Apotruwo Dɔwawawo
14 Le Ikonia ɔ, Pɔlu koɖo Barnabasi yi Ʒuifuwo nukplaxu yí lé woxoxoɔ nuxu do dɔ yí Ʒuifuwo koɖo Grɛkitɔ sugbɔ vatrɔ xɔsetɔwo. 2 Vɔ Ʒuifu ciwo yí dexɔ se do to nɔ jukɔn bu mɛ tɔwo yí wofɔn gu do nɔvi lɔwo ji. 3 Vɔ Pɔlu koɖo Barnabasi nɔ enɔ na nɔ hwenu sugbɔ. Yehowa* na acɛ wo yí wosɔ edɔngbegbe xonɔ nuxu. Égbeto wo ji yí wa enujiŋ gangan hamɛhamɛwo yí sɔ ɖo kpe enyɔ ci yí kuso xomɛvu yitɔ lɔ nu ji. 4 Ele ahan gan, mama ɖo amɛ sugbɔ mɛ le eju lɔ mɛ. Mɛɖewo le Ʒuifu lɔwo ji yí mɛbuwo le apotru lɔwo ji. 5 Jukɔn bu mɛ tɔwo koɖo Ʒuifu lɔwo sɔ kpe nɔ wowo gawo ji mɔ yewoado ŋkpɛn wo yí axo ekpe wo. 6 Ci wose ahan ɔ, woshi yi Likaoni ju ciwo yí nyi Listra koɖo Dɛrbe koɖo kɔxwi ciwo yí trɔdo wo mɛ. 7 Wokpɔtɔ dradra eŋɛnywi lɔ le nɔ.
8 Ŋsu ɖeka le Listra yí le nyinɔnɔ yí nyi kplibɔtɔnɔ. Atakunɔ enyi so hwenu woji yí dezɔn zɔnlin kpɔ o. 9 Ŋsu cɛ ɖokɔ to Pɔlu hwenu ele nuxu xokɔ. Ci Pɔlu glui kpɔ juun yí kpɔ mɔ xɔse le shi yí woada dɔ̀ ni druɔ, 10 édo axwa yí nu mɔ: “Sò je te.” Eyi ŋsu lɔ so hayaŋ yí tɔ zɔnlin zɔnzɔn. 11 Ci amɛahwa lɔ kpɔ enu ci Pɔlu waɔ, wodo axwa yí nu le Likaonigbe mɛ mɔ: “Mawuwo trɔ agbetɔwo yí ɖyi va mì gbɔ.” 12 Wotɔ Barnabasi yɔyɔ mɔ Zewusi yí yɔkɔ Pɔlu yɛ mɔ Ɛmɛsi, ɖo eyi le ŋkɔ yí xoxoɔ nuxu. 13 Voju Zewusi xɔ le jugan lɔ gbo nu, eyi mɛ ci yí sanɔ avɔn ni hɛn nyibuwo koɖo sese ciwo woxlixa* va agbo lɔ nu. Yɛ koɖo amɛahwa lɔ ji mɔ yewoasa vɔn nɔ Pɔlu koɖo Barnabasi.
14 Vɔ ci apotru Barnabasi koɖo apotru Pɔlu se ahan ɔ, wodrɛn wowo wuwo yí zo ɖo amɛahwa lɔ mɛ yí do axwa mɔ: 15 “Mìwotɔwo, nyi yí taɖo míwawa enu cɛwoɔ? Agbetɔwo mìnyi shigbe mɔ míwo can nɛ, eyi mìdradra eŋɛnywi lɔ nɔ mí keŋ nɔ míatrɔ so godu nɔ enugbali cɛwo yí ava Mawu agbuagbu lɔ gbɔ. Eyi wa jeŋkwi koɖo nyigban koɖo axu sɔ kpe nɔ enu ciwo pleŋ yí le wo mɛ. 16 Le hwenu ciwo yí vayi mɛɔ, étashi jukɔnwo pleŋ yí wowa ŋci yí dro wo. 17 Dégɔnma wanɔ enunywi yí sɔ ɖenɔ kunu so yiɖeki nu gbɔxwe o, ɖo éna yí eshi janɔ so jeŋkwi mɛ nɔ mí. Énanɔ yí jinukuwo nyɔnɔ do wowo hwenu. Égbenanɔ ŋɖuɖu mí yí míɖunɔ keke xodu aɖɔ. Énanɔ hɛnnɛ yí míkpɔnɔ jijɔ sugbɔ.” 18 Ci wonu enyɔ cɛwo can ɔ, defa gbɔxwe yí wogbe nɔ mɛ lɔwo yí wodegbesa vɔn nɔ wo o.
19 Vɔ Ʒuifuwo so Antiɔshi koɖo Ikonia yí va. Wodɔ amɛwo yí woxo kpe Pɔlu. Woduin ti le jugan lɔ mɛ yí bukɔ mɔ yɛku. 20 Vɔ ci enukplaviwo va yí trɔ diɔ, éso je te yí ɖo jugan lɔ mɛ. Yi ŋkegbuɔ, yɛ koɖo Barnabasi so kpe Dɛrbe. 21 Ci wodra eŋɛnywi lɔ le eju ŋtɔ́ mɛ yí ɖo enukplavi sugbɔ ɖegbɔɔ, wotrɔ yi Listra, Ikonia koɖo Antiɔshi. 22 Wodo ŋsɛn enukplaviwo le ju ŋtɔ́wo mɛ mɔ wo le kpɔtɔ anɔ xɔse lɔ mɛ. Wonu nɔ wo mɔ: “Mìɖo ato cukaɖa sugbɔ mɛ gbɔxwe aɖo Mawu Fyɔɖuxu lɔ mɛ.” 23 Gbesɔ kpe niɔ, woɖo hamɛmɛshinshinwo do hamɛ ɖekaɖeka mɛ. Wodo gbe ɖaɖa yí bla nu yí sɔ wo do alɔ̀ mɛ nɔ Yehowa,* mɛ ci ji woxɔ se.
24 Yi goduɔ, woyi to Pisidi yí vava Panfili. 25 Ci wodra enyɔ lɔ le Pɛga ɖegbɔɔ, wovayi Atalia. 26 Woɖo tɔjihun so nɔ yí va Antiɔshi fini wobiɔ xomɛvu Mawu tɔ nɔ wo le do edɔ ci woɖegbɔ yɛ ji.
27 Ci wovaɖoɔ, woyɔ hamɛ lɔ bɔ yí nu enu sugbɔ ciwo Mawu to wo ji yí wa koɖo lé Mawu hun xɔse hɔn lɔ nɔ jukɔn bu mɛ tɔwo do. 28 Eyi wonɔ enukplavi lɔwo gbɔ na nɔ hwenu jinjinɖe.