Wema Ŋkɔtɔ ci Woŋwlɛ Ðaɖa Korɛntitɔwo

5 Ŋse mɔ wole matelinu* ɖeka wakɔ le mí mɛ. Wodekpɔ matelinuwawa* cɛ hanci ɖe kpɔ le jukɔn bu mɛ tɔwo mɛ kpetii o: Ŋsu ɖeka xɔ edalɔ shi. 2 Eyi ejɔkɔ ji nɔ mía? Denyi ŋshishi mɛ míɖo ale sa ba? Mídeɖo aɖe ŋsu ŋtɔ́ ci yí wa nɛnɛnu ti le mí mɛ ba? 3 Ci nyɛŋtɔkpu ŋdele mí gbɔ can ɔ, ŋle mí gbɔ le gbɔngbɔn mɛ yí ŋɖo kojo nɔ ŋsu ci yí wa enu cɛ xoxoxo vɔ shigbe mɔ ŋle mí gbɔ hannɛ. 4 Nɔ míbɔ doju le mìwo Xwetɔ Yesu ŋkɔ mɛɔ, mínya mɔ nyɛ can ŋle koɖo mí le gbɔngbɔn mɛ yí mìwo Xwetɔ Yesu ŋsɛn can le koɖo mí. 5 Míɖo asɔ ŋsu ŋtɔ́ do alɔ̀ mɛ nɔ Satana nɔ woaɖe enudɔndɔn ci ehɛn va hamɛ lɔ mɛ swi keŋ aglɔn ta nɔ gbɔngbɔn hamɛ lɔ tɔ le Axwetɔ ŋkeke lɔ ji.

6 Egoyiyi míwotɔ lɔ denyɔ o, mídenya mɔ kpɔnnɔcike kankin dɔ yí kpɔnnɔɣɔ nyanya lɔ pleŋ honɔ ba? 7 Míɖe kpɔnnɔcike xoxwi lɔ swi nɔ míatrɔ kpɔnnɔɣɔ nyanya yoyu keŋ nɔ enuhwanhwan ɖekɛ ŋgbele mí mɛ o; ɖo le nyɔnɔnwi mɛɔ, wosɔ Kristo mìwo Paki lɛngbɔ lɔ sa vɔn. 8 Eyi taɖo mìakpɔtɔ aɖukɔ azan lɔ, mìdaɖui koɖo kpɔnnɔcike xoxwi alo enubaɖawawa koɖo enuvwinwawa kpɔnnɔcike o, vɔ mìaɖui koɖo kpɔnnɔ majimaji enujɔjɔɛwawa tɔ koɖo nyɔnɔnwitoto tɔ.

9 Le wema ci ŋŋwlɛ ɖaɖa mí mɛɔ, ŋnu mɔ míwo le mi eha dodo koɖo mateliwatɔwo. 10 Ŋdexokɔ nuxu so xexeɛ mɛ mateliwatɔwo, sukanujitɔwo, awoxotɔwo koɖo vojusɛntɔwo* nu o. Nɔ enyi ahan yɔ nɛɔ, anyi míato le xexe lɔ mɛ. 11 Vɔ ecɛyɛ ŋŋwlɛkɔ nu nɔ mí mɔ míwo le mi eha dodo koɖo mɛ ci woyɔ mɔ nɔvi gan yí enyi matelitɔnɔ, sukanujitɔ, vojusɛntɔ,* amɛzutɔ, ahanumunɔ alo awoxotɔ, míŋgbeɖu nu koɖo nɛnɛmunɔ ŋtɔkpu can kpetii o. 12 Nyi yí taɖo naɖo kojo nɔ mɛ ciwo yí dele hamɛ lɔ mɛɔ? Denyi mɛ ciwo yí le hamɛ lɔ mɛ yí míaɖo kojo nɔ 13 yí Mawu aɖo kojo nɔ mɛ ciwo yí dele hamɛ lɔ mɛ ba? “Míɖe nuvɔnwatɔ lɔ ti le mí mɛ.”