Wema Ŋkɔtɔ ci Piɛ Ŋwlɛ
1 Enyɛ Piɛ ci yí nyi apotru Yesu Kristo tɔ yí ŋwlɛkɔ wema cɛ ɖaɖa mɛdru ciwo yí kaka do Pɔn, Galati, Kapadɔsi, Azi koɖo Bitini, míwo ciwo yí wocan 2 sɔgbe koɖo enu ci Mawu Eda nya ɖɛ, eyɛ ci yí na yí mímɛ to gbɔngbɔn lɔ ji keŋ nɔ míanyi tonusetɔwo yí egbesɔ Yesu Kristo hun sɔ wú do mí nu:
Mawu le wa xomɛvu gangan nɔ mí doji yí agbena fafa sugbɔ mí.
3 Woakanfu Mawu ci yí nyi Eda nɔ mìwo Xwetɔ Yesu Kristo, ɖo éku ŋshishi nɔ mì sugbɔ ci eto Yesu Kristo ci wofɔn so ku ji yí na yí wotrɔ yí ji mì yoyu nɔ mìaɖo emɔkpɔkpɔ mavɔ 4 keŋ axɔ cinɔ ci yí dedanahɛn o, ci yí dexo ɖyi o yí agbeni keke asɔyi mavɔ. Wosɔ ɖo jeŋkwi mɛ ɖɛ nɔ mí, 5 míwo ciwo ji Mawu cɔnkɔ alɔ̀ koɖo yi ŋsɛn to xɔse ci míɖo ji nɔ hwlɛngankpɔkpɔ ci yí le gbesɔsɔ yí woadasɛ le hwenu kpɛtɛkpɛtɛwo mɛ. 6 Ecɛ yí dɔ taɖo eji jɔkɔ mí sugbɔ ci tetekpɔ hamɛhamɛwo na yí mísekɔ vevi nɔ égbenyi na nɔ hwenu kleŋ ɖe yɔ can 7 keŋ nɔ xɔse míwotɔ ci wodo kpɔ ahan ci yí le ŋkɔ sesese nɔ shika ci wosɔ ezo donɔ kpɔ,* gan yí edanahɛn atɛnŋ ana yí woakanfu mí, ana kɔkɔ mí yí agbena bubu mí hwenu woadasɛ Yesu Kristo. 8 Ci mídekpɔɛ kpɔ can ɔ, míluin. Ci mídekpɔkpɔɛ yɛ can ɔ, míxɔɛ ji se yí kpɔkpɔ jijɔ gangan manumanu, 9 ɖo míxotɔ enu ci yí taɖo míɖo xɔse, eyi nyi hwlɛngankpɔkpɔ míwotɔ.*
10 Hwlɛngankpɔkpɔ cɛ nu yí enyɔnuɖɛtɔ ciwo yí nu enyɔ ɖɛ kuso xomɛvu gangan ci wojikɔ awa nɔ mí nu biɔ enyɔ se so nywiɖe yí gbeji enu gɔnmɛ kpɔ kitokito so nu. 11 Woji enu gɔnmɛ kpɔ nywiɖe kuso gamɛ ci teŋ alo hwecinu gbɔngbɔn ci yí le wo mɛ dadasɛ kuso Kristo nu. Gbɔngbɔn lɔ nu efun ciwo yí Kristo akpe nyɔ ɖɛ doŋkɔ koɖo lé woavakanfui do le yi godu. 12 Édasɛ nɔ wo mɔ denyi wowoŋtɔwo yí wowakɔ edɔ nɔ o, vɔ míwo yí wowɛkɔ nɔ. Enu cɛwo yí mɛ ciwo yí nu eŋɛnywi lɔ nɔ mí to gbɔngbɔn kɔkɔɛ ci yí so jeŋkwi mɛ ji nu nɔ mí, enu cɛwo mɛ taŋtaŋ yí mawudɔlawo jijiɛ veviɖe mɔ yewoamɔŋje.
13 Eyi taɖo, mídra míwo susuwo do nɔ edɔwawa; míwa ɖaŋ abunɔ tamɛ kpɔ nywiɖe, míkpɔkɔ emɔ nɔ xomɛvu gangan ci woawa nɔ mí hwenu woadasɛ Yesu Kristo. 14 Shigbe evi ciwo yí senɔ tonu nɛɔ, mími enu wawa sɔgbe koɖo edro dɔndɔn ciwo yí míɖonɔ sa le manyamanya mɛ. 15 Vɔ shigbe lé mɛ ci yí yɔ mí nyi Amɛkɔkɔɛ nɛɔ, míwo can míɖo anyi amɛkɔkɔɛwo le míwo wanawo pleŋ mɛ, 16 ɖo woŋwlɛ ɖɛ mɔ: “Míɖo anyi amɛkɔkɔɛwo, ɖo amɛkɔkɔɛ yí ŋnyi.”
17 Nɔ míyɔkɔ Eda ci yí ɖonɔ kojo nɔ amɛ do alɔ̀ ɖekɛ ji sɔgbe koɖo enu ci mɛɖekaɖeka waɔ, míwo nuwanawo le dasɛ mɔ mívɔnnɔ nɔ Mawu hwecinu míkpɔtɔ nyi mɛdruwo. 18 Ðo míwoŋtɔwo mínya mɔ denyi enu ciwo yí danahɛn, egacuho alo shika yí wosɔ na vovo mí* so agbenɔnɔ maɖota ci míwo tɔgbiwo gbe ɖɛ nɔ mí* mɛ o. 19 Vɔ Kristo le shigbe lɛngbɔvi ci ŋɖe dewa fiɖe nɔ yí dexo ɖyi nɛ. Yi hun vevi yí wosɔ na vovo mí. 20 Le nyɔnɔnwi mɛɔ, wojeshi ɖɛ gbɔxwe woɖo xexe lɔ,* vɔ azan lɔwo vɔvɔnu gbɔxwe yí wovadasɛ yi do míwo ŋci. 21 Eyɛ ji yí míto yí xɔ Mawu ji se, mɛ ci yí fuin so ku yí na kanfukanfu yi keŋ nɔ míatɛnŋ aɖo xɔse yí agbekpɔkɔ emɔ nɔ Mawu.
22 Tonu ci mísekɔ nɔ nyɔnɔnwi lɔ na yí mímɛ,* ecɛ dɔ yí mílɔnkɔ míwonɔnɔwo shigbe nɔjinɔwo nɛ yí ayemɛnuwawa dele mɛ o; ecɛyɛɔ, mílɔn míwonɔnɔwo veviɖe so eji mɛ. 23 Ðo wotrɔ yí ji mí yoyu, denyi nuku* ci yí danahɛn yí wosɔ ji mí o, vɔ ci yí dedanahɛn yí wosɔ ji mí to Mawu agbuagbu ci yí li tɛgbɛɛ nyɔ ji. 24 Ðo “agbetɔwo* pleŋ le shigbe egbe nɛ yí acɔɖoɖo wowotɔ keŋkeŋ le shigbe gbemɛsese nɛ; egbe kunɔ yí sese juinni, 25 vɔ Yehowa* nyɔ yɛ nini tɛgbɛɛ.” Eŋɛnywi ci wonu nɔ mí yí nyi “enyɔ” lɔ.