Apotruwo Dɔwawawo
28 Ci mìvayi agogbe nywiɖe ɖegbɔɔ, mìvase mɔ Malta yí woyɔnɔ tɔdomɛnyigban lɔ. 2 Mɛ ciwo yí le nɔtɔxu* wa xomɛvu nɔ mì taŋ. Wobɔ zo nɔ mì nɔ mìaxu yí wa ɖaŋ xɔ mì, ɖo eshi jakɔ yí vuvɔ gbewakɔ. 3 Vɔ ci Pɔlu fɔ nake wliwliwo do ezo lɔ mɛɔ, edan ɖeka le nake lɔwo mɛ yí shi nɔ zozu lɔ. Ébaɖa do alɔ̀ nɔ Pɔlu yí xu nu yi. 4 Ci tɔdomɛnyigban lɔ ji tɔwo kpɔ edan aɖyinɔ lɔ baɖa do alɔ̀ nɔ Pɔlu ɔ, wotɔ nunu nɔ wowonɔnɔwo mɔ: “Amɛwutɔ yí ŋsu cɛ anyi dandan. Ci ŋɖe dewɛ le axu lɔ jiɔ, Kojojɔjɔɛɖotɔ* lɔ delɔn mɔ yɛ le nɔ agbe o.” 5 Vɔ Pɔlu mi alɔ̀ yí edan lɔ je zo mɛ yí dewa ŋɖe ni o. 6 Mɛ lɔwo bukɔ mɔ Pɔlu atɛn alo ajuin aku zeɖeka. Eyi ci wonɔ te keke yí kpɔ mɔ ŋɖe dewɛɔ, wotɔ nunu mɔ mawu ɖe anyi.
7 Mɛgan ɖeka le tɔdomɛnyigban lɔ ji yí tɔ mɔ Publiu yí yi nyigbanwo sɔ nɔtɔxu, éwa ɖaŋ xɔ mì mɛdru yí mìnɔ gbɔ keke yí wa ŋkeke amɛtɔn. 8 Publiu dalɔ ble yí le nyimlɔxu yí vuvɔfu wɛkɔ yí egbenyɛkɔ shigui, eyi Pɔlu yi gbɔ yí do gbe ɖaɖa yí sɔ alɔ̀wo da do ji yí da dɔ̀ ni. 9 Ci eda dɔ̀ ni ɖegbɔɔ, dɔ̀nɔ ciwo yí le tɔdomɛnyigban lɔ ji va gbɔ yí eda dɔ̀ nɔ wowo can. 10 Woɖo mì hɛnnɛ yí na enuwo mì. Eyi ci mìɖoɖoɔ tɔjihun yí asoɔ, wosɔ enushianu ci yí wudo mì do agban nɔ mì.
11 Le wleci amɛtɔn goduɔ, mìɖo tɔjihun ɖeka ci nu woŋwlɛ do mɔ “Zewusi Viwo.” Tɔjihun lɔ so Alɛsandri yí vaci tɔdomɛnyigban lɔ ji le vuvɔ hwenu. 12 Ci mìvaɖo Sirakusi ɔ, mìnɔ hunnɔ na nɔ ŋkeke amɛtɔn. 13 Mìso le enɔ yí va Reʒiu. Yi ŋkegbuɔ, aya ɖeka xo so fɔde yí mìvaɖo Puteoli le ŋkeke amɛve godu. 14 Mìkpɔ nɔviwo le nɔ. Woɖe kuku nɔ mì mɔ mìwo le wa ŋkeke amadrɛ le yewo gbɔ, eyi mìnɔ wo gbɔ. Yi goduɔ, mìso kpe Rɔma. 15 Ci nɔvi ciwo yí le Rɔma se mɔ mìgbɔgbɔɔ, wova keke Apiusu fi mɛ koɖo fini woyɔnɔ mɔ Mɛdruzexu Amɛtɔn keŋ ado go mì. Ci Pɔlu kpɔ woɔ, édo akpe nɔ Mawu yí edɔngbegbe ɖo lanmɛ ni. 16 Ci mìvaɖo Rɔma ɔ, wona gbe Pɔlu yí enɔ axwe ci yiŋtɔ haya mɛ yí sɔja ɖeka le gbɔ yí cɔɛkɔ.
