa ɖe, nyi yí woasɔ senɔ tonuɔ? Nɔ yi pleŋ yí nyi eto sa ɖe, nyi yí woasɔ hwɛnnɔ nu kpɔɔ? 18 Vɔ Mawu ɖo ŋcinu lɔwo do lankpu lɔ nu vovovo shigbe lé edrui do nɛ.
19 Nɔ wo pleŋ yí nyi ŋcinu kuɖeka sa ɖe, fini lankpu lɔ yɛaleɔ? 20 Ecɛyɛɔ, ŋcinu lɔwo sugbɔ, vɔ lankpu kuɖeka lɔ yɔ. 21 Ŋkuvi datɛnŋ anu nɔ alɔ̀ mɔ, “Ŋdeʒan eo o,” alo eta datɛnŋ anu nɔ afɔwo mɔ, “Ŋdeʒan mí o.” 22 Vɔ lankpu lɔ ŋcinu ciwo yí wokpɔnɔ mɔ wodenyi ŋɖe can le veviɖe. 23 Mìdonɔ bubu sugbɔ lankpu lɔ ŋcinu ciwo nu mìkpɔ mɔ bubu dele nu. Eyi dɔ mìwa ɖaŋ lenɔ bu nɔ mìwo lankpu lɔ ŋcinu ciwo yí wodekpɔnɔ ahan o. 24 Vɔ mìwo ŋcinu ciwo yí nya kpɔkpɔɔ, deʒan mɔ woale bu nɔ wo o. Ele ahan gan, Mawu wa lankpu lɔ ahan yí na bubu sugbɔ akpaxwe ciwo yí bubu hwedo 25 keŋ nɔ mama ɖekɛ ŋgbenɔ lankpu lɔ mɛ o, vɔ ŋcinu lɔwo alenɔ bu nɔ wowonɔnɔwo. 26 Eyi nɔ ŋcinu ɖeka le gbazavi sekɔɔ, kpɛtɛwo pleŋ can ase gbazavi koɖi; alo nɔ wokanfu eɖeɔ, ŋcinu kpɛtɛwo pleŋ akpɔ jijɔ koɖi.
27 Ecɛyɛɔ, mínyi Kristo lankpu yí mɛɖekaɖeka le mí mɛ nyi lankpu lɔ ŋcinuwo. 28 Eyi Mawu na dɔ amɛ vovovowo le hamɛ lɔ mɛ: ŋkɔtɔ, apotruwo; evetɔ, enyɔnuɖɛtɔwo; amɛtɔntɔ, enukplamɛtɔwo; yi goduɔ, mɛ ciwo yí wanɔ enujiŋwo; mɛ ciwo yí xɔ edɔ̀dada nunana; mɛ ciwo yí kpenɔdo amɛ nu; mɛ ciwo yí danasɛ emɔ nɔ amɛ; mɛ ciwo yí donɔ egbe vovovowo. 29 Wo pleŋ yí nyi apotruwoa? Wo pleŋ yí nyi enyɔnuɖɛtɔwoa? Wo pleŋ yí nyi enukplamɛtɔwoa? Wo pleŋ yí wanɔ enujiŋwoa? 30 Wo pleŋ yí wona ŋsɛn nɔ woadanɔ edɔ̀a? Wo pleŋ yí donɔ egbe buwoa? Wo pleŋ yí nyi egbegɔnmɛɖetɔwoa? 31 Vɔ míkpɔtɔ adodoɔ gbla nɔ enunana ciwo yí gangan sɔwu veviɖe. Gan enyɛɔ, nadasɛ emɔ ɖeka ci yí nyɔ sɔwu nɔ mí.