Wema Ci Ʒaki Ŋwlɛ
3 Nɔvinyɛwo, ci mìnya mɔ kojo ci woaɖo nɔ mì akpɛn ɔ,* amɛ sugbɔ ŋgbenyi enukplamɛtɔwo le mí mɛ o. 2 Ðo mì pleŋ wanɔ afɛn zenɛniɖe. Nɔ mɛɖe dewanɔ afɛn le nuxuxoxo mɛɔ, anyi amɛmaɖonuvɔn yí enyi yí asun ji aɖu yi lankpu lɔ pleŋ ji hɛnnɛ. 3 Nɔ mìdo ega nu nɔ esɔwo mɔ wo le se tonu nɔ mìɔ, anyi mìkplɔkplɔ wowo lankpu lɔ pleŋ hɛnnɛ. 4 Míkpɔ tɔjihunwo can ɖa: Ci wogangan sugbɔ yí aya sɛnŋsɛnŋwo xonɔ yí cucunɔ wo can ɔ, tɔjihunkuci hwɛhwɛ yí tɔjihunkutɔ lɔ sɔ kunɔ wo hɛn yi fini yí drui.
5 Ahanke aɖe can nyi lankpu lɔ ŋcinu hwɛhwɛ ɖeka nɛ, vɔ égangannɔ yiɖeki ɖoɖu. Míkpɔ lé ezo nyɛkuin binɔ ave gangan do ɖa! 6 Ezo yí aɖe can nyi. Aɖe lɔ nyi mìwo ŋcinu ɖeka ci yí ɖɔ koɖo enumajɔmajɔwawa yí xonɔ ɖyi lankpu lɔ pleŋ. Étɔnɔ zo agbe amɛ tɔ pleŋ, Gehena* han yí enyi, ɖo ávɔ amɛ dru. 7 Wonanɔ kpla gbemɛlan ɖekpokpui, xevi, elan ciwo yí sanɔ koɖo ciwo yí tanɔ to nyigban koɖo axumɛlan ɖekpokpui yí agbetɔwo sun ji yí na kpla wo. 8 Vɔ mɛɖe datɛnŋ ana kpla aɖe yɛ o. Wodetɛnŋ ɖunɔ ji o yí ewanɔ enuvevi koɖo amɛ, éɖɔ koɖo aɖyiwuamɛ. 9 Eyi mìsɔ kannɔfu Yehowa* ci yí nyi Eda, gan eyi lɔ ke yí mìsɔ sɛnnɔ kpɛn nɔ mɛ ciwo yí wowa “do Mawu nɔnɔmɛ nu.” 10 Aglan kuɖeka lɔ mɛ yí shicu koɖo kpɛnsɛn tonɔ so.
Nɔvinyɛwo, denyɔ mɔ enuwo anyikɔ ahan o. 11 Dotɔ kuɖeka dejinɔ eshi vivi koɖo eshi veve doju o, alo? 12 Nɔvinyɛwo, figici datɛnŋ asɛn olivuwo o, abi vɛnci datɛnŋ asɛn figiwo o, alo? Ahanke dotɔ ci yí jinɔ ejeshi datɛnŋ agbeji eshi vivi nɛ.
13 Mi yí nya ŋɖɛ yí gbesenɔ enu gɔnmɛ le mí mɛɔ? Mɛ lɔ le nɔnɔ agbe nywi ci yí danasɛ mɔ ésɔ xomɛfafa ci nunya nanɔ wanɔ enushianu. 14 Vɔ nɔ ŋhwan vwin koɖo evuwawa* le míwo jiwo mɛɔ, míŋgbeyiyiɛ go yí akankan ŋsu do nu nɔ nyɔnɔnwi lɔ o. 15 Nunya cɛ deso jeŋkwi mɛ o; nyigban ji tɔ yɔ, elan tɔ koɖo gbɔngbɔnvɔnwo tɔ enyi. 16 Ðo fiɖekpokpui ci ŋhwan koɖo evuwawa* leɔ, hannyahannya koɖo enuvwin ɖeshiaɖe can anɔ nɔtɔxu.
17 Vɔ doŋkɔɔ, nunya ci yí so jeŋkwi mɛ le kɔkɔɛɖe; yi goduɔ, éwanɔ fafa, ésenɔ nu gɔnmɛ, énɔnɔ gbesɔsɔ yí senɔ tonu, ŋshishikuku koɖo ekusɛnsɛn nywiwo ɖɔɛ, detranɔ amɛ mɛ o, dewanɔ ayemenu o. 18 Gbesɔwu hunnɔɔ, fafa mɛ yí wodonɔ enujɔjɔɛwawa kusɛnsɛn le nɔ mɛ ciwo yí wanɔ fafa.*