Wema Ŋkɔtɔ ci Woŋwlɛ Ðaɖa Timɔte
5 Ŋgbegbe enyɔ nɔ mɛganxoxu koɖo adan o. Vɔ xò nuxu ni shigbe lé àxo nuxu nɔ dao nɛ, xò nuxu nɔ ɖajɛviwo shigbe nɔvio ŋsuwo nɛ, 2 xò nuxu nɔ nyɔnu xoxuwo shigbe nɔowo nɛ. Sɔ̀ susu nywi* xo nuxu nɔ cugbejɛwo shigbe nɔvio nyɔnushiwo nɛ.
3 Bùnɔ kposhu ciwo yí nyi kposhu ŋtɔŋtɔwo* tɔ kpɔ.* 4 Vɔ nɔ eviwo alo mamayɔviwo le kposhu ɖe shiɔ, wo le kpla lé woale bu nɔ wowoŋtɔwo xwemɛtɔwo do doŋkɔ asɔ dasɛ mɔ yewole gbeji nɔ Mawu yí woɖo asɔ enu ci yí nyi wowo da koɖo wowo nɔ, wowo tɔgbi koɖo wowo mamawo tɔ jo nɔ wo, ɖo ecɛ jɔnɔ ji nɔ Mawu. 5 Vɔ nyɔnu ci yí nyi kposhu ŋtɔŋtɔ yí ŋɖe dele shiɔ, ékpɔnɔ emɔ nɔ Mawu yí kpɔtɔ wanɔ kwifanwo yí donɔ gbe ɖaɖa ezan koɖo kede. 6 Gan kposhu ci yí le te ɖɛ nɔ agbeɖuɖuɔ, éku do te. 7 Eyi taɖo kpɔ̀tɔ akplakpla enu* cɛwo wo nɔ woŋgbevakpɔ afɛn ɖe le wo nu o. 8 Le nyɔnɔnwi mɛɔ, nɔ mɛɖe dekpɔkpɔ yiŋtɔ mɛwo ji o, taŋtaŋ mɛ ciwo yí nyi yi xomɛtɔwo jiɔ, égbe xɔse lɔ yí nyina wu mɛ ci yí deɖo xɔse o.
9 Gbɔxwe woɖo ahlɛn kposhu ɖe do kposhuwo mɛɔ, éle mɔ aɖo so exwe 60 ɖedo yí anyi asu kuɖeka eɖe ɖɛ kpɔ. 10 Woɖo ajeshi ɖɛ mɔ yɛwa edɔ nywiwo shigbe mɔ, éhɛn eviɛwo nywiɖe yí wanɔ xomɛvu, yí klɔnɔ afɔ nɔ amɛkɔkɔɛwo yí kpenɔdo mɛ ciwo yí le vevisese mɛ nu yí sɔ yiɖeki jo yí wanɔ edɔ nywi ɖekpokpui.
11 Vɔ ŋgbehlɛn kposhu ciwo yí nyi jajɛ do kposhu lɔwo mɛ o, ɖo nɔ amɛgbɔdɔndɔn dro wowotɔ vadokɔ fɔbli wo le Kristo dɔ lɔ wawa mɛɔ, wojinɔ mɔ yewoaɖe asu. 12 Woavaɖo kojo nɔ wo ci woɖe kɔ le xɔse ci woɖo le tɔtɔmɛ* nu. 13 Wogbenɔ edɔɖemawa hɛnnɛ yí adandan le axwewo mɛ, denyi edɔ ɖekɛ wodewanɔ o, vɔ wonunɔ amɛ nyɔ yí adodoɔ enu mɛbuwo nyɔwo mɛ yí axoxoɔ nuxu so enu ciwo nu wodeɖo axo nuxu so o. 14 Eyi taɖo ŋji mɔ kposhu ciwo yí nyi jajɛ le ɖe asu, aji eviwo, akpɔ wowo xomu ji keŋ nɔ woŋgbevana yí ketɔnɔwo akpɔ nyɔ ɖe anu o. 15 Le nyɔnɔnwi mɛɔ, mɛɖewo trɔ keŋ yí kplɔ Satana do vɔ. 16 Nɔ nyɔnu xɔsetɔ ɖe xomumɛtɔwo nyi kposhuwoɔ, le kpenɔdo wo nu keŋ nɔ woŋgbevanyi agban nɔ hamɛ lɔ o, eyi hamɛ lɔ atɛnŋ akpenɔdo mɛ ciwo yí nyi kposhu ŋtɔŋtɔwo* nu.
17 Éle mɔ woaɖo bubu donu amɛve nɔ hamɛmɛshinshin ciwo yí kpɔkpɔ hamɛ lɔ ji nywiɖe, taŋtaŋ mɛ ciwo yí wakɔ dɔ sɛnsinɖe le nuxuxoxo koɖo enukplakpla amɛwo mɛ. 18 Ðo enuŋwlɛŋwlɛ lɔ nu mɔ, “Dèɖo abla enu nɔ nyibusu ci èzan yí sɔ tokɔ jinuku o,” nɛnɛke “Éle mɔ edɔwatɔ axɔ yi fɛncu.” 19 Amɛ amɛve alo amɛtɔn ɖo aɖe kunu so ehwɛ ɖe ci wododoɔ amɛshinshin* ɖe nu gbɔxwe yí nàkando ji. 20 Mɛ ciwo yí sɔ nuvɔn ɖo edɔ yí wakɔɔ, gbè nyɔ nɔ wo le ŋmɛ nɔ amɛwo pleŋ keŋ nɔ mɛkpɛtɛwo akpla nu so mɛ.* 21 Ŋbiɔkɔ eo veviɖe le Mawu koɖo Kristo Yesu koɖo mawudɔla ciwo yí wocan ŋmɛ mɔ, nɔ èwakɔ do enukplamu nyɔ cɛwo jiɔ, ŋgbebu enyɔ do amɛ nu alo atra amɛ mɛ o.
22 Ŋgbehwlɛndo asɔ alɔ̀ da do mɛɖe ji gbeɖe o,* ahanke ŋgbekplɔ amɛwo do le nuvwin ciwo wowawa mɛ o, kpɔ̀tɔ anɔnɔ agbe mɛmi.
23 Ci dɔmɛ wanɔ nu koɖo eo yí èblenɔ blaŋblaŋ ɔ, ŋgbenunɔ eshi ɖekɛ o,* vɔ nunɔ vɛn hwɛɖeka.
24 Nuvɔn mɛɖewo tɔ zenɔ gannaganna ci yí dɔ woɖonɔ kojo nɔ wo zeɖeka, vɔ mɛɖewo tɔ vazenɔ le yiyimɛ. 25 Nɛnɛke edɔ nywi ciwo yí wowanɔ zenɔ gannaganna nɛ yí ciwo yí deze kaka datɛnŋ akpɔtɔ anɔ wlawlamɛ o.