Wema Ŋkɔtɔ ci Piɛ Ŋwlɛ
5 Eyi taɖo, enyɛ ci yí nyi hamɛmɛshinshin ci yí kpɔ efun ciwo yí Kristo kpe tɔxu yí axɔ kanfukanfu ci woavadasɛ hɛnnɛ, ŋdokɔ ŋsɛn* hamɛmɛshinshin ciwo le mí mɛ mɔ: 2 . Míkpɔ Mawu lɛngbɔha ci wosɔ do alɔ̀ mɛ nɔ mí ji; míwa sɛnsɛndɔ lɔ shigbe enujikpɔtɔwo nɛ,* míŋgbewɛ shigbe mɔ wosɔ ʒinkɔ mí ji nɛ o, vɔ míwɛ koɖo eji faa le ŋmɛ nɔ Mawu; ŋgbenyi ele xoɖyixoɖyi ŋci o, vɔ míwɛ koɖo edro nywi. 3 Míŋgbeɖunɔ axwetɔ do mɛ ciwo yí nyi cinɔ nɔ Mawu ji o, vɔ mínyi kpɔwɛwo nɔ lɛngbɔha lɔ. 4 Eyi hwenu woadasɛ lɛngbɔkplɔtɔ gangantɔ lɔɔ, míaxɔ kanfukanfu jiɖuɖukuku ci yí ani keke asɔyi mavɔ.
5 Ahanke míwo ciwo yí nyi jajɛwoɔ, mísɔ míwoɖekiwo hwenɔ nɔ amɛshinshinwo.* Vɔ mí pleŋ mísɔ amɛɖekisɔsɔhwe asɔ do shigbe awu hannɛ* nɔ míwakɔ nu ɖaɖa míwonɔnɔwo gbɔ, ɖo egoyitɔwo nu dekpenɔ nɔ Mawu o, vɔ éwanɔ xomɛvu gangan nɔ mɛ ciwo yí sɔ wowoɖekiwo hwenɔ.
6 Eyi taɖo, mísɔ míwoɖekiwo hwe do Mawu lɔ̀ sɛnŋ lɔ gɔnmɛ keŋ nɔ yiŋtɔ ana kɔkɔ mí do gamɛ nywitɔ ji. 7 Mísɔ míwo tamɛbukpɔwo* pleŋ da do ji ɖo élenɔ bu nɔ mí. 8 Míbunɔ tamɛ kpɔ nywiɖe, mínɔ zanŋte! Míwo ketɔnɔ Legba dandan shigbe janŋtan ci yí le adan ji nɛ yí jijiɛ amɛ adrɛn. 9 Vɔ mítrɔkpi, mílo do le xɔse lɔ mɛ yí anyanya mɔ míwo nɔviwo habɔbɔ lɔ pleŋ ci yí le xexeɛ mɛ kpekpeɛ fun ŋmɛ ɖekɛ lɔwo. 10 Vɔ nɔ míkpe fun na nɔ hwenu kleŋ ɖe ɖegbɔɔ, xomɛvu ganganwo keŋkeŋ Mawu lɔ ŋtɔ ci yí yɔ mí va kanfukanfu mavɔ yitɔ lɔ mɛ le Kristo mɛ aɖegbɔ nɔ ekplaxɔxɔ míwotɔ. Ána míalo do, ána míasɛnŋ, ana míado ke sɛnsinɖe. 11 Ŋsɛn anyi yitɔ sɔyi mavɔ. Amɛn.
12 Silvɛn* ci ŋkpɔnɔ mɔ yɛnyi nɔvi egbejinɔtɔ ji ŋto yí ŋwlɛ enyɔ kankin cɛwo ɖaɖa mí keŋ asɔ do ŋsɛn mí yí agbesɔ na kpeɖoji mí mɔ, Mawu xomɛvu gangan nyɔnɔnwitɔ lɔ ke. Mílo do le mɛ. 13 Nyɔnu* ci yí le Babiloni yí nyi amɛcancan shigbe míwo ke nɛ do gbe ɖaɖa mí. Evinyɛ Maki can do gbe ɖaɖa mí. 14 Mísɔ lɔnlɔn ki shi nɔ míwonɔnɔwo yí asɔ do gbe nɔ míwonɔnɔwo.
Míwo ciwo pleŋ yí nyi Kristo dokplɔtɔwo le kpɔ fafa.