Wema Amɛvetɔ ci Woŋwlɛ Ðaɖa Korɛntitɔwo

2 Ŋɖui mɔ nɔ ŋva mí gbɔɔ, ŋdana yí míagbenɔ ŋshishi mɛ ke o. 2 Nɔ ŋna yí míse vevi ɖe, mi yí gbeli yí ado jijɔ nɔŋ sɔ zeto mɛ ci ŋdo vevisese nɔ nuɔ? 3 Ŋŋwlɛ wema ɖaɖa mí keŋ nɔ ŋvava mí gbɔɔ, mɛ ciwo yí ana eji ajɔŋ ŋgbevawɛ nɔ maci ŋshishi mɛ o. Ðo ŋkando ji mɔ ŋci yí na eji jɔkɔŋ na yí eji jɔkɔ míwo can. 4 Ŋxa le nyɛɖeki mɛ sugbɔ yí sekɔ vevi le ji mɛ hwenu ŋŋwlɛ wema ɖaɖa mí koɖo ɖashi sugbɔ, ŋdeŋwli yí asɔ mí do ŋshishi mɛ o, vɔ ŋŋwli keŋ nɔ míanya lé ŋlɔn mí sugbɔ do.

5 Nɔ mɛɖe sɔ amɛwo do ŋshishi mɛɔ, de enyɛ esɔ do ŋshishi mɛ o, vɔ mí pleŋ yí esɔ do ŋshishi mɛ, gan ŋdeji mɔ anyi nyɔ asɛnŋ ɖoɖu o. 6 Eto ci yí amɛ sugbɔtɔ dɔn nɔ ŋsu cɛ le mí mɛ sun ahan; 7 vɔ ecɛyɛɔ, míɖo asɔ ki so ji mɛ keŋ afa akɔn ni nɔ ŋgbeci ŋshishi mɛ keke adan ta nɔ yiɖeki o.* 8 Eyi taɖo, ŋdodoɔ ŋsɛn mí nɔ míadasɛ ni mɔ yewoluin. 9 Ŋci yí gbedɔ taɖo ŋŋwlɛ nu ɖaɖa mí yí nyi mɔ, ŋjikɔ akpɔ mɔ míase tonu le enuwo pleŋ mɛ ma. 10 Nɔ mísɔ ŋɖekpokpui ke mɛɖeɔ, nyɛ can ŋsɔ ki hɛnnɛ. Vɔ nɔ ŋsɔ enu ke mɛɖeɔ, míwo nyɔna taɖo yí ŋwɛ le Kristo ŋmɛ, 11 keŋ nɔ Satana ŋgbeɖu mì ji o,* ɖo mìdegɔnma nya yi susuwo o.*

12 Hwenu ŋva Troasi yí adra eŋɛnywi lɔ kudo Kristo nu yí ehɔn hun nɔŋ le Axwetɔ lɔ mɛɔ, 13 ŋdevo le nyɛɖeki mɛ o, ɖo ŋdekpɔ nɔvinyɛ Titu o. Eyi taɖo ŋklan wo keŋ yí so kpe Maseduani.

14 Vɔ akpe nɔ Mawu ci yí kplɔ mìwo koɖo Kristo shigbe sɔja ciwo yí ɖu ahwa ji keŋ yí trɔ vayikɔ axwe koɖo jijɔ nɛ. Éto mì ji yí kakakɔ* ete ci yí nunya yitɔ hwɛnkɔ to fishiafi! 15 Ðo mìwo ciwo yí xokɔ nuxu so Kristo nuɔ, mìle shigbe enu ci yí hwɛnkɔ te lilili nɔ Mawu nɛ le mɛ ciwo yí woahwlɛn gan koɖo mɛ ciwo yí woagu mɛ. 16 Mìhwɛnhwɛn ete ci yí akplɔ amɛ yi eku nɔ mɛ ciwo yí woagu yí hwɛnhwɛn ete ci yí akplɔ amɛ yi agbe mɛ nɔ mɛ ciwo yí woahwlɛn gan. Mi yí sun do nɔ edɔ cɛ wawaɔ? 17 Mìwo yɔ, ɖo mìdesɔ Mawu nyɔ lɔ donɔ ajɔ shigbe lé amɛ sugbɔ wɛni do nɛ o, mìtonɔ nyɔnɔnwi le enyɔ ciwo mìnunɔ mɛ shigbe mɛ ciwo yí Mawu dɔ ɖaɖa nɛ; ɛɛ, le Mawu koɖo Kristo ŋmɛ.