17 Vɔ le ŋkeke amɛtɔn goduɔ, Pɔlu yɔ Ʒuifu mɛganwo. Eyi ci wova bɔ ɖegbɔɔ, énu nɔ wo mɔ: “Kinyɛwo, nɔviwo, ci ŋdewa ŋɖe yí da le mìwo jukɔn lɔ alo mìwo tɔgbiwo kɔnuwo ji can ɔ, woléŋ do ga so Ʒerusalɛmu yí sɔŋ do alɔ̀ mɛ nɔ Rɔmatɔwo. 18 Eyi ci wovado ŋkuvi enyɔ lɔ mɛ kpɔ nywiɖe ɖegbɔɔ, woji mɔ yewoajoŋ; ɖo wokpɔ mɔ ŋdeje agɔ ɖe keke yí woawuŋ o. 19 Vɔ ci Ʒuifuwo delɔn ɔ, ŋkpɔ mɔ ŋɖo ayɔ hwɛ do Seza gbɔ; gan denyi ehwɛ ɖe ŋdodoɔ anyi jukɔn o. 20 Eyi taɖo ŋmɔ makpɔ mí keŋ axo nuxu koɖo mí, ɖo ŋci Izraɛli kpɔkɔ emɔ nɔ yí na taɖo wodo gaŋ ahan.” 21 Wonu ni mɔ: “Wodeŋwlɛ wema so eo nu le Ʒude ɖaɖa mì o yí nɔvi ciwo yí so nɔtɔxu yí va ɖekpokpui denu nyɔ ɖe alo xo nuxu vɔn ɖe so eo nu o. 22 Vɔ mìkpɔ mɔ nɔ anyɔɔ, mìase enyɔ ci yí le eo shi. Ðo le nyɔnɔnwi mɛɔ, mìnya mɔ woxoxoɔ nuxu tɔ sɛnsɛn klandoakpo cɛ le fishiafi.”
23 Wowa toto yí sɔ azan ɖeka ci ji woado go le. Eyi wova keke yí sugbɔ gbiŋ le axwe ci mɛ ele. Éɖe kunu nɔ wo kitokito so Mawu Fyɔɖuxu lɔ nu yí sɔ dre enyɔ lɔ mɛ nɔ wo so nyidin yi fiɛfimɛ. Ézan enyɔ ciwo yí le Moizi Se lɔ mɛ koɖo enyɔ ciwo yí Enyɔnuɖɛtɔwo ŋwlɛ ɖɛ yí sɔ xo nuxu so Yesu nu nɔ wo yí wɛ keke nɔ woakando ji. 24 Mɛɖewo kando enyɔ ciwo enu ji, vɔ mɛbuwo dekando ji o. 25 Eyi taɖo ci egbe dele ju nɔ wo yí wotɔ sosoɔ, Pɔlu nu enyɔ cɛ nɔ wo mɔ:
“Enyɔ jɔ nɔ gbɔngbɔn kɔkɔɛ lɔ ci exo nuxu to enyɔnuɖɛtɔ Ezai ji nɔ míwo tɔgbiwo 26 yí nu mɔ, ‘Yi jukɔn cɛ gbɔ yí anu nɔ wo mɔ: “Míasi pɛɛ vɔ mídamɔŋje mɛ kpɔ o, míakpɔɛ pɛɛ, vɔ mídanya ŋci míkpɔ kpɔ o. 27 Ðo eji mɛ vasɛnŋ nɔ jukɔn cɛ yí wose nyɔ lɔ gan wodo tokuitokui yi. Woŋwla wowo ŋkuviwo hɛnnɛ nɔ woŋgbekpɔ ŋɖe koɖo wowo ŋkuviwo yí ase nyɔ ɖe koɖo wowo towo yí agbemɔŋje mɛ koɖo wowo jiwo keŋ atrɔ va ŋgbɔ nɔ mada dɔ̀ nɔ wo o.”’ 28 Eyi taɖo mínya mɔ wodra hwlɛngan cɛ ci yí so Mawu gbɔ nyɔ nɔ jukɔn bu mɛ tɔwo yí kankandoji li mɔ wowo aɖo to yi.” 29* ——
30 Eyi Pɔlu nɔ axwe ci yiŋtɔ haya mɛ na nɔ exwe amɛve blebu. Éwa ɖaŋ xɔnɔ mɛ ciwo yí vanɔ gbɔ nywiɖe. 31 Éɖenɔ kunu so Mawu Fyɔɖuxu lɔ nu nɔ wo yí voŋ fɛɛ* yí kplanɔ nu wo so Axwetɔ Yesu Kristo nu yí ŋɖe dedonɔ aya ni o.