Wema Ci Ʒaki Ŋwlɛ
5 Ecɛyɛɔ, míɖo toŋ, míwo dɔkunɔwo, mífan avin yí ado axwa nɔ evɔn ciwo yí jikɔ ajɔ do mí ji. 2 Míwo dɔkunuwo nyinyɔ yí kɔnsubabawo ɖu míwo nudodowo. 3 Shika koɖo egacuho míwotɔwo je ehwi, eyi ehwijeje wowotɔ adra mí yí afiɔn míwo gbazawo. Enu ciwo míbɔ ɖɛ ale shigbe ezo hannɛ le ŋkeke vɔvɔɛwo mɛ. 4 Míkpɔ ɖa! Efɛn ciwo mígbe cucu nɔ edɔwatɔ ciwo yí sɔ jinuku nɔ mí le míwo bojiwo le axwa dokɔ, eyi axwa ciwo yí jinukusɔtɔ lɔwo dodoɔ mɔ wo le va kpedo yewo nu je to mɛ nɔ Yehowa* ahwakɔnwo tɔ. 5 Míɖu agbe yí do jijɔ nɔ míwoɖekiwo le nyigban ji. Míɖu keke míwo jiwo do ami le wuwugbe. 6 Mído hwɛ amɛ; míwu amɛjɔjɔɛ lɔ. Degbe nɔ mí ba?
7 Nɔviwo, míxɔ jigbɔnɖɛ keke ana nɔ hwenu Axwetɔ lɔ ava. Míkpɔ ɖa! Glɛshinɔ nɔnɔ te kpɔ jinuku nywi ci nyigban lɔ nanɔ, éxɔnɔ jigbɔnɖɛ keke aje hwenu eli shi koɖo ezo shi aja. 8 Míwo can, míxɔnɔ jigbɔnɖɛ yí asɛnŋ,* ɖo Axwetɔ lɔ vava gogo.
9 Nɔviwo, míŋgbeɖunɔ se* nɔ míwonɔnɔwo keŋ nɔ woaɖo kojo nɔ mí o. Míkpɔ ɖa! Kojoɖotɔ lɔ le ehɔn ji. 10 Nɔviwo, lé enyɔnuɖɛtɔ ciwo yí xo nuxu le Yehowa* ŋkɔ mɛ kpe fun do koɖo lé wogbɔn ji ɖɛ do le nyi kpɔwɛ nɔ mí. 11 Míkpɔ ɖa! Mìkpɔnɔ mɛ ciwo yí do ji mɔ wonyi jijɔtɔwo.* Míse lé Job do ji do yí kpɔ lé Yehowa* wɛ yí enuwo vayi do ni. Míkpɔ lé Yehowa* lɔnnɔ amɛ sugbɔ koɖo lé ekunɔ ŋshishi nɔ amɛ do.
12 Vevitɔ lɔɔ, nɔvinyɛwo, mími enu tata, míŋgbeta jeŋkwi alo nyigban alo nubu ɖekpokpui o. Vɔ “Ɛɛ” míwotɔ le nyi ɛɛ yí “Oo” anyi oo keŋ nɔ woŋgbevaɖo kojo nɔ mí o.
13 Mɛɖe kpekpeɛ fun le mí mɛa? Le kpɔtɔ adokɔ gbe ɖaɖa. Mɛɖe kpɔkɔ jijɔa? Le ji kanfukanfu hawo. 14 Mɛɖe ble le mí mɛa? Le yɔ hamɛmɛshinshinwo nɔ woado gbe ɖaɖa do ta ni yí ashi ami ni le Yehowa* ŋkɔ mɛ. 15 Eyi gbedoɖa ci wowa koɖo xɔse ana edɔ̀ ami nɔ mɛ ci yí ble* lɔ yí Yehowa* afuin do te. Nɔ éwa nuvɔnwo hɛnnɛ ɔ, woasɔ wo ki.
16 Eyi taɖo, mínunɔ nuvɔn ciwo yí míwanɔ nɔ míwonɔnɔwo yí adonɔ gbe ɖaɖa do ta nɔ míwonɔnɔwo keŋ nɔ edɔ̀ ami nɔ mí. Amɛjɔjɔɛ kwifan ɖonɔ ŋsɛn.* 17 Agbetɔ yí Eli nyi shigbe mìwo hannɛ, gan ci edo gbe ɖaɖa veviɖe mɔ eshi ŋgbejaɔ, eshi mi jaja le eju lɔ mɛ na nɔ exwe amɛtɔn koɖo wleci amadɛn. 18 Eyi egbevado gbe ɖaɖa yí eshi ja yí nyigban lɔ na jinukuwo.
19 Nɔvinyɛwo, nɔ mɛɖe le mí mɛ yí trɔ gbeɖe nyɔnɔnwi lɔ ɖɛ yí mɛbu kplɔɛ gbɛɔ, 20 mínya mɔ mɛ ci yí trɔ nuvɔnwatɔ lɔ gbɛ so yi nuvɔn mɛ ahwlin gan* le eku mɛ yí acɔn nu nuvɔn sugbɔ ji.