Wema Ŋkɔtɔ ci Piɛ Ŋwlɛ
3 Nɛnɛke míwo nyɔnuwo, mísɔ míwoɖekiwo hwenɔ nɔ míwo suwo keŋ nɔ ŋsu ɖewo dewakɔ do enyɔ lɔ jiɔ, wowo shiwo gbenɔnɔ akplɔ wo va xɔse lɔ mɛ enyɔ ɖe manu. 2 Ðo wowoŋtɔwo kpɔkpɔ lé mínɔkɔ agbe nywi koɖo lé míbunɔ wo sugbɔ do. 3 Míŋgbelɔn nɔ acɔɖoɖo míwotɔ anyi agogbetɔ o, ŋgbenyi eɖablabla koɖo shikanuwo alo awu nywiwo dodo o. 4 Vɔ le nyi acɔɖoɖo ci yí wla do eji mɛ, ci yí dedanahɛn o yí nɔnɔ kpuu yí gbefanɔ xomɛ, eyi ɖonɔ kpɛnkpɛn sugbɔ le ŋmɛ nɔ Mawu. 5 Ðo ahan yí nyɔnu kɔkɔɛ ciwo yí ni sa yí kpɔ emɔ nɔ Mawu can ɖonɔ acɔ nɔ wowoɖekiwo nɛ yí sɔ wowoɖekiwo hwenɔ nɔ wowo suwo 6 shigbe lé Sara se tonu nɔ Abrahamu yí yɔɛni mɔ axwetɔ nɛ. Nɔ míkpɔtɔ wakɔ nunywi yí mídevɔn ɔ, míanyi eviɛwo.
7 Nɛnɛke ŋsuwo, míkpɔtɔ asenɔ nu gɔnmɛ nɔ míwo shiwo.* Ci wole shigbe enuflafla ci yí atɛnŋ agban fafɛɖe nɛɔ, míbunɔ wo; ɖo wowo can nyi cinɔɖutɔwo koɖo mí nɔ agbe ci Mawu ana xomɛvutɔ keŋ nɔ emɔ ŋgbevacu do míwo gbedoɖawo o.
8 Le vɔvɔnuɔ, mí pleŋ míɖo susu ɖekɛ ŋmɛ, mísenɔ vevi do míwonɔnɔwo nu, alɔnnɔ míwonɔnɔwo nɔjinɔwo tɔ han, akunɔ ŋshishi nɔ míwonɔnɔwo yí asɔ míwoɖekiwo hwenɔ. 9 Míŋgbewa evɔn do evɔn nu alo azu amɛ do ezu nu o; éwaɖeɔ, míbiɔnɔ nyɔna nɔ amɛwo, ɖo eyi woyɔ mí nɔ keŋ nɔ woacu shi nɔ mí.
10 “Mɛɖekpokpui ci yí ji mɔ yease vivi nɔ agbe lɔ yí akpɔ ŋkeke nywiwoɔ, éɖo akpɔ yi ɖe ji nɔ ŋgbenunɔ enyɔdɔndɔn o, éɖo akpɔ yi nukpawo ji hɛnnɛ nɔ ŋgbeblenɔ amɛ o. 11 Le trɔ le godu nɔ enudɔndɔn yí awanɔ enunywi; le jinɔ fafa yí akplɔɛ do. 12 Ðo Yehowa* ŋkuviwo le amɛjɔjɔɛwo ji yí eɖonɔ to wowo kwifanwo, vɔ Yehowa* trɔnɔ ŋgbe do mɛ ciwo yí wanɔ enudɔndɔnwo.”
13 Le nyɔnɔnwi mɛɔ, nɔ mído vevi enunywi yí wakɔ ɖe, mi yí awa enuvevi koɖo míɔ? 14 Vɔ nɔ enyi enujɔjɔɛ ci míwakɔ yí dɔ míɖo akpe fun ŋtɔkpuɔ, eji ajɔ mí. Gan míŋgbevɔn nɔ enu ci wovɔnkɔ nɔ o* yí aye ŋgbegbando nɔ mí o. 15 Vɔ mínya le míwo jiwo mɛ mɔ Kristo ci yí nyi Axwetɔ lɔ nyi amɛkɔkɔɛ. Míle gbesɔsɔ gashiagamɛ aɖonɔ enyɔ ŋci nɔ mɛɖekpokpui ci yí abiɔ enyɔ mí se so emɔkpɔkpɔ ci míɖo nu, gan míwɛni koɖo xomɛfafa koɖo bubu gangan.
16 Míkpɔtɔ aɖo ayexa nywi keŋ nɔ wovaxokɔ nuxu dɔndɔn so mí nu le ŋɖekpokpui mɛ can ɔ, mɛ ciwo yí xokɔ nuxu lɔwo aɖu ŋkpɛn; ɖo mínɔkɔ agbe nywi shigbe Kristo dokplɔtɔwo nɛ. 17 Ðo nɔ Mawu dro enyi mɔ míakpe fun do enunywi ci míwakɔ ŋciɔ, ényɔ sɔwu mɔ míawa enudɔndɔn yí akpe fun. 18 Ðo Kristo ku do ta nɔ nuvɔnwo zeɖeka nɔ hwenu lɔwo pleŋ, amɛjɔjɔɛ ku do ta nɔ amɛmajɔmajɔwo keŋ akplɔ mí yi Mawu gbɔ. Wowui le gbaza mɛ, vɔ wofuin do agbe le gbɔngbɔn mɛ. 19 Eyi enyi gbɔngbɔn keŋ yí yi ɖe kunu nɔ gbɔngbɔn ciwo yí le gakpa mɛ, 20 wowo yí nyi gbɔngbɔn ciwo yí gbe tonu sese sa hwenu Mawu gbɔn ji ɖɛ yí nɔ te le Nowe hwenu ci wokpakɔ tɔjihun daka ci mɛ yí agbetɔ kankin ciwo yí nyi amɛ* amɛnyi nɔ yí ci agbe le eshiɖɔɖɔ lɔ hwenu.
21 Ʒinʒindoshimɛ ci yí sɔ koɖo cɛ yí gbehwlɛnkɔ mí gan yɛ to fɔnfɔnsoku Yesu Kristo tɔ ji (ʒinʒindoshimɛ denyi eɖyiɖeɖe so gbaza lɔ nu o, vɔ woabiɔ Mawu keŋ aɖo ayexa nywi yɔ). 22 Yesu le ɖushi mɛ nɔ Mawu, ɖo éyi jeŋkwi mɛ yí wosɔ mawudɔlawo, acɛkpakpawo koɖo ŋsɛnwo ɖo gɔnmɛ ni.