Wema Ŋkɔtɔ ci Woŋwlɛ Ðaɖa Tɛsalonikitɔwo

1 Enyɛ Pɔlu, Silvɛn* koɖo Timɔte yí ŋwlɛkɔ wema cɛ ɖaɖa hamɛ ci yí le Tɛsaloniki yí nyi Mawu Eda koɖo Axwetɔ Yesu Kristo tɔ:

Mawu le wa xomɛvu gangan nɔ mí yí agbena fafa mí.

2 Mìdonɔ akpe nɔ Mawu gashiagamɛ le mìwo gbedoɖawo mɛ nɔ mìɖo ŋwi mí pleŋ kpɔ. 3 Ŋci mìɖonɔ ŋwi gashiagamɛ le ŋkɔ nɔ mìwo Mawu Eda yí nyi edɔ ciwo yí xɔse na yí míwa, edɔ ciwo mísɔ lɔnlɔn wa koɖo ejidodo míwotɔ, ci míle emɔ kpɔkɔ le mìwo Xwetɔ Yesu Kristo mɛ. 4 Nɔviwo, míwo ciwo yí Mawu lɔn, mìnya mɔ Mawu yí can mí; 5 ɖo eŋɛnywi ci mìdra nɔ míɔ, denyi nuxuwo kpoŋ yí mìxo o, vɔ mìnui nɔ mí koɖo ŋsɛn koɖo gbɔngbɔn kɔkɔɛ koɖo kankandoji sɛnŋ hɛnnɛ, mínya mɛ ci ŋmɛwo yí mìvatrɔ le mí mɛ do míwo ŋci. 6 Eyi mívawakɔ mìwo koɖo Axwetɔ lɔ tɔ han; ɖo ci enuwo kpekpeɛ mí sugbɔ can ɔ, míxɔ enyɔ lɔ koɖo jijɔ ci gbɔngbɔn kɔkɔɛ lɔ nanɔ. 7 Eyi mívanyi kpɔwɛ nɔ xɔsetɔ ciwo pleŋ yí le Maseduani koɖo Akayi.

8 Enyɔ lɔ yí nyi mɔ, denyi ci mína yí amɛwo se Yehowa* nyɔ lɔ le Maseduani koɖo Akayi kpoŋ yɔ o, vɔ lé míxɔ Mawu ji se do nyɔ gban kpedo fishiafi keke degbeʒan mɔ mìwoanu nyɔ ɖe o. 9 Ðo enu ciwo nu wowoŋtɔwo kpɔtɔ xokɔ nuxu so yí nyi lé mìva mí gbɔ ŋkɔtɔ do koɖo lé mítashi míwo vojuwo yí va Mawu gbɔ do keŋ yí vanyi hwashiwo nɔ Mawu agbuagbu koɖo nyɔnɔnwi Mawu lɔ 10 yí le ete kpɔ Eviɛ ci yí aso jeŋkwi mɛ, mɛ ci efɔn so amɛkukuwo mɛ, eyi nyi Yesu ci yí ahwlɛn mì gan le dɔmɛzi ci yí gbɔgbɔ mɛ.